Akcyja biełarusaŭ u Batumi
Siamja biełarusaŭ pierajechała žyć u Hruziju ŭ 2021 hodzie.
«Heta byŭ spłanavany krok. My žyli tut, pracavali, mieli časovy dazvoł na žycharstva. Ale nas z Hruzii faktyčna vykinuli», — raskazvaje Maryna (imia źmienienaje na prośbu hieraini).
Raskazvajem ich historyju.
«Biełaruskaja palityka tut ni pry čym»
Maryna dahetul nie moža zrazumieć, čamu ich pazbavili mahčymaści žyć u Hruzii, dzie jany navat paśpieli kupić kvateru. Biełaruska kaža, što na radzimie jany nidzie nie «zaśviacilisia», u pratestach nie ŭdzielničali.
«My pierajechali ŭ Hruziju zapłanavana, heta byŭ abdumany krok. Muž pracuje ŭ śfiery IT, ja chatniaja haspadynia. Dzieci tut pajšli ŭ škołu», — raskazvaje Maryna.
Pavodle hruzinskaha zakanadaŭstva, biełarusam možna lehalna žyć u Hruzii hod, paśla čaho treba vyjechać z krainy, kab «abnulić» termin znachodžańnia. Najčaściej biełarusy vyjazdžajuć u Tureččynu ci Rasiju. Viartacca možna litaralna praź niekalki chvilinaŭ paśla vyjezdu, hruzinam važny sam fakt taho, što čałaviek «abnuliŭ» svoj termin znachodžańnia na terytoryi krainy.
«My pajechali sa starejšym synam u Tureččynu, kab «abnulić» svoj termin. Rabili heta nie pieršy raz. Viartajemsia z Tureččyny, i na miažy nam hruzinskija pamiežniki kažuć, što Hruzija admaŭlaje va ŭjeździe. Maŭlaŭ, vaš časovy dazvoł na žycharstva anulavany, ničoha nie viedajem. Nas praviali na niejtralnuju pałasu. Tak my sa starejšym synam zastalisia ŭ Tureččynie, muž ź mienšym — u Hruzii», — kaža Maryna.
«Da muža pryjšli ŭnočy i faktyčna vykinuli z krainy»
Jak raskazvaje žančyna, praz čatyry dni paśla zdareńnia na miažy da muža Maryny pryjšli nieznajomyja. Dvoje ź ich byli ŭ vajskovaj formie, astatnija ŭ cyvilnym.
«Zahadali jamu źbirać rečy i pakidać krainu. Jon nie staŭ supraciŭlacca, bo ź im byŭ naš mienšy syn. Jany zabrali ŭ muža telefon, davieźli jaho da miažy (z Turcyjaj), i jon pierajšoŭ jaje jak turyst», — kaža Maryna.
Jana dadaje, što zaraz biełarusy ŭ «poŭnym nierazumieńni», čamu tak zdaryłasia. «My spakojna žyli, płacili padatki, nie parušali zakonaŭ, dzieci chadzili ŭ škołu. Na momant zdareńnia ŭ hruzinskaj škole zastavalisia dakumienty syna, ciapier ich užo zabrali», — kaža biełaruska.
«Pačynajem žyćcio ŭ Tureččynie»
Nieŭzabavie paśla admovy ŭ znachodžańni na terytoryi Hruzii Maryna z mužam źviarnulisia da advakata. Ale navat jurystka nie zmahła zrazumieć, čamu im bolš nielha žyć u Hruzii.
«Rašeńnie ab anulavańni časovaha dazvołu na žycharstva možna było asprečyć u sudzie. Ale heta doraha i nie fakt, što my vyjhrajem. Advakatka kaža, što mo ŭ nas «niešta nie toje» z dakumientami. Ale my ich aficyjna pierakładali, zaviarali ŭ nataryusa. Nam patłumačyli, što pryčyny anulavańnia dazvołu na žycharstva treba pytacca ŭ sudzie», — kaža Maryna.
Biełaruska dadaje, što jany z mužam užo padali dakumienty na časovy dazvoł na žycharstva ŭ Tureččynie, u Biełaruś siamja viartacca nie płanuje. Pakul nieviadoma, što budzie z kvateraj, jakuju Maryna z mužam paśpieli kupić u Hruzii.
Pa infarmacyi «Svabody», heta nie adzinkavy vypadak, kali biełarusaŭ nie puskajuć u Hruziju paśla karotkačasovaha vyjezdu dla «abnuleńnia» terminu znachodžańnia na terytoryi krainy. U niekatorych z takich vypadkaŭ suprać ludziej na radzimie byli zaviedzienyja kryminalnyja spravy za ŭdzieł u pratestach 2020 hodu. «Svaboda» źviarnułasia pa kamientar u Ahienctva raźvićcia dziaržaŭnaj słužby Ministerstva justycyi Hruzii, jakaja admoviła biełarusam u znachodžańni na hruzinskaj terytoryi (Agency for the Development of Public Services) (kopii admovy jość u redakcyi). Adkazu na hety momant redakcyja nie atrymała.
Pa źviestkach MUS Hruzii, z 1 studzienia 2022 hoda pa 30 vieraśnia 2022 hoda ŭ Hruziju pryjechała i zastajecca tam bolš za 13 tysiač hramadzian Biełarusi. Za 11 miesiacaŭ 2021 hoda ŭ Hruzii pabyvała kala 35 tysiač biełarusaŭ, što amal utraja bolš za taki ž pieryjad 2020 hoda. Aficyjnych źviestak pra toje, kolki biełarusaŭ zajechała ŭ Hruziju sa žniŭnia 2020 hoda i zastajecca tam ciapier, nie isnuje.
