«Hienierał-major justycyi Uładzimir Šałuchin vyzvaleny ad pasady načalnika ŭpraŭleńnia Śledčaha kamiteta pa Mahiloŭskaj vobłaści», — paviedamiła pres-słužba Alaksandra Łukašenki 17 studzienia.
Što stała pryčynaj adstaŭki, nie paviedamlajecca.
Uładzimir Šałuchin u 1997 hodzie skončyŭ Biełaruski instytut pravaznaŭstva i pačaŭ pracavać u orhanach prakuratury. Doŭhi čas słužyŭ u Viciebsku, uznačalvaŭ upraŭleńnie Śledčaha kamiteta pa Viciebskaj vobłaści, u 2017-m, zusim maładym, atrymaŭ ad Łukašenki zvańnie hienierał-major, u 2019-m byŭ pieraviedzieny ŭ Mahiloŭskuju vobłaść.
U 2023 hodzie źniaty z pasady.
«Farmalna Šałuchina prybrali praz prablemy sa zdaroŭjem, charakternyja dla mnohich ludziej, čyjo dziacinstva prypała na čas Čarnobylskaj katastrofy, — skazali «Našaj Nivie» krynicy. — Ale sapraŭdnaj pryčynaj ličycca pravalenaja pravierka na łajalnaść siamji, u jakoj jasnaja pazicyja ŭ adnosinach da palityki Alaksandra Łukašenki».
«Vasil Šałuchin, baćka hienierała Šałuchina, — pryncypovy biełaruski patryjot», — skazaŭ nam infarmavany surazmoŭca.
Vasil Šałuchin z synam-hienierałam i ŭnukam. Fota: sacsietki
«Spadar Vasil śviadoma razmaŭlaje tolki pa-biełarusku, heta aktyŭny čałaviek, z pryncypami, jon niekali navat uznačalvaŭ viciebskuju filiju BNF «Adradžeńnie». Ciapier jon užo davoli pažyły i ciažka chvory čałaviek, ale svaim pryncypam nie zdradžvaje, jaho pazicyja jasnaja. Z synam jany kamunikacyju nie pieraryvali, ale i vybar syna jon nie asabliva razumieŭ. Što datyčyć Uładzimira, to jon byŭ biełarusam, jak ni dziŭna, niahledziačy na svaju pazicyju», — dadajuć znajomyja ź siamjoj.
Paśla padziej 2020-ha stali praviłam zvalnieńni tych siłavikoŭ i dziaržsłužačych, čyje svajaki pakidali podpisy za alternatyŭnych kandydataŭ abo prajavili svaju pazicyju na pratestach ci ŭ sacyjalnych sietkach. U adroźnieńnie ad raniejšych «praviłaŭ hulni», ciapier viernaści prarasijskaj dyktatury patrabujuć nie tolki ad samich aficeraŭ i čynoŭnikaŭ, ale i ad ich siamiej.
Isnuje vialikaja imaviernaść taho, što hienierał na novym miescy raboty ŭ orhanach nie ŭspłyvie, kažuć surazmoŭcy «Našaj Nivy». «Syn paciarpieŭ za baćku. Ale nie za Baćku», — iranizuje adzin ź ich.
52-hadovy Ivan Naskievič, jaki ŭznačalvaŭ Śledčy kamitet da sakavika 2021 hoda, paśla svajoj adstaŭki novaj pasady nie atrymaŭ. Naziralniki adznačali, što Naskieviča Alaksandr Łukašenka ličyŭ niedastatkova łajalnym, bo ŭ 2020 hodzie SK nie śpiašaŭsia z represijami, a niekatoryja śledčyja navat sprabavali źbirać źviestki pra hvałt siłavikoŭ.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
