Svoj videazvarot Alaksiej Reźnikaŭ zapisaŭ na ruskaj movie.
«Heta pasłańnie z Kijeva. Mianie zavuć Alaksiej Reźnikaŭ. Ja — ministr abarony Ukrainy. Ja źviartajusia da sałdat i matrosaŭ, siaržantaŭ i staršyn, mičmanaŭ, aficeraŭ, hienierałaŭ i admirałaŭ rasijskaj armii. Ja nie ahavaryŭsia. Mienavita rasijskaj armii. U pieršuju čarhu maje słovy adrasavanyja aficeram i kamandavańniu. Tamu što vam prymać rašeńni».
Reźnikaŭ staranna padabranymi słovami apisvaje rasijskim vajskoŭcam toje niezajzdrosnaje stanovišča, u jakim jany apynulisia.
«Vašy desantniki ciapier hinuć na pravym bierazie Dniapra. Jany viedajuć svaju spravu. Ale chtości ŭ Kramli vyrašyŭ adpravić ich na dakładnuju śmierć», — zajaviŭ jon.
«Dzie vaš desant? Vy viedajecie. Tam ža, dzie vaša marskaja piachota. Na mohiłkach», — kaža Reźnikaŭ.
Jon davodzić, što rasijskuju armiju «ašukali». «Vam abiacali lohki špacyr, a adpravili ŭ pastku. Vy płacicie kryvioj za niečyja fantazii i łžyvyja mety».
Jon tłumačyć, čamu rasijskaje kamandavańnie nie spynić vajnu.
«Ciapier vas nie słuchajuć. Tamu što pasłuchać vas ciapier — značyć, pryznać pamyłki. A ŭ Maskvie nie lubiać praŭdu. Im praściej raskazać, jak vy pa-hierojsku zahinuli ŭ bitvie z vydumanymi połčyščami NATA», — kaža jon.
Reźnikaŭ supraćstaŭlaje Zialenskaha, jaki znachodzicca pobač sa svaim vojskam, i Pucina.
«Mnohija z vas užo zrazumieli — vas adpravili pamirać nie za spraviadlivuju spravu. Moža tamu vaš [prezident] chavajecca ŭ bunkiery, a nie trymaje ŭdar pobač z vami? Jon baicca vašaha praśviatleńnia, pahardy i vašaha spraviadlivaha hnievu».
Reźnikaŭ padkreśliŭ, što rasijskija vajskoŭcy nikoha nie «vyzvalajuć» va Ukrainie, a źniščajuć cełyja harady, dzie zusim niadaŭna ich ličyli dobrymi susiedziami i razmaŭlali pa-rusku. A ciapier pasiejanaja varožaść na pakaleńni napierad.
Ministr zadaŭ rytaryčnaje pytańnie: kim uvojduć u historyju tyja, chto pryjšoŭ vajavać va Ukrainu: «Jak tyja, chto vajavaŭ pad adnym ściaham z zekami? Vy i zastanieciesia ŭ pamiaci jak złodziei, hvałtaŭniki i zabojcy».
Jon raspavioŭ, što budzie dalej.
«Tysiačy rasijskich chłopcaŭ zahinuć. Jašče bolš zastaniecca biez ruk, biez noh. Ale ich zhańbiać. A vas zrobiać vinavatymi. I znoŭ zdradziać. Jak užo zdradžvali nie raz», — zajaviŭ Reźnikaŭ.
Pavodle jaho słoŭ, rasijskaje kamandavańnie ŭžo razumieje, što trapiła «ŭ pastku z vajnoj», i zrobić usio, kab śpisać «svaje praliki, svoj kradziež» na padnačalenych.
«Paśla vajny mienavita vy budziecie hladzieć u vočy kalekam, udovam i sirotam vašych sałdat. Bo nichto z Kramla da ich nie vyjdzie. Vam daviadziecca žyć pobač z tymi, chto ciapier natoŭpam uciakaje ad mabilizacyi ŭ Finlandyju, Hruziju, Kazachstan i navat Manholiju. I jany buduć upeŭnienyja, što pastupili pravilna», — padkreślivaje ministr.
Reźnikaŭ zajaviŭ, što ŭkraincam nie patrebnaja rasijskaja ziamla, im dastatkova svajoj.
«My harantujem žyćcio, biaśpieku i spraviadlivaść usim, chto admovicca vajavać nieadkładna. I my damožamsia trybunała dla tych, chto addavaŭ złačynnyja zahady. Vy jašče možacie vyratavać Rasiju ad trahiedyi, a rasijskaje vojska — ad prynižeńnia. Ale čas sychodzić. Nie ŭpuścicie jaho».