Što tam na siońnia važnaha ŭ Biełarusi i śviecie?
Kali vieryć BiełTA i «Sovietskoj Biełoruśsii», hałoŭnaja navina — heta zaŭsiody Alaksandr Łukašenka. Tut ža i Natalla Kačanava z novymi banalnaściami, a taksama Pakroŭski pravasłaŭny fiestyval.
Siarod hałoŭnych navin na BiełTA, «Sovietskoj Biełoruśsii» i «Źviaździe» ŭdaru pa Krymskim moście, jaki ŭ śviecie aceńvajuć jak novy pavarotny momant u vajnie Rasii suprać Ukrainy, niama.
Tolki sajt ANT addaje hetamu zdareńniu hałoŭnuju pałasu.
U vialikim materyjale telekanała na padzieju hladziać rasijskimi vačyma. Pryvodziacca mierkavańni tolki rasijskich ekśpiertaŭ, ukrainskim słova nie dajuć.
U materyjale nie zhadvajecca, što Ukraina i suśvietnaja supolnaść ličać Krym niezakonna anieksavanaj častkaj Ukrainy i što Krymski most — adna z hałoŭnych arteryj zabieśpiačeńnia rasijskaj armii, što sprabuje zachapić Ukrainu.
«Žachlivy i sam fakt teraktu, i bluźnierskaja i biespryncypovaja reakcyja šerahu zachodnich palitykaŭ», — kaža łukašenkaŭski kanał.
Ni adzin łukašenkaŭski ŚMI nie paviedamlaje pra rasijskija abstreły Charkava i Zaparožža.
Infarmacyja ahienctva BiełTA pra padryŭ mosta abmiažoŭvajecca paviedamleńniem z šaści skazaŭ sa spasyłkaj na RIA «Novosti».
U inšym artykule dnia BiełTA piša pra «vialikuju kolkaść NATAŭskaj techniki kala hranic Chiersonskaj vobłaści», razhladajučy hety rehijon jak rasijski.
A prahrama «Kłub redaktaraŭ» na Biełaruś-1 była pryśviečanaja asudžeńniu i vyśmiejvańniu prezidenta Zialenskaha.
Takim čynam, i paśla pravału rasijskaha blickryha i pačatku kontrnastupu Ukrainy Minsk praciahvaje stajać na pazicyjach rasčlanieńnia Ukrainy i admaŭleńnia jaje suvierenitetu i terytaryjalnaj cełasnaści.
