Chłopiec zalivaje haziroŭkaj Viečny ahoń u parku Žylibiera. Hrodna, 15 kastryčnika 2022 hoda. Skrynšot ź videa: Zvarotny bok / Telegram
Na minułym tydni praŭładny telehram-kanał, blizki da siłavikoŭ, paviedamiŭ, što ŭ Hrodnie zatrymali školnikaŭ 14 i 15 hadoŭ. Śćviardžajecca, što jany 15 kastryčnika pahasili haziroŭkaj Viečny ahoń na brackaj mahile savieckich vajskoŭcaŭ i partyzanaŭ u parku Žylibiera, a paśla nibyta vykłali ŭ internet videazapis. Dalej byccam by milicyjanty zaŭvažyli videa, zatrymali chłopcaŭ i źmiaścili ich u izalatar. Ale nasamreč usio było nie zusim tak.
Jak raspavioŭ «Biełsatu» znajomy siamji adnaho z zatrymanych, pieršapačatkova milicyja zabrała padletka z urokaŭ ranicaj 21 kastryčnika ŭ inšaj spravie: «Zabrali, bo ŭ ich niejkaja bojka z chłopcami adbyłasia, i jaho ŭziali, kab pakazańni ŭziać. Potym milicyjanty pačali praviarać telefon, i tam było hetaje videa».
Paźniej siłaviki pierasłali hetaje videa sabie, i ŭžo potym jano trapiła ŭ internet, ale sami padletki ničoha nie vykładali. U dopisie praŭładnaha telehram-kanała paznačana, što padletki nibyta sami vykłali videa ŭ internet: «Adzin ź ich zaliŭ napojem ahoń na brackaj mahile savieckich voinaŭ i partyzanaŭ, druhi źniaŭ na mabilnik i vykłaŭ u sietku».
Spačatku padletkaŭ dastavili ŭ RAUS Kastryčnickaha rajona z nahody bojki, a kali milicyjanty znajšli videa — zabylisia pra bojku i advieźli ich u RAUS Leninskaha rajona.
Da školnikaŭ paśpieli pryjechać baćki, jany prysutničali na dopycie razam z zatrymanymi chłopcami. Paśla dopytu baćki byli ŭpeŭnienyja, što dziaciej adpuściać dadomu, ale siłaviki vyrašyli zatrymać tych na 72 hadziny i pavieźli ŭ izalatar. U hety čas baćkam nie paviedamlali, jak pačuvajucca ich dzieci, nie davali źviazvacca ź imi. Tolki 24 kastryčnika patelefanavali i skazali, što vyrašyli aryštavać padletkaŭ na bolš doŭhi termin — da suda.
«Hetyja try dni my naohuł nie viedali, dzie i jak jany byli, ni telefona nie dali, ni advakataŭ, nikoha. Śledčy ničoha nie kazaŭ. Tolki potym, u paniadziełak, patelefanavali i skazali: «Pryjazdžajcie, budziem aryštoŭvać». Da hetaha naohuł nie viedali, što ź imi i dzie jany buduć», — raspaviadaje znajomy siamji.
Siłaviki, užo zatrymaŭšy padletkaŭ, vyrašyli zładzić ich pakazalnaje zatrymańnie ŭ škole. U praŭładnym telehram-kanale tady napisali: «Chajpažoram arhanizavali chvilinu słavy pa miescy vučoby. Školnikam raspaviali pra «podźvih» ich tavaryšaŭ i adkaznaść za padobnyja «prykoły». Viesieła i śmiešna ŭžo nikomu nie było».
«Usie ŭ šoku ad taho, što zładzili hetuju pakazuchu. Dziaciej jany nie pravučyli, a tolki bolš uzłavali. Dzieci ŭvieś dzień potym płakali chadzili, pieražyvali za chłopcaŭ», — dzielicca znajomy siamji.
Administracyja škoły ciapier taksama sprabuje dapamahčy zatrymanamu školniku.
Usiaho ŭ tym incydencie ŭdzielničali čatyry padletki, adnamu ź ich 13 hadoŭ — jon prachodzić u jakaści śviedki. U toj viečar chłopcy viartalisia z dyskateki, pa darozie zajšli ŭ kramu i paśla pajšli praz park, dzie i byŭ Viečny ahoń. Na apublikavanym videa bačna, što chłopcy spračajucca, ci mahčyma pahasić ahoń, apieratar padbuchtorvaje chłopca z butelkaj pasprabavać heta zrabić. Vykazvańniaŭ pra tych, kamu pryśviečany Viečny ahoń, na videa nie čuvać. Ci byŭ paškodžany Viečny ahoń haziroŭkaj, nie paviedamlajecca.
«Ja razumieju [žadańnie] pakarać, ale nie hetak ža. Jany ž navat nie ŭśviedamlajuć, nie zrazumieli, što hety ahoń aznačaje, i tołkam nie razumiejuć. Pobač išli i začapilisia za jaho, potym spałochalisia i ŭciakli. Ja nie apraŭdvaju, ale ž heta ŭsio pa duraści zrabili. Jany navat nie viedali i nie dumali, što jon moža patuchnuć, nie źbiralisia jaho tušyć. Navat spračalisia pamiž saboj, što jon nie moža patuchnuć», — kaža znajomy siamji.
Suprać zatrymanych raspačali kryminalnuju spravu za «złosnaje (hrupavoje) chulihanstva» — pavodle art. 339 KK RB. Pavodle častki 2 («hrupaj asob») školnikaŭ mohuć pakarać aryštam, abmiežavańniem voli na termin da dvuch hadoŭ abo pazbaŭleńniem voli na termin da troch hadoŭ. Adkaznaść za hety artykuł nastupaje z 14 hadoŭ.
Ciapier zatrymanyja zastajucca ŭ SIZA da suda. Rodnym kazali, što spravu buduć rasśledavać dva miesiacy, ale ź inšych krynicaŭ viadoma, što śledčyja buduć vieści jaje try miesiacy. «My ničoha nie viedajem pra heta. Što śledčyja źbirajucca vyśviatlać try miesiacy, niezrazumieła», — kamientuje znajomy siamji adnaho z chłopcaŭ.
Rodnyja ŭžo zmahli pieradać zatrymanym padletkam charčy i ciopłyja rečy, ale pahavaryć abo pabačycca ź imi da suda jany nie zmohuć.
Čytajcie taksama:
U hrodzienskaj škole zładzili pakazalnaje zatrymańnie padletkaŭ, jakija zalili Viečny ahoń
U Hrodnie školniki patušyli Viečny ahoń i źniali heta na videa
