Fota: Netflix.com

Fota: Netflix.com

«Na Zachodnim froncie bieź pieramien» — novaja ekranizacyja znakamitaha ramana Erycha Maryi Remarka — atrymała pryzy BAFTA, u tym liku, za najlepšy film, najlepšuju režysuru, najlepšy adaptavany scenaryj, najlepšy film nie na anhlijskaj.

Novaśpiečany łaŭreat BAFTA, režysior filma Edvard Bierhier, prymajučy ŭznaharody za hety film pra Pieršuju suśvietnuju vajnu, nahadaŭ pra tych, chto ciapier zmahajecca za Ukrainu, a taksama raspavioŭ, što pieraadoleć sumnievy, ci bracca za hetuju karcinu, jamu dapamahła dačka Macilda, jakaja pračytała knihu Remarka ŭ škole.

Pa čatyry pryzy ad BAFTA atrymali filmy «Banšy Inišeryna» i «Ełvis» — bijahrafičnaja karcina pra Ełvisa Preśli.

Dakumientalny film pra atručeńnie Alaksieja Navalnaha, «Navalny», pryznany brytancami najlepšym dakumientalnym filmam hoda.

Pradziusar filma Adesa Rej u pramovie na cyrymonii nahadała pra bałharskaha žurnalista-rasśledavalnika Chrysta Hrozieva, jaki ŭdzielničaŭ u stvareńni filma, ale nie zmoh pryjechać na cyrymoniju ŭznaharodžańnia, pakolki brytanskaja palicyja paličyła heta niebiaśpiečnym.

Najlepšymi aktrysaj i akcioram druhoha płanu pa viersii BAFTA ŭ hetym hodzie stali Kery Kondan i Bary Kijon, jakija syhrali ŭ «Banšy Inišeryna», aŭtar scenaryja i režysior karciny Marcin Makdona atrymaŭ uznaharodu za najlepšy aryhinalny scenaryj, a akramia taho, hetamu va ŭsich adnosinach irłandskamu filmu dali pryz jak «vybitnaj brytanskaj karcinie».

Marcin Makdona na cyrymonii spačatku pažartavaŭ z hetaj nahody, ale potym patłumačyŭ, što film trapiŭ u katehoryju brytanskich, tamu što jaho finansavaŭ brytanski telekanał Channel 4.

Bajopik pra Ełvisa Preśli atrymaŭ pryzy za najlepšy padbor akcioraŭ, za dyzajn kaściumaŭ i za hrym, ale hałoŭnaje — Ościn Batler, jaki syhraŭ Ełvisa, staŭ najlepšym vykanaŭcam hałoŭnaj roli pa viersii BAFTA.

«Netfliks» ekranizavaŭ Remarka. Hladzieć i pierasłać spasyłku ŭsim rasijanam i łukašystam, jakich viedajecie

Клас
7
Панылы сорам
0
Ха-ха
0
Ого
0
Сумна
0
Абуральна
0