Darja Čulcova padčas uručeńnia ŭznaharody Prix Europa. Patsdam, Niamieččyna. 28 kastryčnika 2022 hoda. Fota: Jan Lisicki / «Biełsat»
«Ja daviedałasia pra premiju, kali była ŭ turmie, padčas spatkańnia z mamaj. Uličvajučy, što Kacia ciapier nie sa mnoj i nie moža atrymać premiju razam sa mnoj, ja nie viedaju, ci mahu ja radavacca nastolki, nakolki ŭsie kažuć i chočuć, kab ja radavałasia», — kaža Daša za paru hadzinaŭ da ŭračystaj cyrymonii.
«Jak film»
Daša pryhadvaje, što ŭ źniavoleńni nie mahła adčuć radaści ŭznaharody, bo zastavałasia ŭ zakrytaj prastory, a ŭsio, što było pa-za — jak by nie isnavała. «Heta jak film, jaki niedzie pakazvajuć», — kaža jana.
Padčas razmovaŭ z žurnalistami i pamiž imi Daša ŭvieś čas uśmichajecca, ale heta sumnaja ŭśmieška: u intervju jana šmatkroć pryhadvaje Kaciu.
Darja Čulcova padčas uručeńnia ŭznaharody Prix Europa. Patsdam, Niamieččyna. 28 kastryčnika 2022 hoda. Fota: Jan Lisicki / «Biełsat»
«Niapravilna budzie kazać, što ja jaje zasłužyła: ja prosta rabiła svaju pracu, — kaža Daša. — Usie hetyja premii dla taho, kab hučniej skazać pra toje, što ŭ nas isnuje prablema. Ja rada hetym premijam, ale tolki tamu, kab moj hołas hučaŭ hučniej, kab hučniej kryčać, što našyja žurnalisty ŭ turmie, što Kacia da siońnia ŭ turmie».
Vystupajučy na ŭračystaj cyrymonii prysudžeńnia ŭznaharodaŭ Darja zajaviła, što pavinna była stajać na scenie nie adna.
Darja Čulcova z uznaharodaj fiestyvalu Prix Europa. Patsdam, Niamieččyna. 28 kastryčnika 2022 hoda. Fota: Jan Lisicki / «Biełsat»
«Maju kalehu i siabroŭku Kaciarynu Andrejevu dahetul trymaje ŭ pałonie dyktatarski režym, jaki ŭstanavili ŭ majoj krainie. Mnie jasna dali zrazumieć, što mianie vypuścili z turmy tolki tamu, što ja małady žurnalist i nie paśpieła pryčynić im šmat škody, u adroźnieńnie ad Kaci. Jana zaŭsiody była ŭ huščy padziej. Jana zaŭsiody pakazvała praŭdu, i za heta dyktatura siońniašniaj Biełarusi joj pomścić. Vosiem hadoŭ. Jany paličyli, što kazać praŭdu kaštuje mienavita stolki. Što ž, kolki b Kaciaryna ni znachodziłasia ŭ pałonie, ja ŭpeŭniena, što paśla, dziakujučy hetamu dośviedu, jana stvoryć niešta nievierahodnaje. A zaraz ja budu staracca pracavać za nas abiedźviuch».
Fiestyval «Prix Europa» — najbujniejšy fiestyval kantynienta, na jakim spaborničajuć prahramy, prajekty i filmy, zroblenyja dla telebačańnia, radyjo i anłajnu, ahułam u dzieviaci naminacyjach. Z 2017-ha žury fiestyvalu ŭviało katehoryju «Žurnalist hoda». Pavodle hienieralnaha dyrektara «Bavarskaha radyjo» Kaci Vildermut, hetaj uznaharodaj ušanoŭvajuć asobaŭ, jakija «prajaŭlajuć niezvyčajnuju kreatyŭnaść i mužnaść, upłyvajučy na hramadstva abo aŭdytoryju ŭ svaich krainach, źmianiajučy hulniu».
