Fota: belarusfashionweek / vk.com

Fota: belarusfashionweek / vk.com

Infarmacyju ab admienie Belarus Fashion Week, jakaja miełasia prajści 7—9 kastryčnika, paćvierdzili ŭ sacsietkach arhanizatary. Jany patłumačyli, što impreza nie adbudziecca «pa techničnych pryčynach».

«My prykłali maksimum namahańniaŭ, kab vyrašyć pytańni, jakija ŭźnikli, ale, na žal, nie zmahli paŭpłyvać na situacyju», — havorycca ŭ paviedamleńni. 

Napiaredadni ŭ dziaržaŭnaj haziecie «SB — Biełaruś siehodnia» źjaviłasia publikacyja, jakaja raspaviadaje pra «Biełaruski tydzień mody». Aŭtar kałonki, prapahandyst Raman Rudź abvinavaciŭ niekatorych biełaruskich kuciurje ŭ tym, što ŭ 2020 hodzie jany «raptam adkłali ŭ bok nažnicy i nitki ź ihołkami, z raźbiehu akunuŭšysia ŭ «revalucyjnuju smutu». 

«Ćviardzili ab palicejskaj samaŭpraŭnaści i hvałcie, łajali vybary i žadali ŭsiakaha niadobraha lidaru krainy. A taksama pikietavali na prystupkach Doma madelaŭ, vystrojvalisia ŭ łancuhi ŭzdoŭž praśpiekta, skandavali łozunhi, razmachvali płakacikami i bčb-ściahami», — apisvaje Rudź «hrachi». 

Siarod «udzielnikaŭ niezakonnych pierformansaŭ» aŭtar nazvaŭ kiraŭnika tydniaŭ mody Janinu Hančarovu, dyzajniera Ivana Ajtpłatava, modnuju ekśpiertku Volhu Žadziejevu i inšych.

Prapahandyst taksama zadaŭsia pytańniem, čamu modnaja industryja ŭ krainie «addadzienaja na vodkup vyklučna pryvatnikam».

«Junamu dyzajnieru amal niama kudy padacca, akramia jak na podyum hetaha šou, jakoje ŭ adzin nieščaślivy momant znoŭ moža pierafarbavacca ŭ bieła-čyrvona-biełyja kolery», — piša Rudź. 

«Jość ža ŭ nas Nacyjanalnaja škoła pryhažości. Joj by i šviejnuju mašynku ŭ ruki razam sa spadarožnymi prajektami. Darečy, raniej hetaja arhanizacyja pravodziła papularny «Minski tydzień mody», a ŭ nastupnym hodzie, nakolki ja čuŭ, płanuje ŭznavić hetaje mierapryjemstva», — dadaje prapahandyst.

Biełaruski tydzień mody (Belarus Fashion Week) — mižnarodnaje mierapryjemstva dla papularyzacyi dyzajnierskaha adzieńnia ŭ Biełarusi. Jano pravodzicca z 2011 hoda i źbiraje vytvorcaŭ, zakupščykaŭ, madeljeraŭ i dyzajnieraŭ dla naładžvańnia prafiesijnych suviaziej, abmierkavańnia supracoŭnictva, prezientacyi svajoj dziejnaści i raźvićcia modnaj industryi. U hetym hodzie Belarus Fashion Week pavinien byŭ prajści na kinastudyi «Biełaruśfilm» z 7 pa 9 kastryčnika.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?