Li Charvi Osvald u Minsku
Nijakaha hučnaha vykryćcia nie čakajecca, ale historyki spadziajucca daviedacca bolš pra mierkavanaha zabojcu, jaki niejki čas žyŭ u Minsku.
35-y prezident ZŠA Džon Ficdžerald Kienedzi byŭ zastreleny padčas vizitu ŭ Dałas (štat Techas) 22 listapada 1963 hoda.
Zakon 1992 hoda patrabavaŭ, kab urad apublikavaŭ usie dakumienty ab zabojstvie da kastryčnika 2017 hoda.
U čaćvier prezident Džo Bajden vydaŭ ukaz, jaki dazvalaje apublikavać infarmacyju, ale paviedamiŭ, što niekatoryja fajły zastanucca zasakrečanymi da červienia 2023 hoda, pakolki ich publikacyja moža nanieści peŭnuju škodu.
Nacyjanalny archiŭ ZŠA zajaviŭ, što całkam zakrytymi zastanucca 515 dakumientaŭ, a jašče 2545 dakumientaŭ buduć zakrytyja častkova.
Amierykanskaje rasśledavańnie 1964 hoda, jakoje viała kamisija Uorena, ustanaviła, što Kienedzi byŭ zabity amierykanskim hramadzianinam Li Charvi Osvaldam i što jon dziejničaŭ u adzinočku.
Osvald byŭ zabity ŭ padvale palicejskaha ŭpraŭleńnia Dałasa praz dva dni paśla aryštu.
Śmierć Džona Kienedzi sparadziła šmatlikija teoryi zmovy, u tym liku — ab roli CRU ŭ hetaj spravie. U čaćvier CRU znoŭ zajaviła, što nikoli nie było źviazana z Osvaldam i nie chavała infarmacyi pra jaho ad amierykanskich śledčych.
Daśledčyki hetaj spravy spadziavalisia, što adkryćcio archiva raskryje bolš źviestak pra toje, što Osvald rabiŭ u Miechika, dzie jon u kastryčniku 1963 hoda sustrakaŭsia z ahientam KDB.
U svajoj apošniaj zajavie CRU śćviardžaje, što ŭsia infarmacyja pra pajezdku Osvalda ŭ Miechika, jakaja jość u rasparadžeńni ahienctva, była raniej apublikavanaja. Jak zajaŭlaje CRU, siarod ahučanych dakumientaŭ novaj infarmacyi pa hetaj temie niama.
Ale daśledčyki z Fondu Mery Fiereł, niekamiercyjnaj arhanizacyi, jakaja vyvučaje historyju i jakaja padała ŭ sud na ŭrad z patrabavańniem apublikavać fajły, zajavili, što CRU ŭtojvaje infarmacyju ab znachodžańni Osvalda ŭ Mieksicy.
U fondzie śćviardžajuć, što niekatoryja dakumienty CRU nikoli nie adpraŭlalisia ŭ archivy i tamu nie ŭvajšli ŭ tolki što apublikavanuju partyju.
Adzin niadaŭna apublikavany dakumient pakazvaje, što prezident Mieksiki dapamoh ZŠA pravieści prasłuchoŭvańnie telefonnych razmoŭ u savieckim pasolstvie ŭ Mieksicy bieź viedama inšych aficyjnych asob u mieksikanskim uradzie.
Hetaja krupinka infarmacyi była schavanaja ŭ raniej vypuščanaj, adredahavanaj viersii fajła, paviedamlaje telekanał Si-bi-es.
Bieły dom zajaviŭ, što abnarodavańnie fajłaŭ dazvolić hramadskaści lepš zrazumieć chod rasśledavańnia zabojstva.
Prezident Bajden taksama paviedamiŭ, što było pravierana amal 16 tys. zapisaŭ, jakija raniej byli apublikavanyja ŭ adredahavanym vyhladzie, i było vyrašana, što bolš za 70% hetych zapisaŭ zaraz moža być apublikavana całkam.
Administracyja Trampa apublikavała tysiačy staronak hetaj spravy za čas jaho prezidenctva, ale pakinuła zakrytymi inšyja ź mierkavańniaŭ nacyjanalnaj biaśpieki, niahledziačy na zakon 1992 hoda, jaki abaviazvaje apublikavać usiu infarmacyju da 2017 hoda.
U kastryčniku 2021 hoda Bajden apublikavaŭ jašče kala 1 500 dakumientaŭ, i voś ciapier amal usie dakumienty z archiva, pryśviečanaha zabojstvu Džona Kienedzi, pabačyli śviet.
