Paśla adstupleńnia rasijskija vojski padarvali Antonaŭski most, jaki złučaje levy i pravy bierahi Dniapra kala Chiersona. Fota AP Photo/LIBKOS
Daradca Ofisa prezidenta Ukrainy Alaksiej Arastovič zajaviŭ uviečary 15 listapada ŭ videastrymie, što ŭkrainskija vojski vyzvalili horad Aleški na levym bierazie Dniapra. Ën spasłaŭsia na kiraŭnika ŭkrainskaj administracyi hetaha haradka.
Arastovič taksama zajaviŭ, što na Kinburnskaj kasie bolš niama rasijskich vajskoŭcaŭ, jakija, pa jaho słovach, jašče niadaŭna abstrelvali raźmieščany na procilehłym bierazie horad Ačakaŭ.
Kinburnskaja kasa — vuzkaja pałoska sušy pamiž Dniaproŭskim limanam i Čornym moram. Zachodniaja častka kasy adnosicca da Mikałajeŭskaj vobłaści Ukrainy, a astatniaja terytoryja — da Chiersonskaj.
«Złyja jazyki śćviardžajuć, što tam byli rasijskija siły radyjoelektronnaj baraćby, radyjoelektronnaj raźviedki, artyleryja i troški desantnikaŭ. Dyk voś ich niama», — skazaŭ Arastovič u paniadziełak uviečary na kanale «Fiejhin Live» na YouTube. «Uvohule, žyvych tam nie zastałosia, adrazu skažu», — zajaviŭ Arastovič.
Pavodle jaho słoŭ, rasijskija vojski abstrelvali z Kinburnskaj kasy horad Ačakaŭ i raźmieščany tam ukrainski Marski centr śpiecyjalnych apieracyj.
Adnak u paniadziełak pres-słužba kiraŭnika akupacyjnaj administracyi Chiersonskaj vobłaści Uładzimira Salda zajaviła, što Kinburnskaja kasa «znachodzicca pad poŭnym kantrolem Uzbrojenych sił Rasijskaj Fiederacyi».
Dniom raniej niekalki rasijskich tielehram-kanałaŭ, a zatym i ahienctva RIA Naviny paviedamili ab vysadcy na kasu ŭkrainskaha desanta. Dziaržaŭnaje infarmahienctva pieradało sa spasyłkaj na krynicu ŭ rasijskich siłavych strukturach ab «źniščeńni dyviersijnaj hrupy» USU i čatyroch lohkamatornych łodak.
Ukrainskija ŭłady padziei na Kinburnskaj kasie padrabiazna nie kamientavali, adnak jašče 12 listapada aficyjny pradstaŭnik apieratyŭnaha kamandavańnia USU «Poŭdzień» Natalla Humianiuk zajaviła: «Pakul praciahvajecca bajavaja praca [na kasie]. I kali my ŭžo pastavili sabie metu vyzvalić usiu Mikałajeŭskuju vobłaść, to jana budzie vyzvalenaja».
Paśla hetaha ŭkrainskija ŭłady paviedamlali pra padziei ŭ hetym rajonie tolki davoli raspłyvistymi namiokami.
Tak ranicaj u paniadziełak Ministerstva abarony Ukrainy apublikavała ŭ svaim tvitary karotki rolik, na jakim vidać pieramiaščeńnie hrupy ŭkrainskich vajskoŭcaŭ na lohkamatornych łodkach. Mahčyma, havorka idzie ab farsiravańni Dniapra abo Dniaproŭskaha limana.
15 listapada daradca kiraŭnika Chiersonskaj abłasnoj administracyi Siarhiej Chłań źmiaściŭ pasty z nazvami inšych prybiarežnych haradoŭ: Kachoŭka i Novaja Kachoŭka.
Miarkujučy pa ŭsim, ukrainskaja armija pieraniesła bajavyja apieracyi na levy bierah Dniapra adrazu paśla vyzvaleńnia Chiersona.
Čytajcie taksama: Ukrainskija vojski ŭvajšli ŭ łuhanskuju Makiejeŭku
