Pra heta paviedamlaje Washington Post sa spasyłkaj na ananimnych amierykanskich čynoŭnikaŭ.

U pačatku kastryčnika hazieta pisała, što adzin ź ludziej z najbližejšaha atačeńnia Uładzimira Pucina naŭprost skazaŭ rasijskamu prezidentu na pamyłki i niaŭdačy ŭ vajnie va Ukrainie. Zaraz Washington Post udakładniła, što havorka išła mienavita pra Pryhožyna.

Biznesoviec paskardziŭsia, što rasijskaje Minabarony zanadta mocna spadziajecca na «PVK Vahniera», ale nie daje nieabchodnaj finansavaj padtrymki i resursaŭ dla vykanańnia bajavych zadač, havorycca ŭ dakładzie amierykanskaj raźviedki, jaki cytuje Washington Post.

Pryhožyn užo krytykavaŭ kiraŭnictva rasijskaj armii publična. Adnak amierykanskija čynoŭniki źviarnuli ŭvahu na toje, što Pryhožyn adčuvaŭ siabie kamfortna, vykazvajučy rezki paprok u adras rasijskich vajskoŭcaŭ asabista Uładzimiru Pucinu, znachodziačysia ŭ pryvatnaj abstanoŭcy. Heta pakazvaje, jak raście jaho ŭpłyŭ na fonie vajennych paražeńniaŭ Rasii, adznačaje hazieta.

«Taja palityčnaja publičnaja pazicyja, jakuju jon zajmaje: ja — Jaŭhien Pryhožyn. Ja tut, kab skazać vam praŭdu, i ja vykanaju svaju pracu», — skazaŭ amierykanski čynoŭnik na ŭmovach ananimnaści.

Amierykanskaja raźviedka miarkuje, što niadaŭniaja publikacyja Pryhožyna ŭ sacsietkach videa, na jakim bajcy «PVK Vahniera» skardziacca na niedachop ježy, źviazanaja z žadańniem akazać cisk na Kreml dla pavieličeńnia finansavańnia.

U zajavie Pryhožyna dla Washington Post, zroblenym praz pres-słužbu jaho kampanii «Kankord», havorycca, što biznesmen nie razmaŭlaŭ z Pucinym u apošni čas i nie płanuje heta zrabić u bližejšy čas. «Ja nie krytykavaŭ kiraŭnictva US RF padčas kanfliktu va Ukrainie. Tamu ničoha kamientavać nie mahu», — skazaŭ jon, dadaŭšy, što nie maje prava krytykavać ci chvalić pracu Uzbrojenych sił Rasii, tak jak nie źjaŭlajecca vajennym ekśpiertam.

Pryhožyn taksama skazaŭ, što nie bačyŭ videa, na jakim bajcy «Vahniera» skardziacca na prablemy z praduktami.

Pres-sakratar prezidenta Rasii Dźmitryj Piaskoŭ admoviŭsia kamientavać infarmacyju ab razmovie Pryhožyna i Pucina.

U asobnym punkcie dakładu amierykanskaj raźviedki adznačajecca napružanaść pamiž Pryhožynym i ministram abarony Rasii Siarhiejem Šajhu.

Usio bolš zaŭvažnaja publičnaja rola ŭ vajennych dziejańniach takich fihur, jak Pryhožyn i Ramzan Kadyraŭ, jakaja razdražniaje niekatorych rasijskich palitykaŭ, skazaŭ WP rasijski čynoŭnik na ŭmovach ananimnaści. U ich bačać ašukancaŭ, jakija hulajuć pa svaich praviłach. «Heta nie Rasija. Heta złačynnaje bractva, zasnavanaje na pryncypach Siaredniaviečča», — adznačyŭ jon.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?