Pavodle danych analityčnaj kamandy Conflict Intelligence Team (CIT), rasijskija ŭzbrojenyja siły pierakidvajuć na front niadaŭna sfarmavany 3-ci vajskovy korpus.
Vidavočcy źniali poŭnyja sastavy z kompleksami «Buk» i tankami T-80BV i T-90M. Pry hetym, pavodle infarmacyi z baz danych RŽD, sastavy vyjšli z Mulina Nižaharodskaj vobłaści 22 i 24 žniŭnia i jeduć u Niaklinaŭku na poŭdni Rastoŭskaj vobłaści, raźmieščanuju kala miažy z Danieckaj vobłaściu Ukrainy.
Kančatkovy punkt znachodzicca najbližej da Danieckaha i Zaparoskaha ŭčastkaŭ frontu, adznačajuć analityki.
«Pieravozka kompleksaŭ «Buk« śviedčyć ab pierakidcy bujnoha abjadnańnia, naprykład, armii. U dadzienym vypadku možna vykazać zdahadku, što havorka idzie ab pierakidvańni ŭsiaho 3-ha korpusu, ci, prynamsi, toj jaho častki, jakaja ličycca bojehatovaj», — piša CIT.
Analityki nahadali, što ab farmavańni 3-ha armiejskaha korpusu ŭ Mulinie raniej zajaŭlała ŭkrainskaja vyviedka. Akramia taho, ab prysutnaści dobraachvotnikaŭ u hetym nižaharodskim pasiołku pisała anłajn-vydańnie «Viorstka», a daśledčyk Tom Bałak publikavaŭ źniatyja ŭ Mulina fatahrafii z sučasnaj rasiejskaj vajskovaj technikaj.
«Mnohija daśledčyki ździŭlajucca, čamu ŭ rukach drenna padrychtavanych dobraachvotnikaŭ apynulisia samyja sučasnyja ŭzory rasiejskaj techniki. My bačym dźvie vierahodnyja pryčyny hetaha — niemahčymaść apieratyŭna źniać staruju techniku z kansiervacyi i/abo adsutnaść u rasijskich častkach padrychtavanych ekipažaŭ, jakija možna było b źniać z frontu dla zasvajeńnia novych mašyn (heta, u svaju čarhu, moža być vyklikana bajavymi stratami i raspaŭsiudžanymi admovami ad udziełu ŭ «śpiecapieracyi»), — miarkuje CIT.
