Jašče da taho jak narviežcy apublikavali realnaje imia Mikušyna, The Insider i Bellingcat ličyli, što heta supracoŭnik HRU pa imieni Michaił. Psieŭdaprafiesar pakinuŭ dastatkova ličbavych śladoŭ dla takoj vysnovy. Tak, naprykład, parol, jaki jon vykarystaŭ dla svajho ŭniviersiteckaha akaŭnta, vykarystoŭvała jašče niekalki čałaviek — i siarod hetych akaŭntaŭ dva dakładna naležali jamu ž, pakolki ŭtrymlivali ŭ sabie jahonaje brazilskaje imia.
A voś inšyja dva byli cikavyja tym, što byli zarehistravanyja na rasijskich adrasach. Adzin — [email protected] — adsyłaŭ da brazilskaha sieryjała i, mabyć, taksama naležaŭ jamu, a druhi — [email protected] — davaŭ padkazku, što ŭładalnika zavuć Michaiłam. Invasor z partuhalskaj pierakładajecca jak «zachopnik» — Mikušynu dla vykryćcia brakavała tolki parašuta, jaki ciahniecca za śpinoj.
A kali raptam chtości nie zdahadajecca, što «zachopnik Michaił» — heta mienavita jon, Mikušyn, to jon vykarystoŭvaŭ i inšy parol… Jaki ŭtrymlivaŭ jahonaje proźvišča:
Miarkujučy pa ŭsim, email-akaŭnt mika-invasor Mikušyn vykarystoŭvaŭ užo vielmi daŭno, bo jon byŭ abrany jašče dla stvareńnia ŽČ (ciapier vydaleny i nie zachavaŭsia) i ICQ. The Insider i Bellingcat udałosia zdabyć fota z pravoŭ kiroŭcy Mikušyna, što dazvoliła paćvierdzić: Mikušyn i prafiesar Džamaryja — adzin i toj ža čałaviek:
Jak vyśvietliŭ The Insider, Michaił Mikušyn naradziŭsia ŭ Jekaciarynburhu, žyŭ na vulicy Małyšava, u 1994 hodzie skončyŭ škołu. U 26 hadoŭ jon pierajechaŭ u Maskvu, dzie žyŭ u aficerskim internacie pry Vajskova-dypłamatyčnaj akademii (VDA) HRU pa adrasie: vuł Narodnaha Apałčeńnia, dom 52, korp. 4, kv. 45. U hetym korpusie internata zarehistravanyja aficery HRU, jakija prachodziać navučańnie na 1-m fakultecie VDA (rychtuje aficeraŭ HRU dla pracy za miažoj u jakaści vyviednikaŭ pad dypłamatyčnym prykryćciom i vyviednikaŭ-nielehałaŭ).
Adznačym, što na hety fakultet VDA biaruć aficeraŭ nie nižejšych ranham za kapitana i ŭžo ź viedańniem zamiežnaj movy (u vypadku Mikušyna heta była partuhalskaja). Vielmi mahčyma, što jaho adnakurśnicaj była Volha Kołabava (Adeła Kuchvield), tamu što jany adnahodki.
U 2006 hodzie Mikušyn vypuściŭsia z akademii i zmoh atrymać brazilski pašpart na toj padstavie, što nibyta maje maci-braziljanku (kłasičny pryjom nielehałaŭ z HRU, jaki biespaśpiachova sprabavała vykarystać i Volha Kołabava, jakaja pradstaŭlałasia Adełaj Kuchvield i pra jakuju «Naša Niva» pisała raniej).
U tym ža samym hodzie jon kupiŭ sabie kvateru ŭ Maskvie na Navakurkinskaj šašy i, mabyć, niejki čas zastavaŭsia ŭ Maskvie. Užo budučy daśviedčanym hrušnikam, u 2010 hodzie Mikušyn zavioŭ staronku «VKontaktie» pad realnym imieniem, pastaviŭ jak juzerpik Astapa Biendera, a pohlady apisaŭ jak «ultrakansiervatyŭnyja»:
Cikava, što brat Michaiła — Ivan Mikušyn — nie prosta nie padzialaje jaho «ultrakansiervatyŭnych» pohladaŭ, ale i źjaŭlajecca pierakananym apazicyjanieram, udzielničaŭ u pratestach 2011 hoda, danaciŭ Navalnamu i ŭdzielničaŭ u «razumnym hałasavańni».
U 2011 hodzie Mikušyn, vidavočna, užo dosyć spraktykavaŭsia ŭ partuhalskaj movie dla lehiendavańnia i adpraviŭsia vučycca ŭ Kanadu va ŭniviersitet Kałhary (bałazie, dla zamiežnaha vucha ruski i partuhalski akcenty vielmi padobnyja). Miarkujučy pa ŭsim, jon, jak i Kołabava, praciahvaŭ pryjazdžać u Rasiju (choć nielehałam u saviecki čas heta amal nie dazvalałasia).
Va ŭsiakim razie, u červieni 2015 hoda jon abnaviŭ u Rasii pravy kiroŭcy, a praź niekalki miesiacaŭ užo ahitavaŭ u Kanadzie za Novuju demakratyčnuju partyju:
U 2020 hodzie Mikušyn znoŭ byŭ u Rasii, kupiŭ elektrasamakat i nie palenavaŭsia napisać vodhuk:
Niejki čas Mikušyn zajmaŭsia «daśledčaj» pracaj u Kanadzie i ŭ 2019 hodzie navat apublikavaŭ artykuł, jaki abhruntoŭvaje nieabchodnaść novych vajskovych baz u Arktycy.
U 2021 hodzie Mikušyn prybyŭ u Narviehiju dla daśledčaj prahramy va Univiersitecie Tromsio, jakaja, siarod inšaha, uklučała vyvučeńnie «hibrydnych pahroz». Ale jaho burnaja dziejnaść nie abmiažoŭvałasia Narviehijaj. Tak, naprykład,
usiaho miesiac tamu jon uziaŭ udzieł u treninhu ŭ Vilni, arhanizavanym pry padtrymcy ES i pryśviečanym «hibrydnaj vajnie».
Adnoj z temaŭ treninhu było, naprykład, «jak reahavać u vypadku sabatažu na hazapravodzie «Paŭnočny patok» — i sapraŭdy, vielmi aktualnaja tema dla Kramla:
U aŭtorak, 25 kastryčnika, Mikušyna zatrymali pa darozie va ŭniviersitet. Jahonamu advakatu paviedamili, što płanujuć jaho departavać. Zrešty, departacyja ŭ Rasiju naŭrad ci budzie mahčymaj, kali ŭ Maskvie nie pryznajuć Mikušyna hramadzianinam Rasii. Pakul ža rasijskaja ambasada z hnievam adchiliła abvinavačvańni, abvinavaciŭšy Narviehiju ŭ špijonamanii.
