Nahodaj tamu staŭ kamientaryj, jaki Vielaśnicki nibyta pakinuŭ u «ekstremisckim» telehram-kanale. Kamientaryj byŭ taki: «Likvidavany člen złačynnaj hrupoŭki KDB. Zahinuŭ naš. Słava hieroju».
14 śniežnia 2021 damoŭ da Vielaśnickaha naviedalisia siłaviki, dali aznajomicca žoncy Alaksandra z pastanovaj i skazali vydać miedal muža «Za biezdakornuju słužbu» i paśviedčańnie na ŭznaharodu.
19 vieraśnia 2022 hoda pa ŭkazie Łukašenki voinskich zvańniaŭ pazbavili bolš za 80 byłych vajskoŭcaŭ. Siarod ich byŭ i eks-pamiežnik Vielaśnicki, jaki ŭ žniŭni 2020-ha asudziŭ hvałt siłavikoŭ i publična admoviŭsia ad miedala «Za biezdakornuju słužbu».
Nahadajem, u svaim videazvarocie 14 žniŭnia 2020 hoda Alaksandr skazaŭ:
«Ja pryniaŭ hetuju ŭznaharodu z honaram. Bolš za 15 hadoŭ sapraŭdy hodnaj słužby ŭ pamiežnych vojskach i orhanach pamiežnaj słužby davali padstavu ličyć, što ja maju prava nasić hetuju ŭznaharodu na svaim paradnym kicieli. Tak było da ŭčarašniaha dnia. Učora ja daviedaŭsia, što hetym ža miedalom u terminovym paradku ŭznaharodžvajuć tych, chto ŭdzielničaje ŭ vykradańniach, źbivańniach i katavańniach mirnych ludziej, žančyn i mužčyn, niepaŭnaletnich i padletkaŭ, starych. […] Mnie ź imi nie pa darozie. Ja nie chaču, kab majo imia fihuravała ŭ adnym pieraliku ź imionami hetych ludziej».
Spravu Alaksandra Vielaśnickaha ŭ Bresckim abłasnym sudzie pačali razhladać jašče 31 žniŭnia.
Sudovaje pasiadžeńnie ŭznačaliŭ Andrej Vasiluk, bok dziaržabvinavačańnia padtrymlivaje Taćciana Cybula.
Zajaviŭ, što admaŭlajecca ad pakazańniaŭ, i paviedamiŭ pra źbićcio i pahrozy
U pieršy dzień suda Alaksandr zajaviŭ, što admaŭlajecca ad pakazańniaŭ, jakija davaŭ padčas śledstva i znachodžańnia ŭ žodzinskaj turmie. Pryčynaj jon nazvaŭ toje, što pry zatrymańni i ŭ turmie na jaho akazvaŭsia cisk. Tak, u dzień zatrymańnia, ź jaho słovaŭ, 29 vieraśnia 2021 hoda, pinskija supracoŭniki KDB pahražali prastrelić jamu nohi. U Minsku na Akreścina jon 3 dni nie moh spać, kamiera była dušnaj i pierapoŭnienaj ludźmi.
Zatym, kali Alaksandra dastavili ŭ Žodzina, 4 kastryčnika 2021 hoda, supracoŭniki turmy stali ŭ šerah, pačali źbivać i nackoŭvać sabak.
U novym miescy taksama byli pierapoŭnienyja kamiery, a pieradačy nie dazvalalisia — i tak na praciahu paŭtara miesiacaŭ. Pakul Alaksandr siadzieŭ u Žodzinie, da jaho sprabavaŭ trapić advakat. Bolš za miesiac jaho nie puskali na spatkańnie z padabaronnym. Samastojna napisać skarhu było niemahčyma, bo ŭ pryncypie nielha było pisać. Z ulikam hetaha cisku, pakazańni na sudzie, padčas śledstva ŭ Žodzinie i padčas śledčych dziejańniaŭ u Breście ŭ Alaksandra adroźnivajucca.
Vykazaŭ zdahadku, što jaho padstavili
Padčas druhoha sudovaha pasiadžeńnia Alaksandr Vielaśnicki paviedamiŭ svaju viersiju taho, što adbyłosia. Jon raspavioŭ, što ŭ jaho sapraŭdy byŭ tielehram-akaŭnt na biełaruskim mabilnym numary, ukazanym u abvinavačvańni. Adnak adznačyŭ, što byŭ u Rumynii ŭ siaredzinie 2021 hoda, tam u jaho byli prablemy z suviaźziu. Z hetaj nahody, pa słovach Vielaśnickaha, jon nabyŭ rumynskuju sim-kartu i stvaryŭ novy telehram-akaŭnt na hetym numary. Stary na biełaruskim numary vydaliŭ. Pry hetym pa viartańni ŭ Biełaruś praciahvaŭ vykarystoŭvać biełaruskuju sim-kartu dla zvankoŭ i prahladu videa.
Takim čynam, z nazvanaha ŭ abvinavačvańni tielehram-akaŭnta pakinuŭ kamientaryj zusim nie jon. Palitviazień vykazaŭ zdahadku, što chtości zachacieŭ jaho padstavić, zrabiŭ dublikat jaho biełaruskaj sim-karty i pakinuŭ toj kamientaryj pra hibiel Zielcera i supracoŭnika KDB.
Na druhim sudovym pasiadžeńni prysutničaŭ śpiecyjalist z BrDTU, jakoha dapytali. Ale było vyrašana vyklikać jašče śviedak i ekśpiertaŭ (u asobie supracoŭnika MTS), dla hetaha ŭ spravie abviaścili doŭhi pierapynak.
Nastupnaje sudovaje pasiadžeńnie pa spravie Alaksandra Vielaśnickaha adbudziecca 22 vieraśnia. «Viasna» budzie za im sačyć.
SIZA-7. 224030, h. Brest, vuł. Savieckich pahraničnikaŭ, 37. Alaksandu Vielaśnickamu.
