Na praśpiekcie Niezaležnaści, 25 možna adpravicca ŭ padarožža pa našaj Radzimie, bo mienavita tut znachodzicca muziej architekturnych minijaciur «Kraina mini».
«Kraina mini» — heta technałahičny i interaktyŭny muziej minijaciur, dzie vy zmožacie ŭbačyć bolš za 30 słavutaściaŭ krainy: jak isnujučych ciapier, tak i ŭžo źnikłych abjektaŭ architektury. Častka słavutaściaŭ pradstaŭlenaja ŭ ekspazicyi ŭ vyhladzie makietaŭ, a častku možna ŭbačyć u virtualnaj realnaści.
Idziem dalej pa sučasnych vulicach Minska, zachaplajemsia jaho pryhažościu, ale tak chaciełasia b znajści mašynu času i apynucca na starych vulicach…
Mašyna času jość! Znachodzicca jana ŭ adnoj z najstarejšych pabudoŭ horada — Minskaj Ratušy, jakaja daje nam mahčymaść ździejśnić «Haradski pramienad. Miensk na starych paštoŭkach». Mienavita tak nazyvajecca vystava, jakuju možna naviedać u Haradskoj ratušy.
Tut ekspanujecca kalekcyja z pryvatnaha zboru i paštoŭki z fondaŭ Litaraturnaha muzieja Maksima Bahdanoviča. Stračanyja budynki i źnikłyja vulicy paŭstajuć na paštovych kartkach, vydadzienych u Minsku i na abšarach Rasijskaj i Hiermanskaj impieryi ŭ 1900—1918 hadach.
Kadry zachavali źmieny ŭ haradskim asiarodździ, jakoje imkliva źmianiałasia na sutyku epoch: linii konnaj čyhunki i telefonnaja stancyja, pieršyja aŭtamabili susiedničajuć z zaprežanymi vazami, raźvity čyhunačny transpart. Usie hetyja detali dazvalajuć akunucca ŭ sapraŭdnuju atmaśfieru hubiernskaha horada pačatku XX stahodździa.
Vosieńskija chałady prahnali navat zamorskich ptušak, nie toje što vužykaŭ, vožykaŭ i vaviorak z parkaŭ. Ale mahčymaść pahladzieć na roznych žyviołak zaŭsiody jość.
Pierachodzim most praź Śvisłač i ruchajemsia ŭ bok Trajeckaha pradmieścia. Na Bahdanoviča 9A, u vystavačnaj zale Muzieja pryrody i ekałohii prachodzić vystaŭka žyvych paŭzunoŭ «Reptylii». U ekspazicyi pradstaŭlenyja baradatyja ahamy, žaby-rahatki, eŭblafary, šmatlikija źmiei, dziŭny i zahadkavy vasilisk šlemanosny i mnohaje inšaje. Raznastajnyja pradstaŭniki Azii, Afryki i Amieryki, jarkija i ekzatyčnyja, uraziać vas svaim vyhladam i zvyčkami. Vy zmožacie panazirać za nasielnikami džunhlaŭ i pustyni, palubavacca ich zhrabnaściu.
Adpraŭlajemsia dalej, da praśpiekta Mašerava 11/2. Tut Aleś Rodzin schavaŭ skradzienaje natchnieńnie. Vystava ź vielmi cikavaj historyjaj: dziesiać hadoŭ prajekt žyvapisu biełaruskaha mastaka Alesia Rodzina «Hłabalnaje paciapleńnie» prachodziŭ u znakamitym Centry mastactvaŭ «Tachieles» u Bierlinie, jaho naviedali bolš za miljon amataraŭ mastactva z usiaho śvietu.
U 2010 usiu vystaŭku z 97 karcin zachapiła achoŭnaja słužba, naniataja hamburhskim Nord Bankam, i amal hod jana znachodzilisia pad pahrozaj źniščeńnia. Tolki dziakujučy ŭmiašańniu presy i padtrymcy jeŭrapiejskaj hramadskaści karciny vyratavali.
Pa rašeńni Dziaržaŭnaha suda Bierlina tvory byli viernutyja mastaku Alesiu Rodzinu. Paśla restaŭracyi karcin vystava «Skradzienaje natchnieńnie» demanstrujecca ŭ art-prastory «Fabryka». Padčas vystavy projduć kancerty, instrumientalnyja viečaryny, elektronnyja sety, hutarki z mastakom i šmat čaho inšaha.
I naprykancy našaha špacyru — vystava-prodaž rabot maładych mastakoŭ Biełarusi «Vosieński sałon».
Prajekt pravodzicca ŭ stalicy kožnuju vosień, pačynajučy z 2015 hoda. Užo vośmy raz maładyja aŭtary pradstaŭlajuć tvory, stvoranyja ŭ roznych vidach vyjaŭlenčaha mastactva za apošnija try hady: žyvapis, hrafiku, fatazdymki, skulpturu, dekaratyŭna-prykładnoje mastactva, instalacyju i videa-art.
Pałac mastactvaŭ na Kazłova, 3 čakaje ŭsich, kab prademanstravać bolš za 430 rabot mastakoŭ ź Minska, Bresta, Homiela, Žłobina, Navapołacka, Połacka, Babrujska, Mazyra i inšych haradoŭ Biełarusi. Usiaho ŭ prajekcie biaruć udzieł 246 aŭtaraŭ va ŭzroście 18-40 hadoŭ, čyje tvory adabranyja prafiesijnym žury z rabot 789 pretendentaŭ.
U ramkach prajekta pradstaŭlenaja nasyčanaja kulturnaja prahrama (lekcyi, ekskursii i majstar-kłasy).
