Fota: ntv.com
Paśla dvuch mocnych ziemlatrusaŭ mahnitudami 7,7 i 7,6, jakija zakranuli 10 tureckich pravincyj, u Iskienderunie na poŭdni Turcyi (pravincyja Chataj) padniaŭsia ŭzrovień mora. Zatoplenyja vulicy, płoščy i darohi. Žychary i rabočyja evakuiravanyja. Taksama ŭłady evakuiravali niekatoryja miascovyja handlovyja placoŭki i banki.
Mora raźliłosia ŭ bok bulvara Miete Asłan. Vada padniałasia vyšej za bulvar i zapoŭniła vulicy i praśpiekty. Ludzi, jakija vychodzili na vulicy paśla ziemlatrusu, byli mocna hetym ździŭlenyja.
Damy na bierahavoj linii evakuiravany jak z-za ryzyki ziemlatrusu, tak i z-za ryzyki zatapleńnia.
Administracyja rajona Iskienderun papiaredziła žycharoŭ rehijona ab tym, kab jany nie ŭvachodzili ŭ paškodžanyja damy, a taksama ab prablemach, jakija mohuć uźniknuć z-za raźlivu mora ŭ prybiarežnaj zonie. Ludzi imknucca zastavacca ŭ parkach i zakrytych vuličnych rynkach paśla stychijnaha biedstva.
Fota: ntv.com
Ziemlatrusy, jakija adbylisia 6 lutaha, pa słovach prezidenta Erdahana, stali samymi razburalnymi z 1939 hoda. Pa apošnich danych, kolkaść achviar pryrodnaj katastrofy pieravysiła 9 tysiač čałaviek i praciahvaje raści.
Da 12 lutaha ŭ krainie abjaŭlena ahulnanacyjanalnaja žałoba, a ŭ zakranutych ziemlatrusami rehijonach na try miesiacy ŭviedziena nadzvyčajnaje stanovišča.
