U Facebook-supołcy biełarusaŭ u Polščy mužčyna napisaŭ, što ź jaho patrabujuć padatak na darmajedstva za 10 hadoŭ, i dałučyŭ fota dakumientaŭ, a taksama pierapiski ŭ mesendžary ź inśpiektarkaj. Taja pytałasia, dzie dakładna jon znachodzicca, kali vierniecca ŭ Biełaruś i «chto budzie apłačvać zapazyčanaść». Naprykancy jana pryhraziła, što abvieścić daŭžnika ŭ vyšuk.
U kamientarach da dopisu mužčyna paviedamiŭ, što płacić nie budzie i viartacca na radzimu bližejšym časam nie źbirajecca. Sam jon apošnija hady nie pracavaŭ stała, zarablaŭ čas ad času, hrošy vydatkoŭvaŭ tolki na samaje nieabchodnaje: ježu i vopratku. Dapamahali rodnyja. Mužčyna aburajecca, što takim ža čynam padatkaviki mohuć pryjści da kožnaha, u kaho niama aficyjnaha dachodu, i spahnać značnuju sumu.
Nasamreč ź biełarusa patrabujuć nie padatak na darmajedstva, a padachodny padatak, što vynikaje z apublikavanaha im dakumienta.
Starejšaja navukovaja pracaŭnica daśledčaha centra BEROC Nastaśsia Łuzhina raspaviała, što čaściej za ŭsio padatkovyja słužby źviartajuć uvahu na bujnyja pakupki, heta, naprykład, nieruchomaść ci aŭtamabil, i tady praviarajuć, kolki asoba aficyjna zarablaje.
«Padatkovaja šukaje ludziej, jakija atrymlivajuć zarobak u kanviercie abo zajmajucca niezarehistravanaj pradprymalnickaj dziejnaściu. Kali jość padstavy tak ličyć, pačynajecca pravierka. Na pieršym etapie asoba nie viedaje ab tym, što joju zacikavilisia padatkaviki. Kali na hetym etapie vyjavilisia vydatki, jakija pieravyšajuć dachody, tady asobie paviedamlajuć ab nieabchodnaści rastłumačyć, adkul hrošy», — skazała Łuzhina.
«Zaśviacicca» pierad padatkovaj inśpiekcyjaj lohka, kali doŭhi čas aficyjna nie pracavać (heta akurat vypadak biełarusa, jaki paskardziŭsia ŭ Facebook). Inśpiektary ličać, što takaja asoba niejkija hrošy adniekul atrymlivaje, bo nie pavietram ža jana charčujecca.
«Za studzień — vierasień sioleta pravieryli bolš za 9 tysiač hramadzian, u 2,8 tysiačy vyjaŭlenyja niestykoŭki pamiž dachodami i raschodami. Ź ich spahnali 17,5 miljona rubloŭ», — paviedamiła Nastaśsia Łuzhina.
Jana adznačyła, što biudžet na nastupny hod praduhledžvaje pavieličeńnie zboraŭ pavodle artykuła «Štrafy, pieni, niaŭstojki» na 42% u paraŭnańni z hetym hodam. To-bok možna čakać, što pravierak stanie bolej. Da taho ž pavialičycca staŭka padatku. Sioleta treba płacić 20% ad sumy, što pieravyšaje dachod, naleta budzie 26%.
Ekanamistka kaža, što hety padatak nie pahražaje biełarusam, jakija stała žyvuć za miažoju i raz-poraz pryjazdžajuć na radzimu dy štości nabyvajuć. U takim vypadku asoba nie ličycca ŭ Biełarusi padatkovym rezidentam, tamu nijakich pytańniaŭ ad inśpiektaraŭ nie musić być.
Taksama spakojnymi mohuć być biełarusy-vachtaviki. Hałoŭnaje — pracavać u toj krainie, jakaje maje ź Biełaruśsiu pahadnieńnie ab paźbiahańni padvojnaha padatkaabkładańnia.
«Kali hramadzianin žyvie ŭ Biełarusi i pracuje vachtavym mietadam, naprykład, dalnabojnikam u litoŭskaj firmie, jon zastajecca padatkovym rezidentam Biełarusi. Litoŭski pracadaŭca pa poŭnaj prahramie biare ź jaho padatki. Tut ustupaje ŭ dziejańnie pahadnieńnie ab padvojnym padatkaabkładańni. Jano abaraniaje čałavieka, i ŭ Biełarusi ź jaho padatki nie voźmuć», — adznačyła ekśpiertka.
Krainy-ŭdzielnicy takich pahadnieńniaŭ musiać abmieńvacca infarmacyjaj, tamu padatkovaja sama moža pabačyć, što vy pracujecie za miažoju i zapłacili tam padatki. Što praŭda, składana skazać, nakolki narmalna ciapier idzie hety abmien infarmacyjaj. Moža ŭźniknuć situacyja, što daviadziecca dakazvać, što vy aficyjna pracavali i płacili padatki ŭ inšaj krainie, kanstatavała Nastaśsia Łuzhina.
Darečy, chutka krain, dzie biełarusam možna pracavać biez padvojnaha padatkaabkładańnia, pamienšaje. U kastryčniku Ukraina pastanaviła skasavać adpaviednaje pahadnieńnie ź Biełaruśsiu. Biełaruskija ŭłady i sami zajaŭlali, što źbirajucca admianić takija pahadnieńni z «niesiabroŭskimi» dziaržavami, u tym liku heta ŭsie krainy Jeŭrasajuza.
