U 2021 hodzie paśla zaviaršeńnia kantrakta Varašyłaŭ zvolniŭsia z šerahaŭ USU i syšoŭ u hramadzianskuju avijacyju, ale paśla 24 lutaha viarnuŭsia ŭ vojska.
«Ja zaŭsiody vieryŭ u Boha. U mianie jość nievialikaja tatuiroŭka — kryžyk. Padčas słužby nie zaŭsiody jość mahčymaść nasić realny, jon moža pieraškadžać, jaho možna stracić, tamu ŭ 2014 hodzie ja zrabiŭ tatuiroŭku. Budu sumlennym, z pačatkam poŭnamaštabnaha ŭvarvańnia, straciŭšy pabracimaŭ, nievierahodnych, załatych ludziej, lepšych synoŭ Radzimy, ja straciŭ nadzieju. Ale paśla 12 kastryčnika, paśla ŭsich tych faktaraŭ, jakija nievierahodnym čynam supali na maju karyść, ja zrazumieŭ, što vyšejšaja siła jość i ŭpłyvaje na naša žyćcio», — skazaŭ UP Vadzim.
«Usprymajem voraha tolki jak cel»
— Vadzim, kali ja ŭpieršyniu ŭbačyŭ vas u ŚMI, na kantraście ŭspomniŭ piłota RF, jakoha schapili ŭ Čarnihavie. Taki jon… pulchny. Heta ŭ voraha prablemy z «fizuchaj» ci heta ŭ mianie stereatyp adnosna avijataraŭ, jakija nibyta ŭsie pavinny być atletami?
— Heta byŭ Krasnajarcaŭ… Ja b nie skazaŭ, što ŭ ich takaja prablema. Ale, sapraŭdy, u nas užo novaja kancepcyja padrychtoŭki lotnaha składu. Paśla 2014 hoda akcent bolš robiać na maładych, kab jany byli asnoŭnaj siłaj udarnaj avijacyi.
Pa statystycy źbivańnia pavietranych sudoŭ, z tych vajskoŭcaŭ (lotčykaŭ i šturmanaŭ — UP), jakija trapili da nas u pałon, my bačym, što heta… u mianie navat jazyk nie pavaročvajecca skazać «chłopcy» — darosłyja mužčyny.
My pavinny razumieć: čym maładziejšy čałaviek, tym chutčej pracuje mozh. Heta vielmi važna ŭ avijacyi.
— Niekatoryja rasijskija piłoty, jakija trapili ŭ pałon, sprabavali pierakanać, što nie viedali pra bambavańni žyłych damoŭ, tamu što pracavali pa pradastaŭlenych im kaardynatach. U takoje možna pavieryć?
— Ja ŭ heta nie vieru. U ich stajać zvyčajnyja sistemy navihacyi typu Garmin, turystyčnyja, roznych madyfikacyj. Mahčyma ich publika i ŭsprymaje prapahandu (ab tym, što avijacyja RF nie bje pa mirnych celach— UP), ale naša hramadstva dosyć piśmiennaje.
Nie treba być avijataram, kab razumieć: kali čałaviek zabivaje šyryniu i daŭhatu ŭ turystyčnym navihatary, jon dosyć vyrazna bačyć, što tam znachodzicca. Kali kaardynata zabitaja ŭ miežach peŭnaha nasielenaha punkta, adrazu jasna, što ty pracuješ pa nasielenym punkcie.
Jany robiać heta «čyhunkami», jak kažuć u narodzie. Heta — zvyčajnaja avijacyjnaja bomba, u jakoj jość prosta trajektoryja palotu, a dakładnaść bombakidańnia zaležyć ad kučy faktaraŭ, pačynajučy ad navykaŭ lotčyka, zakančvajučy mieteaŭmovami. Tamu ja nie vieru ŭ hetuju lehiendu.
— Što ličycca dakładnym udaram?
— Mahu skazać aryjencirovačna: u narmatyvach u voraha pa acency «vydatna» jość bombakidańnie ŭ miežach plus-minus 50 mietraŭ. Va ŭmovach horada navat heta — vielizarnaja pamyłka.
Vadzim Varašyłaŭ: dla mianie lubaja cel važnaja. Navat BPŁA — raźviedčyk — heta toje, što niasie śmierć mirnym ukraincam i vajskoŭcam. Fota: Raman Paškoŭski
— Davajcie ŭjavim hipatetyčnuju situacyju: vam addajuć zahad bambić celi ŭ miežach žyłych kvartałaŭ. Što budziecie rabić?
— Nakont hetaha my ŭžo razvažali z pabracimami. Pa-pieršaje, ja nie chaču navat hipatetyčna pra heta kazać, tamu što navat u teoryi heta niemahčyma. Naša vajskova-palityčnaje kiraŭnictva hetaha nie dapuścić.
Kali razhladać u bolš abstraktnaj płoskaści, to lotčyk i šturman u Su-34 (źbity samalot Krasnajarcava — UP) zaŭsiody bačać miesca znachodžańnia celi jak minimum pa srodkach navihacyi.
Tak, im staviać zadaču, jakuju treba vykonvać. Ale ich nichto nie zvolnić, nie pasadzić u turmu, kali jany skinuć bomby, naprykład, u čystym poli, na adlehłaści kiłamietr—dva ad žyłych damoŭ, ź pieralotam abo niedalotam. Heta prosta budzie «pamyłka ŭ technicy piłatavańnia i niajakasnaja padrychtoŭka» — usio! Na hetym usio zakančvajecca.
Ale taki varyjant mahčyma razhladać, kali b jany byli banalna ludźmi. Jany całkam razumiejuć, što jany robiać. Heta ich tradycyjnaja taktyka vypalenaj ziamli. Heta toje, što jany i raniej rabili ŭ Ičkieryi, u Hruzii, u Siryi.
— Jak vy dla siabie sfarmulavali staŭleńnie da voraha? Ci jość niešta nakštałt pavahi da ich piłotaŭ?
— My da ich stavimsia nie jak da kankretnaha, žyvoha čałavieka, a jak da pavietranych celaŭ. Jany pieratvarajucca tolki ŭ suchija ličby ŭ štodzionnaj zvodcy Hienštaba [strat armii RF], nie bolš.
Viadoma, vypadki pavahi da varožych piłotaŭ byli ŭ historyi, ale vielmi daŭno, u Pieršaj suśvietnaj vajnie. Tady byli bolš vysakarodnyja adnosiny, kali možna tak skazać.
Raniej i abjaŭlali vajnu, i akt ab hetym padpisvali, a potym vychodzili na pazicyi. Ciapier vorah niekalki miesiacaŭ raspaviadaŭ, što nie źbirajecca napadać, a potym padstupna ŭdaryŭ ranicaj pa mirnych haradach Ukrainy.
Znakamitaje sełfi. Fota: Vadym Voroshylov / Instagram
«My absalutna hatovyja da ŭsiaho»
— Jość niešta, što bolš za ŭsio adroźnivaje našych piłotaŭ ad varožych?
— Možna kazać šmat, ale skažu tolki, što my vykonvajem takija zadačy, jakija technična navat nie zakładvalisia na etapie prajektavańnia našych pavietranych sudnaŭ.
U nas vielmi abmiežavanyja techničnyja mahčymaści, ale my robim usio, kab źniščać voraha. Starajemsia efiektyŭna pracavać u bolš ekstremalnych umovach i absalutna da ŭsiaho hatovyja.
Vorah, majučy pieravahu, pracuje tak, jak napisana ŭ padručnikach pa taktyčnaj i ahniavoj padrychtoŭcy. My dziejničajem bolš sučasnymi mietadami, jakija naohuł nie prapisany ni ŭ adnym z padručnikaŭ luboj krainy śvietu.
— Heta značyć piłotam NATO budzie čamu pavučycca ŭ našych paśla hetaj vajny?
— Tak (uśmichajecca).
— Ci hulaje z ruskimi zły žart toje, što ŭ ich tak šmat techniki? Jany dziejničajuć, jak havorycca, «na rassłabonie» abo nie?
— Vy pravilna kažacie. Ale nie treba niedaaceńvać voraha, jon — niebiaśpiečny. Ja niehatyŭna staŭlusia da vykazvańniaŭ, što tam niejkija «čmoni» i astatnija. Nie! Heta vorah. U ich istotnaja pieravaha pa pavietranych sudach i naziemnych srodkach SPA. Jany ŭmiejuć pracavać, jany taksama vučacca na hetaj vajnie, jak i my.
Kali kažuć ab kamfortnych umovach dla voraha, to havorka ab mahčymaści ich źniščalnaj avijacyi pracavać, nie ŭvachodziačy ŭ zonu našaj SPA. Ale kali jany traplajuć u hetuju zonu, to kožny raz u zvodkach ad Hienštaba vy bačycie plusy nasuprać źniščanych pavietranych celaŭ.
— Jość siarod ich niešta takoje, što ździŭlaje? Moža, niejkija asobnyja typy samalotaŭ?
— Tak, ale nie samaloty. Treba razumieć, što samalot — heta bolš płatforma, nośbit avijacyjnych srodkaŭ paražeńnia. Mienavita hetyja srodki mohuć dać pieravahu ŭ pavietry.
Niadaŭna ŭ rasijan zjavilisia rakiety kłasa «pavietra — pavietra» vialikaj dalokaści R-37M. Možna skazać, što heta ich najnoŭšaje ŭzbrajeńnie, choć heta, viadoma, savieckaja raspracoŭka, jakuju jany madernizavali. Zajaŭlenaja imi dalokaść paražeńnia pavietranych celaŭ vielmi surjoznaja — da 400 kiłamietraŭ. Pa fakcie my bačym mienšyja ličby, ale ŭsio adno heta srodak paražeńnia vielmi niebiaśpiečny.
Adnak my pastajanna analizujem pavietranyja bai z užyvańniem hetych rakiet i znachodzim mietady dla baraćby ź imi.
Fota: Vadym Voroshylov / Instagram
— Ab źniščeńni jakoj vajennaj celi vy marycie?
— Mahu pieraličyć try (uśmichajecca): Tu-95, Tu-160, Tu-22M3. Heta mienavita tyja celi, jakija zjaŭlajucca pahrozaj dla našych haradoŭ i mirnaha nasielnictva, ale jany nie zachodziać u zonu paražeńnia našych taktyčnych pavietranych sudnaŭ. Prosta bajacca. Padstupna robiać puski pa terytoryi Ukrainy.
Na hety momant baču mahčymaść ich źniščeńnia, tolki kali jany znachodziacca na aeradromach (uśmichajecca). Pakul tolki taki šlach.
Ale jość jašče ŭdarnaja avijacyja voraha, jakaja pracuje nad časova akupavanymi terytoryjami, i, kali b u nas była techničnaja mahčymaść, my b całkam paralizavali voraha va ŭkrainskaj pavietranaj prastory. Raskryć naš patencyjał na ŭsie 100% dapamohuć źniščalniki zachodniaha typu.
— Vy siarod tych, chto ličyć, što heta pavinny być F-16?
— Tak, nam patrebien masavy samalot, jaki jość u śviecie. My, viadoma, možam razhladać roznyja typy, naprykład, Gripen, Eurofighter. Jany bolš ustojlivyja da našaj aeradromnaj infrastruktury, ale pry ŭsim hetym nie zjaŭlajucca masavymi. Niama ŭ śviecie, skažam, «druhasnaha rynku» takich sudoŭ.
F-16 — adzin z samych masavych samalotaŭ svajho kłasa ŭ śviecie. Tamu my zmožam ich absłuhoŭvać i, samaje hałoŭnaje, dziakujučy našym zachodnim partnioram, u nas nie budzie niedachopu ŭ srodkach paražeńnia. Heta — asnoŭnyja momanty, čamu mienavita F-16.
Kali razhladać čas užo paśla pieramohi, to jość z čaho vybirać. Viadoma, jość samaloty, jakija, ja b skazaŭ, amal daviedzienyja da ideału ŭ płanie bajavych mahčymaściaŭ. Heta-F-22, F-35. Ale na hety momant vielmi mocna palepšyć situacyju i dapamoža našym siłam abarony ŭ kompleksie mienavita F-16.
«Za bieśpiłotnaj avijacyjaj budučynia, ale…»
— Ab sučasnaj vajskovaj avijacyi bolšaść viedaje ŭ asnoŭnym z halivudskich filmaŭ. Vy bačyli stužku «Top Gun»?
— Viadoma (uśmichajecca). Ja — fanat pieršaj častki. Kali byŭ kursantam, lotaŭ na lohkamatornych sudach. Na toj momant ja nie mieŭ spravu z reaktyŭnaj technikaj i hladzieŭ hety film z šyroka raspluščanymi vačyma. Ale ciapier usio pa-inšamu ŭsprymajecca. Treba razumieć, što heta nie dakumientalnaje, a mastackaje kino.
Adnosna druhoj častki «Top Gun» skažu, što heta vielmi pryhoža źniataja kazka. Tam jość šmat zdymak realnaha piłatavańnia. Što tyčycca viadzieńnia pavietranych bajoŭ, pracy zienitna-rakietnych kompleksaŭ — jany nie zusim adlustroŭvajuć rečaisnaść, skažam tak (uśmichajecca).
Ale mnie było vielmi cikava hladzieć hety film z taho punktu hledžańnia, jak jany jaho źniali, jakija emocyi vyklikaje. Takoje kino zaachvočvaje moładź iści ŭ vojska, pryčym nie tolki ŭ USA Air Force, a naohuł u vojski.
— Kali vy maryli lotać, vy ž nie dumali ab tym, što pryjdziecca vajavać?
— Nie.
— A kali b vam tady skazali, što pryjdziecca, pajšli b u vajskovuju avijacyju?
— Na hłybinnym uzroŭni ŭsio ž było razumieńnie, što vojska isnuje dla viadzieńnia bajavych dziejańniaŭ nastupalnaha abo abarončaha charaktaru. Na toj momant, viadoma, nichto nie moh ujavić hetaha. Ale ja ŭsio adno pajšoŭ by.
Fota: Vadym Voroshylov / Instagram
— Hetaja vajna ŭžo pryviała da raźvićcia bieśpiłotnaj avijacyi. Nie baluča nazirać, jak usio idzie da taho, što ŭ budučyni piłoty ŭ niebie nie buduć patrebnyja?
— Jak pakazali bajavyja dziejańni, apieratyŭnaść raźviedvalnaj avijacyi, efiektyŭnaść prymianieńnia bieśpiłotnikaŭ dla padaŭleńnia kompleksaŭ SPA — vielmi važny elemient uzbrajeńnia. Ciapier užo bum bieśpiłotnaj avijacyi, i jana budzie tolki ŭdaskanalvacca.
Niekatoryja krainy, jak Turcyja, pačynajuć vyrablać bieśpiłotniki dla parazy pavietranych celaŭ. ZŠA letaś vykanali pieršuju dazapraŭku ŭ pavietry ź bieśpiłotnaha sudna. Viadoma, za hetym budučynia.
Ale zaŭsiody treba razumieć, što ŭ krytyčnaj situacyi tolki čałaviek zdolny acanić abstanoŭku i pryniać rašeńnie ŭ pavietry. Ja liču, što za bieśpiłotnaj avijacyjaj budučynia, ale tolki pry pracy ŭ kompleksie z tradycyjnaj avijacyjaj.
— Vy b ciapier pramianiali pracu ŭ pavietry padčas vajny na pult bieśpiłotnika dzie-niebudź u biaśpiečnym miescy?
— Nie. Ja vybiraju pracavać u niebie. Heta daje vopyt, bolš efiektyŭnaje prymianieńnie zbroi i emocyi.
— Emocyi? U mianie skłałasia ŭražańnie, što vy vielmi ŭraŭnavažany čałaviek, amal biez emocyj.
— Emocyi jość, prosta jany vonkava nie prajaŭlajucca. Heta dzieści ŭ dušy. Ty razumieješ, što robiš toje, što ratuje kamuści žyćcio, dapamahaje pieramahčy voraha.
Nie viedaju navat, jak apisać hetyja ŭnutranyja emocyi. Ty vučyšsia, udaskanalvaješ navyki, i voś nastaŭ čas, kali tabie treba pakazać, što ŭmieješ, kab abaranić dziaržavu.
— Čaho bolš za ŭsio nie chapaje našaj vajskovaj avijacyi? Ludziej, techniki abo ŭ kompleksie?
— Pieršaje, što nam nieabchodna — pavialičyć dalokaść, na jakuju mohuć bačyć našy radyjołakacyjnyja i prycelnyja kompleksy. Druhoje — avijacyjnyja kiravanyja srodki kłasa «pavietra — pavietra» sa značna bolšaj dalokaściu paražeńnia, čym u nas ciapier jość. Tamu nam vielmi patrebnyja F-16, jakija mohuć zabiaśpiečyć našy patreby ŭ hetym.
— Ciapier krychu rana pra heta kazać, ale jakoj vy bačycie budučyniu ŭkrainskaj avijacyi?
— Ja jaje baču (uśmichajecca). Paśla poŭnamaštabnaha ŭvarvańnia ja ŭžo ŭpeŭnieny, što ŭ nas buduć samaloty zachodniaha ŭzoru. Što paśla pieramohi budzie madernizacyja i techniki, i sistema padrychtoŭki. U nas buduć bolš sučasnyja pavietranyja sudny.
Tyja pramysłovyja mahutnaści, jakija ŭ nas jość, treba realizoŭvać i raźvivać sumiesna z zachodnimi kampanijami. Viadoma, my sastupajem u elektronicy, ale ŭ nas kałasalny vopyt u kanstrujavańni płanieraŭ, u rakietabudavańni i vytvorčaści ruchavikoŭ. Kab zrabić idealny pradukt, nam treba sumiaścić svoj vopyt z zachodnim.
Fota: Vadym Voroshylov / Instagram
«Starajusia žyć adnym dniom»
— Vy viedziacie staronku ŭ Instagram, nie chavajecie tvar, vas paznajuć na vulicach i dziakujuć. A ruskija pišuć z pahrozami?
— Naohuł nie. Naohuł! Mianie heta mocna ździviła. Moža, heta praz toje, što ich kiraŭnictva śćviardžaje, što avijacyi ŭ nas niama, što jany adrazu ŭsio źniščyli (uśmichajecca)? I jany nie chočuć kazać pra ŭkrainskich piłotaŭ u svaim infapoli, kab ich hramadzianie nie dzivilisia?
Niejak było dzieści ŭ ich ŚMI — skažu na movie aryhinała: «Źbili ŭkrainskaha lotčyka-nacysta». Byŭ nievialiki siužet, dzie jany ŭspomnili moj pazyŭny i raspaviali pra Hartmana, jaki atrymaŭ ad Hitlera «Žalezny kryž» (Erych Hartman z pazyŭnym «Karaya 1» — niamiecki lotčyk — as časoŭ Druhoj suśvietnaj — UP).
— Ale prapahandysty nie raspaviadajuć, što ŭ 1997 hodzie Hartmana reabilitavali ŭ RF, pryznali, što niepravamierna asudzili jaho da 10 hadoŭ łahieraŭ «za vajennyja złačynstvy»…
— Tak…
Historyja z maim pazyŭnym pačałasia ŭ 2014 hodzie, kali rasijanie zapuścili svaju prapahandysckuju mašynu, pačali nazyvać ukraincaŭ «nacystami». Tady ŭzłamali maju staruju staronku ŭ Instagram. Ja zrabiŭ novuju i dumaŭ, jak jaje padpisać.
Mnie cikavaja suśvietnaja historyja, ja viedaŭ pra Hartmana i vyrašyŭ padpisać «Karaya». Pa vialikim rachunku, dziela žartu, mienavita z-za rasijskaj prapahandy, kab ich patrolić (śmiajecca). Potym užo jano niejak zamacavałasia.
Usie viedajuć, što Hartman — hienijalny lotčyk. Jon prajšoŭ stalinskija łahiery, zatym paśpieŭ pasłužyć u zachodniaj častcy Hiermanii i navat treniravaŭ amierykanskich piłotaŭ.
Fota: Vadym Voroshylov / Instagram
— Što dla vas budzie pieramohaj u hetaj vajnie?
— Na maju dumku, padpisańnie mirnaj damovy z krainaj-ahresaram — heta tolki paŭza, padčas jakoj budzie pierahrupoŭka sił, nie bolš. Kali vorah nazapasić dastatkovuju kolkaść ludziej i techniki, praanalizuje ŭsio, iznoŭ na nas napadzie. Kali ich dziaržava zastaniecca ŭ takim farmacie, z takim palityčnym viektaram, jak ciapier.
Za pieramohu ja liču situacyju, kali, pa-pieršaje, u voraha źmienicca ŭłada i palityka. U ideale pieramoha — heta raspad impieryi. I, viadoma, abaviazkovy punkt — adnaŭleńnie terytaryjalnaj cełasnaści Ukrainy, viartańnie ŭsich akupavanych terytoryj razam z Krymam.
— Viedaju, vajskoŭcy nie lubiać prahnozy adnosna terminaŭ zakančeńnia vajny. Ale ja spytaju tak: kali va ŭkrainskim niebie my znoŭ pabačym hramadzianskuju, a nie vajskovuju avijacyju?
— Na hety momant ja nie chaču davać niejkija prahnozy. Viadoma, u mianie jość asabistaje mierkavańnie, ale ŭ cełym ja jaho nie chaču vynosić. Nie maju maralnaha prava davać prahnozy choć by tamu, što nie vałodaju poŭnym abjomam stratehičnaj infarmacyi.
Paśla 24 lutaha ja starajusia žyć adnym dniom, a dakładniej — prama ciapier i prama tut. Raniej ja moh pieranieści niejkija važnyja žyćciovyja rašeńni da, jak havorycca, bolš kamfortnych časoŭ. Ciapier, kali jość mahčymaść niešta zrabić, treba abaviazkova rabić, nie adkładvać.
Nichto nie viedaje, ci nastupić zaŭtra. Treba nie spyniacca, žyć tut i ciapier.
