Analizujučy skład hrupoŭki Zachodniaj vajennaj akruhi, jakaja sprabuje nastupać ad linii Svatava-Kramiannaja, ISW adznačaje adsutnaść u joj niekatorych tankavych častak, jakija naminalna pavinny tam być, i na hetaj asnovie robić zdahadku, što rasijanie adčuvajuć ciažkaści z papaŭnieńniem strat u braniatechnicy.
«Rasijskija siły amal dakładna majuć u reziervie kolki adnoŭlenych miechanizavanych častak, ale adpraŭka hetych abmiežavanych reziervaŭ na front u Łuhanskaj vobłaści naŭrad ci surjozna źmienić chod nastupu», — pišuć analityki ISW. Jany pradkazvajuć, što z uvodam apošnich reziervaŭ — kali heta zdarycca — nastup moža nabrać niejki chod, ale vydychniecca zadoŭha da taho, jak u rasijan atrymajecca dasiahnuć nie toje što namiečanych stratehičnych met, ale navat i prosta prykmietnych vynikaŭ.
Adnosna niedachopu braniatechniki ISW nahadvaje, što rasijanie stracili mierkavana da 16 tankavych pałkoŭ — i ciapier nie paśpiavajuć ramantavać i vypuskać novyja tanki ŭ patrebnym tempie.
«Adsutnaść adnoŭlenych tankavych pałkoŭ i bryhad, adnak, pazbaŭlaje suchaputnyja siły Rasii ŭdarnaj mocy, jakaja dazvoliła b ažyćciaŭlać praryvy i karystacca ich pładami — vierahodna, tamu Zachodniaja vajennaja akruha da hetaha času nijakich praryvaŭ nie zrabiła», — piša ISW.
