U Brusieli prajšła sustreča ministraŭ enierhietyki Jeŭrasajuza, na jakoj krainy pavinny byli damovicca ab uviadzieńni «stoli cenaŭ» na haz, jaki pastaŭlajecca z Rasii. Ale pa vynikach sustrečy takaja maksimalnaja cana ŭviedzienaja nie budzie. Buduć uviedzienyja tolki cenavyja abmiežavańni na inšyja enierhanośbity.
Jak paviedamlaje Reuters, za ŭviadzieńnie maksimalna dapuščalnych cenaŭ na haz prahałasavali 15 krain Jeŭrasajuza z 27. Havorka išła pra abmiežavańnie cenaŭ na luby haz, nie tolki rasijski, u śviatle rezkaha rostu cenaŭ na enierhiju ŭ Jeŭropie i śviecie. Ideju padtrymlivali ŭ pieršuju čarhu krainy Bałtyi, jakija paličyli, što takim čynam možna pazbavić Rasiju prybytku, ź jakoha jana finansuje vajnu va Ukrainie.
«Rasija vykarystała svaje pastaŭki hazu jak zbroju dla raspalvańnia enierhietyčnaha kryzisu nastupnaj zimoj, a taksama dla taho, kab asłabić našu ekanomiku i palityčna raskałoć Jeŭrapiejski Sajuz. My pavinny harantavać, što ich namahańni pacierpiać niaŭdaču», — zajaviła jeŭrakamisar pa pytańniach enierhietyki Kadry Simsan.
Adnak šerah krain centralnaj i ŭschodniaj Jeŭropy, jakija praciahvajuć impartavać rasijski haz, zajavili, što takija miery mohuć adrezać ich ad rasijskich pastavak, ad jakich zaležyć ich enierhietyčny dabrabyt. Inšyja krainy, u tym liku Bielhija, zasumniavalisia, što ŭviadzieńnie cenavaj stoli moža dapamahčy paŭpłyvać na Rasiju, pakolki taja ŭžo spyniła pastaŭki hazu ŭ Jeŭropu pa hazapravodzie «Paŭnočny patok-1», a pastaŭki pa inšych mahistralach źnizilisia da minimumu.
Ministry damovilisia raspracavać miery ŭ maštabie Jeŭrasajuza dla abmiežavańnia zvyšprybytkaŭ ad enierhii ź niehazavych krynic: vuhalnych, atamnych i vietranych elektrastancyj. Padrabiaznyja plany Jeŭrasajuza buduć apublikavanyja na nastupnym tydni.
Ministry pieradaduć svaje mierkavańni Jeŭrapiejskaj kamisii, jakaja pradstavić prapanovu dla dziaržaŭ-členaŭ na nastupnym tydni. Paśla hetaha krainy ES znoŭ praviaduć acenku i jość nadzieja, što rašeńnie moža być pryniata ŭ pačatku kastryčnika.
Jeŭrakamisija ŭžo zaklikała da ŭstanaŭleńnia stoli cenaŭ na rasijski pryrodny haz i damahajecca «salidarnaha ŭznosu» ad jeŭrapiejskich naftahazavych kampanij, jakija atrymali niejmaviernyja prybytki ad rostu cenaŭ na enierhanośbity.
