Skrynšot videa

Skrynšot videa

«Našy prychilniki nas buduć krytykavać za toje (i spraviadliva), što my nie ŭ čas pravodzim hetyja mierapryjemstvy i razhortvajem u krainie pracesy partyjnaha budaŭnictva. I, jak vyniku, stvareńnia partyj. Nie svoječasova. Situacyja ŭ śviecie vielmi napružanaja», — zaznačyŭ Łukašenka.

Jon upeŭnieny, što ŭ takich umovach kansalidacyja pavinna prachodzić vakoł adnaho čałavieka, a nie niekalkich partyjnych centraŭ.

«U takija časy lubaja dziaržava pačynaje mabilizoŭvacca i kancentravacca vakoł adnoj-dźviuch fihur i hetak dalej. U nas heta prezident pa Kanstytucyi, nikudy ad hetaha nie dzieniešsia. A my voś tut pačali partyjnaje budaŭnictva razhortvać, źjaviacca novyja partyi.

Naturalna, što buduć stvaracca novyja centry siły. Naturalna, što budzie strukturavacca hramadstva. Vakoł hetych partyj buduć mabilizoŭvacca ludzi. Heta značyć, kali treba abjadnoŭvacca, my niby pačynajem praces niejkaha raźjadnańnia. Ale tak nas buduć krytykavać našy prychilniki, i jany majuć racyju», — skazaŭ jon.

Taksama Łukašenka ličyć, što padychodzić da vyrašeńnia pytańnia treba ŭzvažana i pastupova.

«Partyja — heta ŭłada, i jana ciahnie da siabie jak idealistaŭ, tak i palityčnych avanturystaŭ. Tamu padychodzić da hetaha pytańnia treba ŭzvažana, stymulujučy karysnuju dziaržavie dziejnaść partyj i vybudoŭvajučy žorstki zasłon tym ź ich, jakija buduć nacelenyja na škodnictva. Meta abnoŭlenaha zakona — sfarmavać mocnyja partyi, jakija nie majuć roznahałośsiaŭ pa asnovatvornych pryncypach raźvićcia krainy, zdolnyja prapanavać pierśpiektyŭnyja prajekty sacyjalna-ekanamičnaha raźvićcia, a hałoŭnaje — pryniać aktyŭny ŭdzieł u ich realizacyi», — rastłumačyŭ jon.

Łukašenka padkreśliŭ, što treba ŭličvać situacyju ŭ krainie, nie varta pry hetym raźličvać na dalokuju pierśpiektyvu.

«Iści my pavinny i rabić kroki, uličvajučy toje, što ŭ nas adbyvajecca ŭ krainie. Treba zychodzić z našych realij. Nie treba ničoha vydumlać. Nie treba daloka hladzieć na pierśpiektyvu, daloka zabiahać napierad. Faktyčna, u nas skłałasia hramadzianskaja supolnaść. Stroha pryziamlicca i nie adryvacca ad ziamli», — skazaŭ jon.

Łukašenka taksama baicca niepadkantrolnaści hramadskich arhanizacyj.

«Čas idzie. U sučasnaj Biełarusi, u adroźnieńnie ad BSSR, składvajecca ŭžo nie adnapartyjnaja, a bolš składanaja kanfihuracyja ŭzajemadziejańnia dziaržavy i hramadzianskaj supolnaści. Źjaŭlajucca novyja arhanizacyi, jakija imknucca da vyrašeńnia hramadska značnych zadač. I heta dobra, tamu što vyklikam u sučasnym žyćci treba supraćstajać razam. Znachodziacca i tyja, chto pad vyhladam sacyjalnych, dabračynnych, kulturnych prajektaŭ sprabuje ŭciahnuć biełarusaŭ u prasoŭvańnie intaresaŭ naohuł inšych dziaržaŭ. My heta bačyli ŭ 20-ym hodzie. Takich my bačym i vyrazna razumiejem ich mety. U hetym pytańni niedapuščalnyja dvajakija tłumačeńni albo ščyliny dla tych, chto pa-raniejšamu śpić i bačyć, jak ukaranicca ŭ hramadzianskuju supolnaść i raschistać krainu znutry», — skazaŭ jon

Клас
1
Панылы сорам
6
Ха-ха
5
Ого
0
Сумна
1
Абуральна
3