Fota: AR
Rešfardu 25 hadoŭ, jon forvard «Mančester Junajted» — adnaho z dvuch hałoŭnych kłubaŭ važnaha dla Markusa Mančestera. Z rańnich hadoŭ Markus byŭ fanatam MIU, i ŭ siem hadoŭ chłopčyk vyrašyŭ jašče i treniravacca ŭ akademii «čyrvonych djabłaŭ». Z taho času Rešfard vierny hetamu kłubu, braŭ ź im Kubak i Supierkubak Anhlii, pieramahaŭ u Lizie Jeŭropy. Užo šeść hadoŭ Rešfard vystupaje za anhlijskuju zbornuju, i ŭ 2016 hodzie jon staŭ samym maładym hulcom, što za jaje zabivaŭ.
U toj ža čas Rešfard — uładalnik hanarovaj stupieni doktara va ŭniviersitecie Mančestera. Atrymaŭ jon hetuju ŭznaharodu, kali jamu było 23, i heta samy małady doktar za ŭsiu historyju ŭstanovy. Jak futbalistu MIU toje ŭdałosia?
Tut treba zirnuć na dziacinstva Rešfarda.
Chłopiec vyras u šmatdzietnaj siamji — jon maje troch bratoŭ i siastru, i ŭsich ich maci vychoŭvała adna. U intervju futbalist raskazvaŭ, što časta zaŭvažaŭ, jak maci admaŭlałasia ad siamiejnaj viačery i dzialiła jaje pamiž piaćciu dziećmi, śćviardžajučy, što dobra pajeła na pracy. Časam u ich doma nie było navat łusty chleba, chacia mama chłopca pracavała na troch rabotach, i maleńki Markus dobra viedaŭ, što takoje biaspłatnyja stałovyja i banki charčavańnia.
Toj čas jamu daviałosia ŭspomnić letam 2020 hoda, kali brytanski ŭrad sabraŭsia admianić biaspłatnaje charčavańnie dla školnikaŭ. Reč u tym, što ŭ Brytanii bolš za miljon dziaciej z małazabiaśpiečanych siemjaŭ maje prava na biaspłatnaje charčavańnie ŭ škołach, i kali viasnoj 2020 hoda škoły zakryli praz pandemiju, dzieciam pačali vydavać vaŭčary na nabyćcio praduktaŭ u mahazinie. Kali padyšli letnija kanikuły, urad vyrašyŭ admianić schiemu.
Rešfarda ŭschvalavała hetaja historyja, i jon napisaŭ adkryty list u brytanski ŭrad z prośbaj pierahledzieć rašeńnie, ale atrymaŭ admovu. I chłopiec z Mančestera nie zdaŭsia. Jon paprasiŭ retvitnuć jaho post usich, chto padtrymlivaje biaspłatnaje charčavańnie dla dziaciej, i za dzień takich nabrałasia bolš za 60 tysiač. Futbalist raskazvaŭ pra biaspłatnaje charčavańnie ŭ efiry BBC Breakfast, a potym napisaŭ jašče adzin adkryty list, na hety raz u hazietu The Times. Voś frahmient ź jaho:
«Ja viedaju, jak heta — być hałodnym. Ja dobra viedaju, što časam maje siabry zaprašali mianie pajeści ŭ ich doma tolki dla taho, kab ich baćki pierakanalisia, što ja pajeŭ u hety viečar. Heta było majo asiarodździe. Asiarodździe, jakoje zrabiła Markusa Rešfarda, futbalista zbornaj Anhlii, što staić pierad vami siońnia. Kali ŭ dziacinstvie ja prajazdžaŭ praz centr Mančestera na aŭtobusie i bačyŭ biazdomnych na kožnym rahu, ja paklaŭsia, što kali zmahu dapamahać tym ludziam, to ja budu heta rabić».
Rešfard z hałoŭnym trenieram zbornaj Anhlii Haretam Saŭthiejtam. Fota: AR
Za niekalki dzion Markus staŭ samym papularnym čałaviekam u anhlijskaj presie. Publičnaść pryniesła svoj plon: paśla publikacyi ŭ instahramie lista ŭradu Rešfard pahutaryŭ pa telefonie z brytanskim premjeram Borysam Džonsanam, i ŭ vyniku ŭrad arhanizavaŭ śpiecyjalny letni fond dla charčavańnia dziaciej. U tyja letnija kanikuły biaspłatnyja vaŭčary na školnaje charčavańnie atrymała kala 1,3 miljona brytanskich dziaciej.
Za hetuju kampaniju Rešfard i atrymaŭ tuju samuju doktarskuju stupień. I heta nie ŭsio, bo za svaju aktyŭnaść Markus atrymaŭ jašče i orden Brytanskaj impieryi. Małady forvard — adzin ź niešmatlikich futbalistaŭ, kaho ŭznaharodzili ordenam mienavita za dabračynnyja spravy.
Paśla hetaha Rešfard nie spyniŭsia i dabiŭsia ad brytanskaha ŭrada vydzialeńnia, u dadatak da pieršapačatkovych 120 miljonaŭ funtaŭ, jašče 396 miljonaŭ na baraćbu ź biednaściu i hoładam u krainie. Jaho dziejańni vysoka acaniŭ ser Aleks Fierhiusan, adzin z najvažniejšych trenieraŭ u historyi «Mančester Junajted»:
«Nie ŭsie futbalisty traciać hrošy na darahija mašyny. Jość vialiki pracent hulcoŭ ź vialikim sercam. Futbalisty nie łajdaki».
Heta dobry prykład spartsmiena, jaki nie zastajecca abyjakavym da prablem u svajoj dziaržavie, i za heta Rešfarda vielmi lubiać — nastolki, što ŭ Mančestery malujuć murały ŭ honar hetaha chłopca (dokazy tut i tut). Vialiki kantrast ź niekatorymi spartsmienami ź inšych krain, u hramadstvach jakich taksama chapaje prablem, ale jany maŭčać.
Čytajcie taksama:
Zaŭziatar prajechaŭ na rovary 6 tysiač kiłamietraŭ da Katara. A jaho nie puskali na stadyjon
Top-11 samych haračych futbalistaŭ čempijanatu śvietu (+ łaŭka zapasnych i trenier)
U Šatłandyi futbalistam zabaroniać bić pa miačy hałavoj napiaredadni i na nastupny dzień paśla matča. I voś čamu
