Pieršaja častka ludziej — heta dziejačy roznych apazicyjnych inicyjatyvaŭ ci miedyjnyja asoby
Valeryj Sachaščyk i jahony syn Alaksandr Sachaščyk, jakija byli padpałkoŭnikam i majoram adpaviedna.
Valer Sachaščyk. Fota ź jahonaha zvarotu z nahody ŭvarvańnia Rasii va Ukrainu.
Dźmitryj Dźmitryjeŭ, padpałkoŭnik milicyi zapasu. Fatohraf, pracuje dla niezaležnych ŚMI.
Andrej Parotnikaŭ, kapitan milicyi zapasu. Analityk, ekśpiert pa pytańniach biaśpieki.
Aleh Talerčyk, daradca justycyi, pracavaŭ u Hienieralnaj prakuratury. Pradstaŭnik abjadnańnia byłych siłavikoŭ BYPOL.
Kryścina Cimanoŭskaja, praparščyk unutranaj słužby zapasu. Biahucha, jakaja pakinuła Alimpijskija hulni praz sproby vyvieźci jaje ŭ Biełaruś paśla krytyki kiraŭnictva zbornaj. Žyvie ŭ Polščy.
Druhaja hrupa — palitviaźni i źniavolenyja pa palityčnych matyvach
Jahor Lebiadok, jaki byŭ staršym lejtenantam zapasu. Suprać jaho zaviedziena kryminalnaja sprava pa art. 361-4 KK «sadziejničańni ekstremisckaj dziejnaści». Ciapior jon u SIZA-1.
Jaŭhien Babak, jaki byŭ jurystam 1 kłasa. Jamu prysudzili 4 hady kałonii pa artykułach 130 KK i 342 KK.
Alaksandr Vielaśnicki, staršy lejtenant zapasa. Paśla 2020 asudziŭ hvałt siłavikoŭ. Zatrymany 29 vieraśnia 2021 hoda, z hetaha času znachodzicca ŭ bresckim SIZA. Abvinavačvajecca pa artykułach 130 KK i 342 KK.
Kapitan milicyi Ihar Bukas zatrymany 10 žniŭnia 2020 hoda. Jaho razam z synam abvinavacili ŭ hvałcie nad supracoŭnikam DAI (art. 364 KK). Iharu prysudzili 4 hady kałonii strohaha režymu, adbyvaje pakarańnie ŭ hrodzienskaj turmie.
Ihar Bukas. Fota: dissidentby.com
Lejtenant milicyi zapasu Uładzimir Šustaŭ byŭ zatrymany 10 žniŭnia 2020 hoda. Padčas zatrymańnia jaho mocna źbili i abvinavacili ŭ hvałcie nad milicyjantam (art. 364 KK). Raniej Uładzimir słužyŭ u AMAPie. Adbyvaje pakarańnie ŭ PK №3.
Padpałkoŭnik justycyi Alaksiej Siańkoŭ byŭ zatrymany 5 lipienia 2021 hoda. Jaho abvinavacili va ŭdziele ŭ niadzielnych maršach 16 i 23 žniŭnia. Prysudzili dva hady pazbaŭleńnia voli. Adbyvaje pakarańnie ŭ PK-3. Mieŭ miedali za biezdakornuju słužbu. Jahony brat, palitviazień Juryj Siańkoŭ, atrymaŭ try hady turmy za ŭdzieł u tych ža maršach i repost u telehramie.
Jurysta 1 kłasa i byłoha supracoŭnika prakuratury Aleha Jermakova zatrymali 10 lutaha 2022 hoda. Mužčynu 34 hady i ŭ jaho dvoje dziaciej. Aleha vinavaciać u vydavańni źviestak pra vykanaŭcaŭ represij i ŭdzielnikaŭ falsifikacyi vybaraŭ. Utrymlivajecca ŭ SIZA-1.
Jurystku 2 kłasa Natallu Łašč zatrymali 17 žniŭnia 2022 hoda. Zhodna ź infarmacyjaj siłavikoŭ, taksama za «źlivy» danych vykanaŭcaŭ represij i ŭdzielnikaŭ falsifikacyi vybaraŭ. Suprać jaje zaviedzienaja kryminalnaja sprava pa artykule 130 KK RB «Raspalvańnie varožaści i varažniečy», joj pahražaje da 12 hadoŭ.
Natalla Łašč
Siarhiej Man byŭ padpałkoŭnikam KDB. Zhodna sa źviestkami «Kibierpartyzanaŭ» u pramiežak z 16 pa 17 listapada jon «majučy dostup da dziaržaŭnych sakretaŭ… i znachodziačysia na svaim pracoŭnym miescy vydaŭ słužbovuju tajamnicu». Cikava, što heta adbyłosia amal adrazu paśla zabojstva Ramana Bandarenki, ale ci źviazana heta — nieviadoma, ale całkam imavierna, što jaho aryštavali i asudzili mienavita za pratestnuju dziejnaść. Jak minimum z 23 listapada znachodzicca pad vartaj.
Siarhiej Man
Staršamu lejtenantu milicyi zapasu Stanisłavu Puhačovu 29 hadoŭ. Viadoma, što jon pracavaŭ u Leninskim RUUS h. Minska i dasłužyŭsia tam da pasady staršaha opierupaŭnavažanaha adździaleńnia kryminalnaha vyšuku. Paśla hetaha jon zvolniŭsia, bo, vidać, skončyŭsia termin jahonaha raźmierkavańnia, i pajšoŭ na pracu ŭ IT. «Pakajalniaje» videa ź im źjaviłasia na adnym z kanałaŭ HUBAZa 16 lutaha 2022 hoda. Dniami jamu prysudzili 7 hadoŭ kałonii, abvinavaciŭšy pa artykułach 179 (niezakonny zbor albo raspaŭsiudžvańnie infarmacyi pra asabistaje žyćcio), 130 (raspalvańnie rasavaj, nacyjanalnaj, relihijnaj ci inšaj sacyjalnaj varožaści) i 203-1 (niezakonnyja dziejańni ŭ dačynieńni da infarmacyi pra asabistaje žyćcio i piersanalnyja danyja) Kryminalnaha kodeksa.
Stanisłaŭ Puhačoŭ
Treciaja hrupa — siłaviki, jakija zvolnilisia ŭ znak niazhody z vynikami vybaraŭ i prymianieńniem hvałtu suprać pratestoŭcaŭ, ale pra jakich niama infarmacyi, što jany siadziać za kratami
Viktar Šarkovič, staršy sieržant milicyi zapasu.
Kirył Bubnoŭ, staršy lejtenant milicyi zapasu.
Vital Volski, daradca justycyi. Pracavaŭ staršym śledčym Hienieralnaj prakuratury.
Zajava pra adstaŭku Vitala Volskaha. Fota: telehram-kanał «Basta»
Čaćviortaja hrupa — tyja, pra vypadki zatrymańnia kaho viadoma sa ŚMI, ale dalejšy los nieviadomy
Daniła Asavieluk, lejtenant zapasu. Chłopcu ŭsiaho 23 hady, imavierna — vypusknik vajskovaj kafiedry. Jaho zatrymlivali ŭ pramiežak z 25 pa 26 sakavika 2022 hoda.
Ihar Siamaška niekali pracavaŭ namieśnikam načalnika kiravańnia pa achovie kanstytucyjnaha ładu i baraćbie z teraryzmam KDB i vyjšaŭ u adstaŭku ŭ zvańni pałkoŭnika. Uznaharodžany miedalom za biezdakornuju słužbu druhoj stupieni ŭ 1997 hodzie. Ciapier jamu 68 hadoŭ. Pa infarmacyi kanała «Śpisy zatrymanych», mužčynu zatrymlivali 17 listapada 2021 hoda.
Siarhieju Lalinu 51 hod i jon vajskovy piensijanier u zvańni padpałkoŭnika. Viadoma, što jon udzielničaŭ u pratestach — jaho zatrymlivali na niadzielnym maršy 8 listapada 2020 hoda.
Vajskovy piensijanier z Połacka Alaksiej Trućko, mieŭ zvańnie padpałkoŭnika. Jaho zatrymlivali za pratesty 27 kastryčnika 2020 hoda.
Pałkoŭnik milicyi Alaksiej Pratapovič z 2011 da pačatku 2020 hoda ŭznačalvaŭ Červieński RAUS. Paśla hetaha jaho pieraviali na pasadu kiraŭnika spraŭ Červieńskaha rajvykankama. Zvolniŭsia ŭ znak niazhody z falsifikacyjaj vybaraŭ 2020 hoda. Zatrymlivali 24 sakavika 2022 hoda.
Alaksiej Pratapovič. Fota: cherven.by
Padpałkoŭnika milicyi Andreja Bieleńkaha, jaki niekali byŭ namieśnikam načalnika Ivanaŭskaha RAUS, zatrymlivali 14 lipienia 2022 hoda.
Piataja hrupa — biełarusy, jakija vajujuć ci vajavali za niezaležnaść Ukrainy suprać rasijskaj ahresii
Vasil Vieramiejčyk, lejtenant zapasu. Dobraachvotnik Pałka Kalinoŭskaha (mahčyma, były).
Pavieł Kułažanka, praparščyk milicyi zapasu, viadomy jak EXOMON. Dziajač rucha «Supraciŭ», były vajar Pałka Kalinoŭskaha.
Viačasłaŭ Hranoŭski, siaržant milicyi zapasu. Paśla pačatku vajny pajechaŭ vajavać va Ukrainu, ustupiŭ u dobraachvotnicki bataljon «Danbas».
Šostaja hrupa — šerah byłych siłavikoŭ i vajskoŭcaŭ, pryčyna pazbaŭleńnia zvańniaŭ jakich dakładna nieviadomaja
Pałkoŭnik u adstaŭcy Hienadź Aleksiajuk doŭhi čas pracavaŭ u 86-j hrupie pamiežnaj słužby ŭ Breście. Paśla pierajšoŭ na pasadu namieśnika adnaho z kiraŭnictvaŭ u Pamiežny kamitet. Mieŭ miedali «Za biezdakornuju słužbu» ŭsich troch stupieniaŭ.
Hienadź Aleksiajuk. Fota: sacsietki
Juryj Barkoŭski doŭhi čas pracavaŭ u achovie Łukašenki, vyjšaŭ u zapas u zvańni pałkoŭnika. U 2004 hodzie navat byŭ čalcom uradavaj delehacyi na samit JEAES u Kazachstanie. Mieŭ dva miedali za biezdakornuju słužbu — 3 i 2 stupieniaŭ.
Pałkoŭnik Andrej Hirs byŭ namieśnikam načalnika pieršaha hałoŭnaha kiraŭnictva Dziaržaŭnaha pamiežnaha kamiteta i vyjšaŭ u zapas u zvańni pałkoŭnika. Mieŭ miedali «Za biezdakornuju słužbu» ŭsich troch stupieniaŭ i «Za adznaku ŭ achovie dziaržaŭnaj miažy».
Pałkoŭniku Dźmitryju Dziarkovu 40 hod i jon pracavaŭ u pamiežnaj častcy i častcy 2008, pra jakuju ŭ internecie niama anijakaj infarmacyi. Pa źviestkach «Kibierpartyzanaŭ», byŭ supracoŭnikam KDB.
Źmicier Dziarkoŭ
Pałkoŭnik Źmicier Radzievič pracavaŭ u Pamiežnym kamitecie na mnohich pasadach, siarod jakich — starejšy aficer siektara, načalnik kinałahičnaj słužby i, narešcie, namieśnikam načalnika ŭpraŭleńnia Dziaržaŭnaha pamiežnaha kamiteta. Mieŭ dva miedali za biezdakornuju słužbu — 3 i 2 stupieniaŭ.
Pałkoŭnik milicyi Uładzimir Šyjanok vykładaje va ŭniviersitecie «MITSA» i na jurydyčnym fakultecie BDU (prynamsi, da niadaŭniaha času). Mužčynu 65 hadoŭ i jon maje stupień doktara jurydyčnych navuk. Kaliści ŭznačalvaŭ kafiedru apieratyŭna-vyšukavaj dziejnaści Akademii milicyi.
Uładzimir Šyjanok. Fota: Onliner.by
Pałkoŭnik milicyi Siarhiej Paško niekali byŭ načalnikam kiraŭnictva ideałahičnaj pracy i kadravaha zabieśpiačeńnia kiraŭnictva ŭnutranych spravaŭ Viciebskaha abłvykankama. Z kanca 2017 hoda na piensii. Mieŭ dva miedali za biezdakornuju słužbu — 3 i 2 stupieniaŭ.
Pałkoŭnik Raman Kazłoŭ pracavaŭ spačatku na asobnym kantrolna-prapusknym punkcie «Minsk» (jon znachodzicca ŭ aeraporcie Minsk) i dasłužyŭsia tam da načalnika adździeła słužby. Paśla pierajšoŭ na pasadu namieśnika načalnika adnaho z kiraŭnictvaŭ Dziaržaŭnaha pamiežnaha kamiteta. Mieŭ miedali «Za biezdakornuju słužbu» ŭsich troch stupieniaŭ.
Padpałkoŭniku Siarhieja Kisialovu 61 hady i niekali jon pracavaŭ u KDB, u pałku ŭradavaj suviazi.
Padpałkoŭnik milicyi Alaksandr Ćviacinski byŭ načalnikam adździeła dziaržaŭnaj rehistracyi i ŭliku pravaparušeńniaŭ upraŭleńnia ŭnutranych spraŭ Viciebskaha abłvykankama. Mieŭ dva miedali za biezdakornuju słužbu — 3 i 2 stupieniaŭ.
Padpałkoŭnik milicyi Alaksandr Papialonak byŭ načalnikam 4-ha adździeła kryminalnaj milicyi ŭpraŭleńnia ŭnutranych spraŭ Viciebskaha abłvykankama. Mieŭ dva miedali za biezdakornuju słužbu — 3 i 2 stupieniaŭ.
Padpałkoŭnik milicyi Alaksandr Šalc byŭ namieśnikam načalnika Kastryčnickaha RAUS h. Viciebska.
Daradca justycyi Alaksandr Nikałajeŭ niekali byŭ majoram, namieśnikam načalnika štaba pa mabilizacyjnaj rabocie 40-j bazy achovy, suviazi i absłuhoŭvańnia Suchaputnych vojskaŭ US. Paśla pierajšoŭ na pracu ŭ Śledčy kamitet.
Siarhiej Vaniejeŭ pracavaŭ u pamiežnych słužbach, dasłužyŭsia da padpałkoŭnika. Na 2013 hod zajmaŭ kiraŭničuju pasadu ŭ 15-j pamiežnaj hrupie pamiežnaj słužby.
Źmicier Zora pracavaŭ u 50-j źmiašanaj avijabazie VPS Respubliki Biełaruś u Mačuliščach i adkazvaŭ tam u tym liku za zabieśpiačeńnie. Dasłužyŭsia da padpałkoŭnika.
Źmicier Zora. Fota: sacsietki
Anatol Zańko — major u adstaŭcy i vieteran Afhanskaj vajny. Pracavaŭ viadučym inžynieram pa achovie pracy ŭ Maładziečanskaj balnicy №1.
Anatol Zańko. Fota: 12molod.schools.by
Źmicier Supranovič — major zapasu. Pracavaŭ u Smarhonskaj pamiežnaj hrupie.
Juryj Šynkievič — major zapasu. Na 2017 hod pracavaŭ načalnikam adździaleńnia pamiežnaha kantrolu 86-j pamiežnaj hrupy pamiežnaj słužby.
Nieviadoma, dzie pracavali i čym zajmalisia astatnija fihuranty śpisu. Miarkujučy pa sacyjalnych sietkach, prynamsi častka ludziej z apošniaha śpisa na voli.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
