Fota: BiełTA
U BDEU novy prarektar pa navukovaj rabocie — kandydat ekanamičnych navuk, dacent Jahor Husakoŭ źmianiŭ na pasadzie doktara navuk, prafiesara Alaksieja Bykava. Husakovu — 33 hady, jon syn staršyni NAN Uładzimira Husakova i tavaryš ministra adukacyi Andreja Ivanca, čyim namieśnikam jon byŭ u Radzie maładych navukoŭcaŭ NAN.
U hetym pryznačeńni prahladajecca parušeńnie pryniatych akademičnych normaŭ.
«Univiersitety — heta zvyčajna vielmi kansiervatyŭnyja instytucyi. Ty maješ pryjści na nizkuju pasadu i ź jaje pastupova raści.
Takija pasady aproč administracyjnych dasiahnieńniaŭ patrabujuć i paśpiachovaj navukovaj raboty, jakaja zajmaje čas (u tym liku na aśpiranturu, naprykład), što zaminaje chutkamu prasoŭvańniu pa karjernaj leśvicy.
Tamu, zvyčajna, ludzi prychodziać da takich pasadaŭ u davoli śpiełym uzroście, majuć doŭhi dośvied raboty zahadčykam kafiedry, dekanam, a taksama salidny śpis navukovych publikacyj i prajektaŭ za plačyma, najaŭnaść abaronienych aśpirantaŭ», — prakamientavaŭ pryznačeńnie novy kaleha Husakova-małodšaha.
«Jak navukoviec jon pakul što — pustoje miesca. U jaho niama nivodnaha aśpiranta, jaki b abaraniŭsia, nie ŭpeŭnieny, što jany ŭ jaho ŭ pryncypie byli. Nijakaha navukovaha rejtynhu cytavańnia, naprykład, u Google Scholar, u jaho niama. U rasijskim rejtynhu navukovaha cytavańnia jaho profilu taksama niama, rejtynhu ŭ Skopusie ŭ jaho nie isnuje, tut bolš kamientavać ničoha i nie treba, pa-mojmu, — skazaŭ nam inšy člen akademičnaj supolnaści. —
A kali brać zamiežnyja prykłady, prarektaraŭ pa navukovaj rabocie viadučych VNU Jeŭropy, to tam prarektar pa navukovaj rabocie — heta navukoviec, jaki nie toje što ź imieniem, ale jaki maje i svaju navukovuju škołu. Asabliva, kali my havorym pra ekanamistaŭ. Naprykład, Siarhiej Huryjeŭ staŭ prarektaram pa navukovaj rabocie ŭ 50 hadoŭ».
Sam Husakoŭ-małodšy da taho va ŭniviersitetach nie pracavaŭ — u 2011-m jon skončyŭ Akademiju kiravańnia pry prezidencie, potym aśpiranturu i daktaranturu ŭ Instytucie sistemnych daśledavańniaŭ u APK NAN Biełarusi, a potym uznačaliŭ siektar kaapieracyi ŭ hetym instytucie.
Niejkich vybitnych rabot Husakoŭ nie pisaŭ, u navukovych rejtynhach cytavańnia nidzie nie ŭzhadvajecca.
Huhlicca jaho kandydackaja manahrafija «Navukovyja asnovy i arhanizacyjna-ekanamičny miechanizm efiektyŭnaha funkcyjanavańnia kaapieratyŭna-intehracyjnych abjadnańniaŭ».
Znajomyja z tvorčaściu Husakova skieptyčna staviacca da jaho kandydackaj, bo nie bačać u joj navukovych vysnovaŭ.
