Arcybiskup Hudžeroci, jaki ciapier zaviaršaje svaju misiju ŭ jakaści Apostalskaha nuncyja ŭ Vialikabrytanii, z 2011-ha pa 2015 hod byŭ pradstaŭnikom Śviatoha Pasada ŭ Biełarusi. U svaim liście vysoki vatykanski ijerarch, u pryvatnaści, piša pra svoj dośvied supracoŭnictva sa spačyłym ministram Makiejem.
«Mahu zaśviedčyć, što padčas majoj dziejnaści ŭ minułyja hady ŭ vašaj krainie, a taksama paźniej, padčas jašče adnoj misii, daručanaj mnie Śviatym Ajcom, spadar Makiej adyhraŭ vyrašalnuju rolu dla dyjałohu pamiž Śviatym Pasadam i miascovymi katalikami z adnaho boku i biełaruskimi dziaržaŭnymi uładami z druhoha. Mienavita dziakujučy pasrednictvu spačyłaha ministra zamiežnych spraŭ byli taksama realizavanyja važnyja humanitarnyja inicyjatyvy», — napisaŭ arcybiskup Hudžeroci.
Vatykanski dypłamat taksama adznačyŭ prafiesijnyja jakaści Uładzimira Makieja i daŭ vysokuju acenku stylu jaho pracy na važnaj dziaržaŭnaj pasadzie.
«Ja zaŭsiody znachodziŭ u im žyvuju hatoŭnaść padtrymlivać adkrytymi kanały kamunikacyi i vieści pošuk prymalnaha pasrednictva navat tady, kali pazicyi byli adroznymi. Mahu zaśviedčyć i toje, što taki jaho padychod z udziačnaściu adznačali taksama mnohija inšyja dypłamaty ŭ samych raznastajnych zadańniach», — zaŭvažyŭ ijerarch.
U svaim liście arcybiskup Kłaŭdyja Hudžeroci vykazaŭ hłybokija spačuvańni rodnym, supracoŭnikam i ŭsim blizkim asobam Uładzimira Makieja, i zapeŭniŭ u svajoj malitvie ab supakoi dla jaho dušy.
