«Treba ŭsio-tki raźviarnuć prapahandu zdarovaha ładu žyćcia. Treba zajmacca hetym prosta, nie addavać na vodkup, nie dumać, što heta niejkaja druharadnaja reč: pjuć mužyki i dalej pić buduć», — zajaviŭ u siaredzinie žniŭnia Uładzimir Pucin na sustrečy z v.a. kiraŭnika Uładzimirskaj vobłaści Alaksandram Aŭdziejevym.

Pucin udakładniŭ, što ŭ ramkach baraćby z ałkaholnaj zaležnaściu «nielha ničoha zabaraniać, nielha zajmacca zališnim uzdymam koštaŭ, akcyzaŭ». Naadvarot, treba vieści «prapahandu zdarovaha ładu žyćcia», a taksama «raźvivać infrastrukturu dla zaniatkaŭ sportam i nadać naležnuju ŭvahu abjektam kultury».

Za niekalki dzion da hetaha Pucin sustrakaŭsia ź inšym hubiernataram — kiraŭnikom Kiraŭskaj vobłaści Alaksandram Sakałovym (sustrečy prachodzili pierad vybarami ŭ hetych rehijonach; i Sakałoŭ, i Aŭdziejeŭ, pavodle aficyjnych źviestak, pieramahli). I prezident Rasii znoŭ zahavaryŭ pra ałkahol — a dakładniej, pra «vysoki ŭzrovień ałkahalizacyi nasielnictva» ŭ monaharadach rehijona.

«Nie treba ničoha zapichvać kudyści pad dyvan, łakiravać ničoha, treba zajmacca samymi vostrymi prablemami, — pierakonvaŭ Pucin Sakałova. — Ja prašu vas źviarnuć na heta ŭvahu».

Da hetaha Pucin nikoli tak časta nie kazaŭ ab prablemach z ałkazaležnaściu ŭ Rasii. Adzin z redkich kamientaryjaŭ na hetuju temu prahučaŭ ź jaho vusnaŭ padčas tradycyjnaj pres-kanfierencyi ŭ 2016 hodzie. Tady žurnalist spytaŭ prezidenta pra baraćbu ź nielehalnym abarotam techničnaha śpirtu — paśla taho, jak u Irkucku 77 žycharoŭ da śmierci atrucilisia «hłoham». Pucin u adkaz zajaviŭ, što ałkahalizacyja sapraŭdy — prablema dla Rasii. Adnak tut ža aptymistyčna dadaŭ, što, naprykład, u krainach Paŭnočnaj Jeŭropy pjuć dakładna nie mienš (heta niapraŭda).

Jašče bolš dziŭnymi zajavy Pucina na sustrečach z hubiernatarami robić toje, što ni Uładzimirskaja, ni Kiraŭskaja vobłaści nie adnosiacca da rehijonaŭ z samym vysokim uzroŭniem ałkaholnaj zaležnaści ŭ nasielnictva. Ministerstva achovy zdaroŭja RF nie daje statystyku pa hetym pakazčyku pa ŭsich subjektach Fiederacyi, ale viedamstva paviedamlała, što najhoršaja situacyja — na Dalokim Uschodzie i na poŭnačy krainy, a taksama ŭ Pienzienskaj vobłaści. Adnak ź ich hubiernatarami prezident pra «ałkahalizacyju nasielnictva» nie razmaŭlaŭ.

Krynica «Mieduzy», blizkaja da Kramla, patłumačyła, što dla hubiernataraŭ zhadka hetaj temy taksama stała niečakanaściu — bo jana nie ŭvachodzić «navat u dziasiatku aktualnych» u hetych rehijonach: «Heta nie toje, što turbuje ludziej». Sakałoŭ i Aŭdziejeŭ byli źbiantežanyja — i nie zrazumieli, čamu prezident raptam zahavaryŭ pra heta. Pres-sakratar prezidenta Dźmitryj Piaskoŭ skazaŭ «Mieduzie»: zajavy Pucina źviazanyja z tym, što rehijony Sakałova i Aŭdziejeva «vybivajucca z ahulnaha trendu» apošnich hadoŭ na źnižeńnie ŭžyvańnia ałkaholu ŭ Rasii.

Adnak dźvie inšyja krynicy «Mieduzy», blizkija da administracyi prezidenta Rasii, nastojvajuć, što Pucin zrabiŭ heta nie z-za statystyki. Pa ich słovach, prezident pačaŭ nadavać asablivuju ŭvahu hetaj prablemie, tamu što na fonie vajny va Ukrainie rasijskija čynoŭniki stali značna čaściej i značna bolš pić ałkaholu. Asabliva tryvožyć Pucina stan «niekatorych ludziej ź jaho blizkaha koła», padkreślili krynicy «Mieduzy».

«Ludzi ź lutaha tak zdymajuć stres. Ministry, ich namieśniki, navat niekatoryja vice-premjery, rabotniki administracyi prezidenta i Rady biaśpieki, častka kiraŭnikoŭ dziaržkarparacyj, hubiernatary», — raspaviadaje adzin z surazmoŭcaŭ vydańnia. Jon taksama adznačyŭ, što asnoŭnaja pryčyna hetaha «stresu» źviazanaja z realnaj škodaj, naniesienaj Rasii ŭvarvańniem i sankcyjami, — tady jak Pucin nibyta ličyć, što z hetymi ciažkaściami čynoŭniki pavinny lohka spraŭlacca. Jak raniej užo pisała «Mieduza», pra toje, što prezident vyrašyŭ pačać poŭnamaštabnuju vajnu z Ukrainaj, da 24 lutaha siarod rasijskich čynoŭnikaŭ nie viedaŭ amal nichto, tamu mnohija ź ich u pieršyja miesiacy vajny byli ŭ poŭnaj razhublenaści i «nie viedali, što rabić».

«Prysieli [u lutym] na stakan, chtości ŭciahnuŭsia», — reziumavała adna z krynic.

Pry hetym dva surazmoŭcy «Mieduzy», blizkija da Kramla, adznačajuć, što, pavodle ich nazirańniaŭ, pravały Rasii na froncie nijak nie ŭpłyvajuć na staŭleńnie čynoŭnikaŭ i top-mieniedžaraŭ da ałkaholu: «U ich svaja vajna, svaje prablemy».

Krynicy «Mieduzy» miarkujuć, što situacyja z užyvańniem ałkaholu siarod vyšejšych rasijskich kiraŭnikoŭ i čynavienstva pačała turbavać Pucina, bo «dyscyplina stała ciarpieć»: chtości źnikaje pierad važnym mierapryjemstvam, chtości nievyrazna i błytana dakładvaje. Heta ŭžo bačyć šyrokaja publika.

Surazmoŭcy vydańnia miarkujuć, što Pucin nie źbirajecca zvalniać tych, chto praviniŭsia: «Pakul buduć tolki namioki i miakkija patrabavańni». Adnak situacyja moža źmianicca: pa śćviardžeńni krynic «Mieduzy», niekalki hadoŭ tamu adzin z rasijskich hubiernataraŭ užo straciŭ svaju pasadu mienavita z-za ałkazaležnaści.

Sam Pucin, jak śćviardžajecca ŭ ŚMI, ciapier amal nie pje (u adroźnieńnie ad studenckich hadoŭ). Ale, naprykład, jon publična raspaviadaŭ, jak adnojčy adznačaŭ svoj dzień naradžeńnia sa staršynioj KNR Si Czińpinam: «Nie budu chavać, vypili pa čarcy harełki, prosta narezali niejkuju kaŭbasu».

Taksama Pucin dyskutavaŭ z vytvorcami ałkaholu, jakija na sustrečy z prezidentam zajavili, što «ruskija ludzi litaralna vyraśli na ałkaholi». Prezident nie pahadziŭsia z hetym śćviardžeńniem i zajaviŭ: «Ja vyras na małace na matčynym. <…> Navat dobry, jakasny ałkahol usio roŭna na asnovie śpirtu. Siłu daje na vielmi karotki pramiežak času, a potym…»

U 2020 hodzie Pucin paviedamiŭ: «Starajusia nie pić piva ŭ apošni čas. Žyvot raście».

Клас
Панылы сорам
Ха-ха
Ого
Сумна
Абуральна