Iranskija vajskoŭcy. Fota: Iranian Revolutionary Guard's Ground Force via AP, File
Saudaŭskija čynoŭniki zajavili amierykanskim kaleham sa spasyłkaj na ŭłasnyja raźviedźviestki, što Iran hatovy ździejśnić napady jak na ich karaleŭstva, tak i na irakski horad Erbił, sprabujučy adciahnuć uvahu ad unutranych pratestaŭ, jakija bušujuć u krainie ź vieraśnia.
U adkaz na papiaredžańni Saudaŭskaja Aravija, ZŠA i niekalki inšych susiednich dziaržaŭ pavysili ŭzrovień bajavoj hatoŭnaści svaich uzbrojenych sił. A ŭ Radzie nacyjanalnaj biaśpieki Biełaha doma paćvierdzili, što zaniepakojenyja infarmacyjaj i hatovyja adkazać na napad z boku Irana.
«My zaniepakojenyja karcinaj pahrozy i znachodzimsia ŭ pastajannym kantakcie praz vajskovyja i vyviedvalnyja kanały z saŭdytami. My biez vahańniaŭ budziem dziejničać dla abarony našych intaresaŭ i partnioraŭ u rehijonie», — adznačyŭ surazmoŭca WSJ.
Z kanca vieraśnia Iran užo atakavaŭ paŭnočny Irak dziasiatkami balistyčnych rakiet i bieśpiłotnikaŭ. Adzin ź ich byŭ źbity amierykanskim vajskovym samalotam, kali toj nakiroŭvaŭsia da horada Erbił, dzie bazujucca vojski ZŠA. Padstavaj dla napadu Tehieran nazvaŭ raspalvańnie biesparadkaŭ ŭnutry Irana kurdskimi sieparatysckimi hrupoŭkami, jakija bazujucca ŭ Erbile (heta stalica irakskaha Kurdystana).
Akramia taho, iranskija ŭłady publična abvinavačvali Saudaŭskuju Araviju, ZŠA i Izrail u padbuchtorvańni da antyŭradavych pratestaŭ u krainie, a taksama patrabavali ad saŭdytaŭ abmiežavać tranślacyju demanstracyj praz svaje ŚMI.
Iran raniej užo abvinavačvali ŭ napadach na abjekty Saudaŭskaj Aravii z-za paŭstancaŭ-chusitaŭ, jakich Tehieran padtrymlivaje ŭ Jemienie (tady jak Er-Ryjad uznačalvaje kaalicyju arabskich dziaržaŭ, jakija ŭvarvalisia ŭ Jemien u 2015 hodzie pa prośbie tahačasnaha jemienskaha prezidenta). Apošni maštabny ŭdar adbyŭsia ŭ 2019 hodzie, u vyniku jakoha była paškodžanaja infrastruktura najbujniejšaj u śviecie saudaŭskaj naftavaj kampanii Saudi Aramco. Iran aficyjna abvierhnuŭ svaju datyčnaść da toj ataki.
Pry hetym Iran aktyŭna padtrymlivaje Rasiju ŭ vajnie suprać Ukrainy, pastaŭlajučy joj bieśpiłotniki i, pavodle źviestak ŚMI, navat balistyčnyja rakiety. Choć aficyjna Tehieran zajaŭlaje, što nie padtrymlivaje nivodzin bok kanfliktu.
