Fota: Pexels.com
«Samaje važnaje — ułasny emacyjny stan»
Adkaz na biestaktoŭnyja pytańni, tłumačyć Natalla, budzie mocna zaležać ad taho, chto zadaje hetyja pytańni, jakija ŭ nas adnosiny ź im i čaho my žadajem u vyniku dasiahnuć. Pytańni mohuć być prajavaj pasiŭnaj ahresii, i ŭ takim vypadku my hetuju ahresiju vyraŭnoŭvajem, kali heta biaśpiečna. To-bok, kali my adčuvajem u siabie siły, možam razvaročvać hetuju ahresiju ŭ bok taho, chto spytaŭ, i nie dazvalać pieratvarać hutarku ŭ padściobvańnie i manipulacyju, bo heta nasamreč manipulacyja. Navošta ludzi pytajucca, kali ty vyjdzieš zamuž? Jany mohuć dumać, što robiać svaimi pytańniami niešta dobraje, ale žyćcio kožnaha čałavieka — heta jaho asabistaja sprava, i jon sam moža vybirać svaje žyćciovyja stratehii.
Kali my žadajem, kab takich pytańniaŭ nam bolš nie zadavali, my možam:
- davać ahulny adkaz;
- skazać: «Mnie pryjemna, što ty cikavišsia, ale heta maja sprava»;
- pytacca: «A navošta ty cikavišsia, čamu tabie takoje važnaje majo asabistaje žyćcio?»
«Takija biestaktoŭnyja pytańni prymušajuć čałavieka, jakomu ich zadajuć, adčuvać siabie ŭrazlivym, bo hetyja śfiery nie datyčać taho čałavieka, chto zadaje hetyja pytańni, heta parušeńnie asabistych miežaŭ. Tamu čałaviek adčuvaje złość, abražanaść, niechta moža adčuvać i vinu, bo bjuć u balučyja miescy», — tłumačyć psichołah.
Kali ŭ čałavieka pytajucca, kali jon znojdzie «narmalnuju» pracu, to nie zaŭsiody ž pytajucca tyja, chto naŭprost u hetym zacikaŭleny i ad kaho heta zaležyć. Kali heta, naprykład, ludzi, jakija dapamahajuć hrašyma tamu, chto mała zarablaje, to heta adna historyja. Kali ž nie, to treba pakazvać svaje miežy i kazać, naprykład, što heta «naša asabistaja sprava», abo naŭprost paprasić takija pytańni bolš nie zadavać.
Ale byvaje, što takija pytańni zadajuć blizkija svajaki, naprykład, lubimaja babula. Jana, miarkuje Natalla, moža ličyć, što ŭ jaje pytańni jość sens — mo jana takim čynam vas prastymuluje źmianić pracu. Treba davać takim ludziam mahčymaść zachavać ułasnaje samalubstva, stavicca da ich miakka i akuratna, nie rujnavać ich aŭtarytet i samapavahu.
Psichołah padkreślivaje, što kali vam zadajuć takija pytańni, samaje važnaje — kłapacicca pra ŭłasny emacyjny stan, bo možna tak naadkazvać, što potym budzie mocny asadak. Naprykład, kali para nie moža zaciažaryć i dla ich heta balučaje pytańnie, a ŭ ich cikaviacca pra dziaciej, to svaje balučyja miescy treba abaraniać, ale pry hetym i lačyć.
«U takich razmovach my časta baimsia akazacca biestaktoŭnymi, «drennymi». Bo luby kateharyčny adkaz — heta patencyjnaja svarka. Kali možna, nie bojciesia ryzykavać być kiepskimi, bo ŭsie my majem prava być saboj. U nas va ŭsich svaje kaštoŭnaści, i my sami vyrašajem, jakimi my sustrakajemsia ź inšymi ludźmi, nie varta bajacca nie adpaviadać čyimści čakańniam.
Čym bolš vy budziecie mieć unutranaj siły i apory na siabie, tym bolš ustojlivym vy budziecie ŭ lubych takich temach. Treba viedać siabie, pavažać siabie, pamiatać: majo cieła — heta maja sprava, mnie samomu vyrašać, u jaki koler mnie farbavać vałasy, z kim zajmacca seksam i kali naradžać dziaciej», — tłumačyć Skibskaja.
Jak adkazvać na pytańnie…
… kali ty vyjdzieš zamuž / aženišsia?
Natalla rekamienduje niekalki stratehij. Naprykład, vy možacie skazać, što vam i ŭ adzinocie dobra, vy ciapier nie chočacie zamuž abo majecie inšyja pryjarytety. Taki adkaz vielmi dobra akreślivaje asabistuju pazicyju čałavieka i pakazvaje na jaho ŭłasnyja miežy. Možacie skazać «za mianie nie pieražyvaj». Jašče adzin varyjant — adžartavacca: «A ty maješ na prykmiecie kahości dla mianie?»
… kali vy zaviedziacie dziaciej?
«Nie ŭsie hatovyja demanstravać ułasnuju ŭraźlivaść, ale kali vy heta možacie, to skažycie: «Mnie vielmi niepryjemnaje hetaje pytańnie, i ja prašu jaho bolš nie zadavać, dla nas heta balučaja tema». U daviernych adnosinach možna takim čynam pakazać čałavieku, što jon ulez nie tudy, i dać jamu mahčymaść reciravacca», — raskazvaje psichołah.
Možna i adžartavacca, ale taki varyjant pakidaje čałavieku mahčymaść i dalej viarnucca da hetaj temy. Tak što vyrašajcie: vy chočacie raz i nazaŭsiody skončyć hetyja pytańni abo pakinuć ich na potym.
… ty tak pachudzieŭ / pataŭścieŭ, što z taboj adbyvajecca?
Kali vam padabajecca hetaja zaŭvaha, možacie prosta skazać «dziakuj, mnie vielmi pryjemna, što ty zaŭvažyŭ». Kali ž hetaje pytańnie vam niepryjemnaje, možna, viadoma, raskazać, čamu vy pataŭścieli abo pachudzieli, a možna spytać «navošta ty mnie heta kažaš?». Taki adkaz, kaža Natalla, dapamahaje zrazumieć, što adbyvajecca, bo časam ludzi zadajuć biestaktoŭnyja pytańni prosta tamu, što ŭ razmovie źjaviłasia paŭza, ci pa nierazumnaści, i nie razumiejuć, što viaduć siabie niepryhoža.
… kali ty znojdzieš narmalnuju pracu?
«Kali vam padabajecca vaša ciapierašniaja praca, možacie tak i skazać. Nie mohuć inšyja vyrašać za nas, jak nam žyć, kožny sam vyznačaje, što dla jaho narmalna, a što — nie. Adna historyja, kali ty dzicia i ŭ ciabie jość darosłyja, jakija niasuć za ciabie adkaznaść. Ale darosłyja ludzi sami raźbirajucca ŭ tym, što dla ich ok, a što — nie ok», — ličyć Skibskaja.
Pry žadańni možna spytać, ci jość u taho, chto pytajecca, niejkaja praca dla vas na prykmiecie, abo paviedamić «ja budu tabie ŭdziačny, kali ty dašleš mnie dobryja vakansii».
… jak heta ty nie pješ / nie jasi miasa / admaŭlaješsia ad bułačak / paściš?
Možna znoŭ pacikavicca, čamu čałaviek pra heta pytajecca. Abo, raić Natalla, možna skazać adkryta: tak, ja pryniaŭ dla siabie takoje rašeńnie, ja nie jem miasa ci nie ŭžyvaju ałkahol, maju takuju dyjetu. Naša reakcyja vielmi zaležyć ad taho, što my adčuvajem u adkaz na hetaje pytańnie. Byvaje, što surazmoŭca prosta skazaŭ łuchtu, možna razzłavacca i prosta jaho źniščyć, a možna praihnaravać, ale vyjści z hetaj historyi z mocnym asadkam. Takija vypadki ŭkazvajuć na našy ŭraźlivaści.
Čałaviek, jaki pytajecca, mahčyma, sam choča pierastać pić abo jeści miasa, i naš kateharyčny adkaz jon moža ŭspryniać jak napadki. Moža, čałavieku sapraŭdy cikava, jak vy da hetaha pryjšli. Darečy, zaŭsiody možna ŭziać bolš času i skazać, što adkažacie na hetaje pytańnie paźniej.
… kolki ty zarablaješ?
Na Zachadzie temu finansaŭ razhladajuć jak niešta asabistaje, ale ŭ nas, škaduje psichołah, pra heta zusim inšaje ŭjaŭleńnie. Pytańnie ŭ tym, kolki ŭ vas resursaŭ na adkaz. Samy prosty adkaz: moj zarobak — kamiercyjnaja tajamnica. Mahčyma, čałavieka prosta cikaviać zarobki ŭ vašaj śfiery, tamu ŭdakładnicie ŭ jaho, čamu jon pytajecca. Ale ž usio roŭna jamu naŭrad ci buduć płacić u vašaj śfiery roŭna stolki ž, kolki vam, tamu možacie akreślić sumu prykładna. Nasamreč u luby momant my možam skazać, što nie žadajem hutaryć na niejkuju temu, i kropka.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»«Tolki na pampiersy sychodzić kala 300 rubloŭ». Mamy ab tym, na što chapaje dziciačaj dapamohi
«Raniej ja pryjazdžała, sustrakałasia ź siabrami. Ciapier tam nikoha niama». Biełarusy raspaviali, jak admovilisia ad hramadzianstva RB
«Biurakratyčnaja pastka». Praz što prachodziać biełaruskija palitemihranty, u jakich za miažoj naradžajucca dzieci
voś samy karotki i lepšy adkaz