Fota: Minabarony
Jak paviedamili «Našaj Nivie» niekalki nie źviazanych pamiž saboj krynic, u Biełarusi pryniata rašeńnie ab mabilizacyi. Kolkaści ludziej, jakich płanujuć mabilizavać, my pakul nie viedajem.
Alaksandr Łukašenka pryniaŭ rašeńnie nie zajaŭlać pra mabilizacyju publična. Heta było zroblena z ulikam nastupstvaŭ takoha rašeńnia ŭ Rasii. «Schavanaja mabilizacyja» budzie prachodzić pad vyhladam pravierki bajazdolnaści čaściej i vykliku vajenaabaviazanych na zbory, jakija ŭ narodzie viadomyja jak «nabor u partyzany».
Pra mety mabilizacyi možna budzie mierkavać, viedajučy ličbu nabiranych.
«Nabor da 2000 čałaviek havaryŭ by pra daŭkamplektacyju asobnych čaściej pad vuzkija bajavyja zadačy, naprykład, artyleryjskija», — skazaŭ «Našaj Nivie» aficer Uzbrojenych sił Biełarusi.
«Tryvohu treba budzie bić, kali ličba mabilizavanych pieravalić za piać tysiač. Heta budzie aznačać stvareńnie ŭdarnaj hrupoŭki na niejkim kirunku. Kali pieravalić za 10 tysiač — niekalki hrupovak», — dadaje surazmoŭca.
«Našaj Nivie» dakładna viadoma, što pakul pozvy atrymlivajuć tolki žychary nievialikich rajonaŭ Biełarusi. Vialikija harady pieršaja chvala «schavanaj mabilizacyi» pakul nie zakranaje.
«Najbolšaja ŭstanoŭka na tyja vajenna-ŭlikovyja śpiecyjalnaści, jakich deficyt u rasijskaj armii», — kažuć nam abaznanyja krynicy.
Adna z krynic kaža, što «na zbory» vyklikajuć kiroŭcaŭ. Inšaja — «kucharaŭ, kiroŭcaŭ, techničny i tyłavy piersanał». Mahčyma, havorka idzie pra nabor na pieršym etapie taho absłuhoŭvajučaha piersanału, jaki zmoža zabiaśpiečyć padrychtoŭku samich mabilizavanych i techniki dla ich.
«Z 12 kastryčnika pa 12 listapada vajskovyja kamisaryjaty pravodziać źvierku ŭlikovych dadzienych ź miascovymi rasparadžalna-vykanaŭčymi orhanami i pradpryjemstvami», — heta ŭžo publična kažuć u efiry prapahandysckich ŚMI vajenkamy. Raniej takija źvierki adnamomantna nie pravodzilisia.
Tłumačeńnie, čamu spatrebiłasia mabilizacyja, čytajcie tut: Krynicy ŭ armii patłumačyli, ci moža Łukašenka adpravić vojski va Ukrainu
Publična Alaksandr Łukašenka, a za im i hienierały zajaŭlajuć, što Biełaruś ustupić u vajnu tolki ŭ vypadku napadu na jaje terytoryju. Adnačasova prapahanda prahramuje siłavikoŭ i nasielnictva, što taki napad z boku Ukrainy, maŭlaŭ, abaviazkova adbudziecca, bo da hetaha nibyta ŭłady Ukrainy padšturchoŭvaje Zachad.
Pry hetym Alaksandr Łukašenka zajaviŭ, što ŭ Biełaruś prybudzie «nie adna tysiača» ruskich sałdat, i pryznaŭ udzieł Biełarusi ŭ «śpiecyjalnaj vajennaj apieracyi», što robić našu krainu lehitymnaj cellu dla ŭzmacniełaj ukrainskaj armii.
Raniej krynicy «Našaj Nivy» paviedamlali, što na biełaruskija palihony čakajecca prybyćcio značnaj kolkaści rasijskich mabilizavanych.
«Pa majoj infarmacyi, idzie padrychtoŭka dla pryniaćcia rasijskich mabilizavanych na biełaruskich palihonach, vučebnych centrach i vajskovych čaściach. U nas jość i miescy dla trenirovak, i instruktary. Mahčyma, Rasija patrabuje ad Łukašenki, kab navučańnie častki mabilizavanych rasijskich vajskoŭcaŭ prachodziła ŭ Biełarusi i pravodzili jaho biełaruskija siłaviki», — vykazvaŭ raniej mierkavańnie adzin z našych surazmoŭcaŭ.
Inšyja surazmoŭcy źviartajuć uvahu na pavietranyja ŭdary z pavietranaj prastory Biełarusi i sprobu zachapić Kijeŭ i poŭnač Ukrainy ŭ lutym 2022 hoda, jakaja była zroblenaja z terytoryi našaj krainy.
«Ukraincy majuć usie padstavy nie dapuścić druhoha pachodu na Kijeŭ, jaki, miarkujučy pa ŭskosnych prykmietach, moža ciapier rychtavacca. U toj ža čas luby previentyŭny ŭdar pa ruskich u Biełarusi moža być interpretavany jak napad na Biełaruś», — kaža naš surazmoŭca.
Pierad napadam Rasii Alaksandr Łukašenka prahnazavaŭ, što vajna skončycca pieramohaj ruskich «za try-čatyry dni». Pravał Rasii na pieršym etapie vajny staŭ niečakanaściu dla łukašenkaŭcaŭ. Prapahanda Minska praciahvała havaryć pra niepaźbiežnaść pieramohi Rasii i aśviatlała padziei ŭ tym ža duchu, što i rasijski aficyjoz. Sam Łukašenka nie raz kazaŭ, što «Rasija nie moža prajhrać». A biełaruskaja raźviedka, miarkujučy pa ŭsim, nie čakała i taho, što ŭkraincy piarojduć u kontrnastup na poŭdni.
U Minsku ŭsio jašče vierać, što pieramoha budzie za «sajuznaj dziaržavaj Biełarusi i Rasii». Kiraŭnik Kamiteta dziaržaŭnaj biaśpieki Ivan Cierciel u niadaŭnim vystupie pierad supracoŭnikami BiełAZa navat kankretyzavaŭ daty pačatku «pierałomu» — listapad 2022-ha. Kali schavanaja mabilizacyja pačniecca zaraz, to akurat da siaredziny listapada jana budzie skončanaja.
* * *
Viedajecie važnaje, viedajecie bolš? Pišycie nam u telehram-bot @nasa_niva_bot. Albo — asabista tym žurnalistam i redaktaram «Našaj Nivy», jakich vy viedajecie i jakim daviarajecie (lepš — u sihnał ci telehram).
Z našaha boku hetyja miesiendžary abaronienyja. Ale pilnujciesia, kab u vas samich stajała padvojnaja aŭtentyfikacyja i aŭtamatyčnaje vydaleńnie.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Łukašenka ŭpieršyniu pryznaŭ udzieł Biełarusi ŭ vajnie va Ukrainie
Łukašenka: Mabilizacyi nie budzie, budzie pravierka reziervistaŭ
voś i mnie niechta namiaknuŭ u kamientach, što nam zastałosia niadoŭha... miesiacy 2... vypadała jak raz na listapad... niešta kiepskaje rychtujuć (