Skrynšot ź videa
«Kali chtości jašče sumniavajecca, što my žyviom u epochu źmieny epoch, — samy čas pierastać sumniavacca. Harbačoŭ pamior — usie skazali: «Syšła epocha». Karaleva syšła — takaja ž historyja. Ale heta jašče, akazvajecca, nie ŭsio.
Časy, kali Paŭnočnaja Kareja ličyłasia etałonam izalavanaj dziaržavy, taksama, pa ŭsioj bačnaści, prajšli — rejtynhi abnaŭlajucca. Čym nie jašče adna epocha, jakaja minuła?
Tut na cyrymoniju raźvitańnia ź Lizavietaj zaprasili ŭsie krainy. Voś usie. Akramia Rasii, Biełarusi i, bonusam, Mjanmy. Navat Iran zaprasili, chaj i na ŭzroŭni pasłoŭ, my ž naohuł u lizie «pa-za ŭzroŭniami» apynulisia. Takija spravy.
U apošni čas, u suviazi z ašałamlalnymi padziejami na froncie, u rasijskaj prapahandzie ŭsio šyrej užyvajecca mesedž «my adny vajujem suprać NATA i ŭsiaho Zachadu, a Ukraina — nu, tak sabie». Mesedž čakany, tamu što zručny — dla apraŭdańniaŭ.
Nasamreč, vajuje, viadoma, Ukraina i ŭkraincy.
Ale častka praŭdy ŭ tym, što ich padtrymała vielmi šmat krain i narodaŭ. Sapraŭdy, vielmi šmat — amal uvieś śviet jak taki i ŭžo sapraŭdy ŭvieś cyvilizavany śviet.
Tamu što heta taksama — prykmieta źmieny časoŭ, epoch, daminujučych kaštoŭnaściaŭ i paradyhmaŭ.
XX stahodździe było, mabyć, apošnim, kali ludziam jašče chaciełasia žyć pa pravie siły.
Paśla Druhoj suśvietnaj, viadoma, trend źmianiŭsia, ale, budziem ščyryja, i da kanca minułaha stahodździa, i na pačatku hetaha daloka nie zaŭsiody aniołami byli i zachodnija krainy i sajuzy.
Adnak ciapier situacyja vyhladaje niekalki inakš. Heta naohuł nie adkryćcio — nie ŭsie na Zachadzie chočuć padtrymlivać Ukrainu. Pahladzicie, jak Hiermaniju i niamieckich čynoŭnikaŭ łomić ad hetaj nieabchodnaści, dy i nie tolki ich.
Ale treba. Ale davodzicca, tamu što inakš nie zrazumiejuć ni ŭłasnyja narody, ni inšyja krainy — partniory i sajuźniki. Tamu što siońniašni śviet, jon užo inšy, i jak by chto ni staviŭsia da Ukrainy, ukrainskaj temy i prablemy, sam raskład, u jakim chtości sprabuje źniščyć jaje tolki pa pravie siły, vyrašaje ŭsio. I ŭ hetym śviet adziny.
Źmianiajucca ludzi, źmianiajucca časy, źmianiajucca epochi i kaštoŭnaści. U toj ci inšaj stupieni heta dachodzić da ŭsich: da Šolca — chutčej, da Kim Čen Yna — pavolniej, ale ŭsio ž…
Vielmi mała zastałosia tych, da kaho nie dachodzić naohuł. Nastolki mała, što śviet ličyć mahčymym demanstratyŭna ich ihnaravać.
Rasija, Biełaruś, Mjanma — vielmi sumnieŭny patencyjał dla budaŭnictva alternatyŭnaj cyvilizacyi va ŭsich sensach i z usich punktaŭ hledžańnia.
Značyć, raniej ci paźniej (chutčej, raniej) epochi źmieniacca i tut».
