Varabjoŭ naležaŭ da vyšejšaj kasty avijataraŭ — byŭ lotčykam-vyprabavalnikam. Z 2007 pa 2011 hod kiravaŭ 61-j źniščalnaj avijabazaj. Mieŭ zvańnie pałkoŭnika.
Upieršyniu ŭ historyi Biełarusi, razam z padpałkoŭnikam Anatolem Marozam, u 2007-m pasadziŭ Su-27UBM1 na ŭčastak aŭtadarohi Minsk — Brest, što ličyłasia dasiahnieńniem u piłotnym majsterstvie.
Taksama Varabjoŭ kiravaŭ vieteranskaj arhanizacyjaj avijabazy i štohod vystupaŭ pierad dziejnymi aficerami.
Asablivym jaho abaviazkam było vystupać 30 žniŭnia pierad kalektyvam biełaruskich bajavych lotčykaŭ — u hety dzień u 2009-m hodzie, kali Varabjoŭ kiravaŭ avijabazaj, u polskim Radamie zahinuli ŭ katastrofie dvoje vychadcaŭ z čaści na Su-27UBM, Alaksandr Marficki i Alaksandr Žuraŭlevič.
Marficki byŭ načalnikam 61-j avijabazy da Varabjova, a Varabjoŭ byŭ jaho namieśnikam i pajšoŭ na pavyšeńnie paśla taho, jak Marfickaha pieraviali na načalnika ŭpraŭleńnia avijacyjaj i vojskaŭ SPA Minabarony. Jany byli vielmi blizkija.
Ale apošni raz, kali rajonka zhadała Varabjova jak vystupoŭcu pierad kalektyvam, byŭ 30 žniŭnia 2019-ha. Jaho fota z materyjału pra žałobnyja mierapryjemstvy da 10-j hadaviny trahiedyi z sajta «Našaha Kraja» i z sajta Baranavickaha harvykankama ŭ nastupnym vydalili.
Pałkoŭnik Varabjoŭ niedzie za kadram, vystupaje pierad kalektyvam čaści 54804
U 2022-m Juryja Varabjova nie zaprasili na sustreču z kalektyvam pa fakcie hadaviny śmierci jaho papiarednika i siabra.
Na dva hady pałkoŭnik vypaŭ ź infarmacyjnaj prastory i viarnuŭsia ŭ jaje tolki pa fakcie svajoj zaŭčasnaj śmierci, samahubstva (Varabjoŭ byŭ palaŭničym).
Čamu tak vyjšła?
Jak viadoma «Našaj Nivie», da trahiedyi pryvioŭ źbieh abstavin, charakterny dla sučasnaj Biełarusi.
Pałkoŭnik Varabjoŭ blizka da serca pryniaŭ padziei 2020-ha i aktyŭna ŭklučyŭsia ŭ ruch suprać biezzakońnia i łukašyzmu.
«Jak staršynia vieteranskaj arhanizacyi, jon ahitavaŭ lotčykaŭ vychodzić na demanstracyi. Udzielničaŭ u ich sam. Viadoma, što niekatoryja, prynamsi vieterany avijabazy, aficery ŭ adstaŭcy, vychodzili na maršy ŭ biełych kašulach. Varabjoŭ aktyŭna pisaŭ kamientaryi nakont dziejańniaŭ łukašenkaŭcaŭ u haradskich čatach i pablikach», — kažuć nam abaznanyja.
Z razhułam reakcyi Varabjovu pačali prypaminać jaho ŭčynki. Mužčynu vyhnali z raboty na avijazavodzie, dzie jon pracavaŭ paśla sychodu na piensiju z avijabazy.
«Na avijazavodzie ŭ pryncypie razharnułasia vialikaje palavańnie na viedźmaŭ. Rabotnikaŭ kanviejeram adpraŭlali da apieratyŭnikaŭ KDB, jakija pravodzili dopyty z zapisam na videa. Kali čałaviek u niečym pryznavaŭsia, to tut ža jaho prymušali kajacca za svaje ŭčynki, u duchu HUBAZiKa, tolki biez publikacyi. Nakolki mnie viadoma, Varabjoŭ taksama hetuju historyju prachodziŭ», — dadajuć abaznanyja.
Taksama nam viadoma, što apošnim časam KDB znoŭ pačaŭ prajaŭlać intares da Varabjova.
«Jon, darosły čałaviek, lotčyk-prafiesijanał, jakoha klikali da siabie vystupać razam ź imi «Ruskija viciazi», kali heta jašče nie było haniebnym (hrupa vyšejšaha piłatažu US RF), i jakim jon admoviŭ. Kamandzir źniščalnaj čaści. Pałkoŭnik.
A ciapier faktyčna śpiecsłužby pierakreślili ŭsio jaho žyćcio: zaklajmili ŭ kalektyvie lotčykaŭ, nahavorvali, praciah siabroŭstva ź im kali nie zabaraniaŭsia naŭprost, to nie vitaŭsia.
Vyhnali z raboty, jon atrymaŭ taŭro i nikudy nie moh u horadzie ŭładkavacca, jaho nie brali. A iści mieści vulicy dla lotčyka-vyprabavalnika… Nu, vy razumiejecie», — vykazvaje zdahadku ab pryčynach samahubstva znajomy ź situacyjaj.
Pa infarmacyi «Našaj Nivy», dvoje darosłych synoŭ Varabjova ŭžo niekatory čas žyvuć u emihracyi. Pačatak vajny jany zaśpieli ŭ Kijevie.
U pałkoŭnika zastałasia dačka, jakaja žyvie ŭ Biełarusi.
