Ranicaj 10 kastryčnika Alaksandr Łukašenka pravioŭ naradu ź biełaruskimi vajskoŭcami i siłavikami. Na joj jon abviaściŭ ab damoŭlenaści z prezidentam Rasii Uładzimiram Pucinym razharnuć rehijanalnuju hrupoŭku vojskaŭ. Hety praces, pavodle jaho słoŭ, idzie ŭžo dva dni, u Biełaruś prybudzie «nie adna tysiača» rasijskich sałdat. Dla čaho?
Farmalnaja nahoda ŭvieści rasijskija vojski?
Biełaruski vajskovy ekśpiert Alaksandr Alesin ličyć, što razhortvańnie sumiesnaj hrupoŭki — heta miera vajskovaj demanstracyi Pucina. Takim čynam Rasija sprabuje napałochać Ukrainu, adciahnuć jaje, adciahnuć vajskovyja čaści z Danbasa, dzie jana maje pieravahu ŭ kolkaści vojskaŭ, na miažu ź Biełaruśsiu.
«Padziei va Ukrainie raźvivajucca nie vielmi spryjalna dla Rasijskaj Fiederacyi. Vidavočna, što Pucin abaviazany raspačać jarkija dziejańni, jakija atrymajuć adlustravańnie ŭ infarmacyjnym poli i naściarožać mnohich», — kaža Alesin.
U Ryhora Nižnikava, ekśpierta Finskaha instytuta mižnarodnych adnosin, inšaje mierkavańnie. Jon ličyć, što rasijskaja armija rychtuje dla siabie płacdarm i razhortvańnie rehijanalnaj hrupoŭki — heta farmalnaja nahoda, kab znoŭ uvieści ŭ Biełaruś svaje vojski, jak heta było padčas vučeńniaŭ napiaredadni ŭvarvańnia va Ukrainu.
«Pucin idzie va-bank. Dumaju, patencyjna jamu moža spatrebicca druhi front, i Łukašenka ciapier vykonvaje toje, pra što Pucin prasiŭ jaho tydzień tamu ŭ Sočy. Ci budzie novaje ŭvarvańnie rasijskich vojskaŭ praź Biełaruś? Dumaju, heta pytańnie času. U lubym vypadku, užo ciapier heta stvoryć napružanaść na biełaruska-ŭkrainskaj miažy».
Na dumku litoŭskaha vajskovaha eksperta Darusa Antanajcisa, trymać hrupoŭku vojskaŭ u inšaj krainie «tolki dla zastrašvańnia» vielmi doraha, i «nichto tak nie robić, asabliva kali idzie vajna».
«Łukašenka zajaviŭ, što hetaja hrupoŭka razhortvajecca z-za napružanaj situacyi la zachodnich miežaŭ. Mnie zdajecca, heta ŭsio robicca dla advodu vačej, kab skazać biełaruskamu narodu: «Hladzicie, NATA choča napaści na nas». U rečaisnaści, ja dumaju, hrupoŭka razhortvajecca dla taho, kab napaści na Ukrainu jašče z adnaho frontu, jak heta było ŭ pačatku vajny — praz Čarnobyl znoŭ sprabavać dabracca da Kijeva.
Što za rehijanalnaja hrupoŭka vojskaŭ?
Razhortvańnie rehijanalnaj hrupoŭki vojskaŭ praduhledžana damovaj ab «Sajuznaj dziaržavie». Pa słovach Alesina, praces adpracoŭvaŭsia na vučeńniach kožnyja čatyry hady, pačynajučy z 2009-ha: jak na terytoryju Biełarusi pavinny prybyvać rasijskija vojski, razhružacca ŭ miescach raskvataravańnia.
«Zatym pravodzilisia vučeńni, jakija malavali patencyjny vajenny kanflikt. Paśla hetaha rasijskija čaści vyvodzilisia na svaju terytoryju. Hetaja lehienda vučeńniaŭ paŭtarałasia až da apošnich hadoŭ. Miarkujučy pa ŭsim, ciapier hetaja hrupoŭka budzie zadziejničanaja jak realnaja», — kaža Alaksandr Alesin.
Pa słovach Alesina, kamandavać rasijskimi vojskami, jakija prybuduć u Biełaruś, buduć biełaruskija hienierały.
«Ci sam ministr abarony, ci načalnik biełaruskaha Hienštaba. Zhodna z pałažeńniem, rasijskaja častka sumiesnaj hrupoŭki pastupaje na ŭzmacnieńnie biełaruskaj armii. Choć, dumaju, paradak jaje vykarystańnia Łukašenka budzie ŭzhadniać z Pucinym».
Alaksandr Alesin miarkuje, što ŭ hetych čaściach budzie šmat sałdat terminovaj słužby, jakich, zhodna z ukazam Pucina, zabaroniena vykarystoŭvać u zonie bajavych dziejańniaŭ va Ukrainie. Ryhor Nižnikaŭ miarkuje, što ŭ Biełaruś mohuć pierakinuć častku mabilizavanych rasijan.
Tolki abarona — i nijakaha napadu?
Pa słovach Alaksandra Alesina, razhortvańnie sumiesnaj hrupoŭki vojskaŭ nakiravana tolki na abarončyja dziejańni. Vučeńni ŭ lutym 2022-ha hoda, paśla jakich rasijskija vojski ŭvarvalisia va Ukrainu z terytoryi Biełarusi, taksama nie mierkavali napadu. Ale heta nie pieraškodziła rasijskaj armii ŭvarvacca ŭ susiedniuju krainu. U čym roźnica ciapier?
«Hetyja vučeńni byli pazačarhovyja, nijakimi mižnarodnymi damovami jany nie praduhledžvalisia. U preambule da ich było napisana, što hetaja miera — adkaz na dziejańni susiedziaŭ-partnioraŭ, a ciapier — patencyjnych praciŭnikaŭ. Tady ŭ dziejańniach rasijskaha kiraŭnictva byŭ typovy valuntaryzm», — kaža ekśpiert.
Alesin upeŭnieny, što rasijskija vojski nie stanuć znoŭ napadać na Ukrainu z terytoryi Biełarusi. I voś čamu: «Charaktar miascovaści i pryrodna-klimatyčnyja ŭmovy nie dazvalajuć užyvać bujnyja masy vojskaŭ i stvarać udarnyja hrupoŭki na miažy Biełarusi i Ukrainy. Bo tam bałoty, pojmy rek, kałasalnaja kolkaść azior. Nastupajučyja mohuć ruchacca tolki pa niekalkich darohach, jakija viadomyja i, napeŭna, užo zaminiravanyja, a masty — uzarvanyja».
Varyjant, jaki rasijanie vykarystoŭvali spačatku, — «pierakidańnie pavietrana-desantnych vojskaŭ viertalotami ŭ rajony Hastomiela, Kijeva, Čarnobyla — naŭrad ci stanuć užyvać jašče raz. A suchaputnym šlacham prajści takuju adlehłaść niemahčyma», ličyć Alesin.
Ci ŭstupić biełaruskaja armija ŭ vajnu suprać Ukrainy?
Ekśpiert Ryhor Nižnikaŭ ličyć, što biełaruskaja armija naŭrad ci paŭnavartasna ŭstupić u vajnu suprać Ukrainy:
«Dumaju, heta jakraz adna sa słabaściaŭ Łukašenki: jon nikoli nie daviaraŭ biełaruskamu hienieralitetu, pakolki jon vielmi prarasijski. Mienavita tamu armija zaŭsiody była niedafinansavanaja i niedazabiaśpiečanaja, jon sprabavaŭ trymać jaje ŭ baku ad lubych pracesaŭ. Dumaju, častka hienieralitetu stoadsotkava staić na pazicyjach Maskvy».
U toj ža čas jon padkreślivaje, što «bolšaść u biełaruskim vojsku padzialajuć punkt hledžańnia biełaruskaha hramadstva, što hetaja vajna im nie patrebnaja. Kali Łukašenka addaść zahad uvieści vojski, hetyja ludzi albo raźbiahucca, albo — čaho jon baicca — mohuć paviarnuć zbroju suprać jaho, tamu što nichto nie choča pamirać za Pucina. Jon vydatna ŭśviedamlaje heta, i tamu takoha zahadu, ja dumaju, nie budzie».
A voś Darus Antanajcis nie vyklučaje, što heta moža adbycca:
«Rasii patrebnyja vajskoŭcy, jakija ŭžo vałodajuć zbrojaj, jakich nie treba pieravučvać dva-try miesiacy, kab jany choć niejak mahli vajavać. Dla Pucina biełaruskaje vojska pavialičyć cisk na Kijeŭ, kab jon adkryŭ druhi front dla abarony svajoj krainy».
Čytajcie taksama:
Łukašenka: U Biełarusi buduć raźmieščanyja rasijskija vojski. «Heta budzie nie adna tysiača čałaviek»
Łukašenka: My pačynajem zadziejničać hrupoŭku Sajuznaj dziaržavy
