Nie kožnaja kava — karysnaja

U minskaj kaviarni. Fota z sacyjalnych sietak

U pieršuju čarhu kava — heta krynica kafieinu, rečyva-stymulatara. Akramia hetaha, jana moža mieć abiazbolvajučy i supraćastmatyčny efiekt. Kafiein razam z teafilinam i teabraminam stanoŭča ŭpłyvaje na centralnuju niervovuju sistemu i stymuluje mazhavuju dziejnaść. Taksama cudoŭny napoj źnižaje ryzyku raźvićcia chvarob Alchiejmiera i Parkinsana.

Siarod karysnych rečyvaŭ, što jość u kavie, nazyvajuć taksama antyaksidanty, jakija abaraniajuć arhanizm ad volnych radykałaŭ i dapamahajuć vyvodzić taksiny. Dziakujučy hetamu kava moža paskarać mietabalizm, što važna dla ludziej, jakija chočuć schudnieć.

Ale nie ŭsia kava karysnaja, i niekatoryja zvyčki kavamanaŭ mohuć nieści škodu zdaroŭju.

Pierš za ŭsio, kali vy pjacie kavu z cukram i sałodkim, nie pierabirajcie ź imi. Kali jeści šmat cukru, paskarajecca praces stareńnia, a taksama pavyšajecca ryzyka chvarobaŭ nakštałt dyjabietu 2 typu ci atłuścieńnia.

Taksama dyjetołahi rajać admovicca ad padsałodžvalnikaŭ (aspartamu ci sukrałozy), što ŭpłyvajuć na ŭzrovień insulinu. Kali dadavać takija rečy ŭ kavu, heta moža ŭzmacnić imknieńnie da sałodkaha. Dyj nichto da kanca nie viedaje, ci biaśpiečny dla zdaroŭja aspartam, nakont jaho ŭ navukoŭcaŭ jość šmat sumnievaŭ.

Jašče adna škodnaja zvyčka — zamianiać śniadanak kubačkam kavy. Admova ad śniadanku pavialičvaje ryzyku raźvićcia jazvavaj chvaroby ci sindromu razdražnionaha kišečnika.

Šmat chto sprabuje spatolić smahu kavaj, i heta taksama nie najlepšaje rašeńnie. Taki padychod moža pryvieści da abiazvodžvańnia, i praz heta — da prablem sa skuraj, źnižeńnia enierhii ci zapavolenaha zasvajeńnia karysnych rečyvaŭ. Voś čamu varta nie zabyvać i pra pićcio vady — aryjentujciesia jak minimum na 1—1,5 litra čystaj vady štodzień.