Vajennyja mašyny chutkaj dapamohi i vajennaja technika kala Mazyrskaj haradskoj balnicy, 28 lutaha 2022 hoda. Fota: Radyjo Svaboda.
Doktar Andrej (imia źmienienaje) płanavaŭ ucioki ź Biełarusi z 2020 hoda. Kali Rasija raspačała vajnu suprać Ukrainy, pytańnie stała jašče bolš aktualnym.
Andrej byŭ vymušany lačyć rasijskich vajskoŭcaŭ, paranienych u vyniku ahresii suprać Ukrainy. Jon vyrašyŭ, što pryjšoŭ čas źjechać.
Andreju spatrebilisia miesiacy, kab znajści najlepšy maršrut. Z paradami jamu dapamahli hramadskija arhanizacyi i biełaruskaja dyjaspara za miažoj.
Pavodle raskazaŭ biełaruskaha miedyka, Mazyr u lutym nahadvaŭ vajennuju bazu. Pa vulicach katałasia rasijskaja vajennaja technika, pa miascovych kramach i barach badzialisia rasijskija vajskoŭcy.
Nieŭzabavie Andrej pačaŭ padazravać, što Rasija rychtujecca da vajny. Vajskovyja vučeńni pavinny byli zaviaršycca 20 lutaha, ale Andrej skazaŭ, što administracyja jaho špitala praciahnuła zahad ab biaspłatnym lačeńni rasijskich sałdat da 10 sakavika.
«Jany, vidać, dumali, što da taho času vajna skončycca», — skazaŭ doktar, dadaŭšy, što za pieršyja dni vajny rasijanie vykarystali ŭsiu najaŭnuju ŭ horadzie kroŭ dla pieralivańnia.
Ranicaj 24 lutaha, u pieršy dzień bajavych dziejańniaŭ, daktaroŭ sabrali ŭ pakoi dla narad, zahadali im pakinuć 250 łožkaŭ dla rasijan, spynić usie zapłanavanyja apieracyi i adpravić biełaruskich pacyjentaŭ, jakich tolki mahli, dadomu.
«Tady nas papiaredzili, što my nie majem prava raspaŭsiudžvać infarmacyju pra rasijskich vajskoŭcaŭ. Nam pryjšłosia dać padpisku ab nierazhałošvańni, było zabaroniena pieradavać lubyja fatahrafii, dakumienty», — raspavioŭ Andrej.
Doktar skazaŭ, što zaŭvažyŭ miascovych supracoŭnikaŭ KDB, jakija chadzili pa kalidorach špitala.
Ułady Mazyra prykłali šmat namahańniaŭ, kab zachavać infarmacyju pra kolkaść paranienych rasijskich vajskoŭcaŭ i typy traŭmaŭ, jakija jany atrymali. Ale Andreju ŭdałosia tajemna skapijavać renthienaŭskija zdymki dziasiatkaŭ vajskoŭcaŭ, jakija lačylisia ŭ Mazyrskaj haradskoj balnicy.
«Toje, što ja ŭziaŭ z saboj, hetuju častku archiva, mahło vyklikać u mianie prablemy z sudom za špijanaž», — skazaŭ jon, dadaŭšy, što vyvoziŭ fłešku z dakumientami ŭ cacačnym telefonie dački.
Niekatoryja z kopij renthienaŭskich zdymkaŭ, jakija vyviez doktar. Krynica: CNN
Skany ŭklučali imiony i ŭzrost sałdat, mnohim ź jakich było ad 19 da 21 hoda.
Doktar raskazaŭ, što najbolšuju chvalu paranienych pryvieźli ŭ mazyrski špital u pieršyja hadziny 28 lutaha. Paśla zvanka ab prybyćci vajskoŭcaŭ lekary sabralisia la ŭvachoda ŭ reanimacyjnaje adździaleńnie i čakali. Nieŭzabavie pačali jechać aŭtobusy z paranienymi vajskoŭcami. Rasijskija sałdaty zanosili ich unutr na nasiłkach, kidajučy la ŭvachodnych dźviarej, raskazaŭ Andrej.
Lekary chutka acanili traŭmy sałdat, namalavaŭšy na ich iłbach ličby z pryjarytetnaściu, sartavali ich i adpraŭlali na apieracyju.
Rasijskija vajskoŭcy prybyvali z ranieńniami tvaru, składanymi pierałomami ad vybuchaŭ i abstrełaŭ.
U toj ža dzień miascovaje telebačańnie vypuściła siužet, u jakim śćviardžałasia, što špital pracuje ŭ zvyčajnym režymie.
Nasamreč špital byŭ zapoŭnieny sałdatami. U niekatorych adsutničali vočy, inšym patrabavałasia amputacyja. Jany prybyli z hanhrenaj, razdrobnienymi kaniečnaściami, niekatoryja byli paralizavanyja, adzin straciŭ častku mozhu, inšy — nižniuju skivicu. Niekatoryja ź ich na praciahu niekalkich dzion nasili žhuty, kab spynić kroŭ, ich cieły byli ŭsiejanyja kulami i askiepkami. Paranienych, jakija patrabavali apieracyi, było bolš, čym apieracyjnych stałoŭ.
Doktar zmoh sfatahrafavać kulu, jakuju dastaŭ z šyi paranienaha rasijskaha sałdata. Fota: CNN
Mnohija z rasiejcaŭ vajavali ŭ pamiežnych rajonach. Andrej skazaŭ, što lačyŭ rasijskich desantnikaŭ i śpiecnazaŭcaŭ, paciarpiełych padčas niaŭdałaha šturmu hastomielskaha aeradroma.
«Jany byli prafiesijnymi zabojcami. Treba było ich lačyć, heta była naša praca. Ja adčuvaŭ ahidu da ŭsiaho hetaha. Ale mnie, jak lekaru, nie dazvolena adčuvać ahidu», — skazaŭ jon.
Taksama ŭ mazyrskim špitali lačyŭsia rasijski hienierał-major Siarhiej Nyrkoŭ, jaki atrymaŭ ciažkuju traŭmu ŭ žyvot u Čarnobyli. Ale bolšaść paciarpiełych — maładyja, niedaśviedčanyja vajskoŭcy i sałdaty terminovaj słužby.
U pačatku sakavika ŭ Mazyrskuju haradskuju balnicu kožny dzień dastaŭlali ad 40 da 50 paciarpiełych rasijan, jak na kanviejery. Bolšaść ź ich prybyli ŭ ciomny čas sutak ci ranicaj na zialonych rasijskich vajskovych aŭtobusach i mašynach chutkaj dapamohi.
«Rasijanie taksama sprabavali dastavić zahinułych u balnicu, — skazaŭ jon i dadaŭ: — Jany nie viedali, što ź imi rabić».
U kancy sakavika Andrej, jak i jašče niekalki dziasiatkaŭ chirurhaŭ, byŭ zatrymany pa padazreńni ŭ karupcyi. Paŭtara miesiacy jon pravioŭ u turmie.
Ciapier Andrej pasialiŭsia ŭ inšaj jeŭrapiejskaj krainie sa svajoj siamjoj i bolš nie dumaje, ci mohuć jaho adpravić na vajnu sanitaram. Zamiest hetaha jon zasiarodziŭsia na zdačy nacyjanalnych miedycynskich ekzamienaŭ, kab znoŭ lačyć ludziej u novaj krainie.
