Mahiloŭskija ideołahi na naradzie. Fota: apr.gov.by

Mahiloŭskija ideołahi na naradzie. Fota: apr.gov.by

U Minsku pravilnaść ideałohii pad kantrolem Čamadanavaj

Za ideałahičny kirunak u Minsku adkazvaje byłaja pres-sakratarka Ministerstva ŭnutranych spraŭ, pałkoŭnik u zapasie Volha Čamadanava.

Jana zvolniłasia ź milicejskaha viedamstva ŭ 2021 hodzie, i amal adrazu jaje pryznačyli na pasadu načalnicy hałoŭnaha ŭpraŭleńnia ideałahičnaj raboty i pa spravach moładzi staličnaha harvykankama.

Na pytańnie pra sychod z MUS Čamadanava, kali jana ŭžo była ideołaham, niervova adkazała žurnalistu:

«Chočaš skazać, što Čamadanavu prymusili? Z Čamadanavaj uvohule takoje zdarycca nie moža — prymusić da niečaha».

Volha Čamadanava

Volha Čamadanava

Raniejšaje načalstva pakinuła Čamadanavaj prava nasić milicejskuju formu i znaki adroźnieńnia.

«Siońnia ja była nie ŭ formie, a ŭ cyvilnym adzieńni, ale nasić formu ja maju prava i mnie dazvolena. Kali spatrebicca, pryjdu na pracu ŭ Minharvykankam u pahonach», — zajaŭlała Čamadanava.

«Liču, što ja siońnia pryniasu jašče bolšuju karyść u płanie farmavańnia peŭnaj dumki ŭ hramadskaści, u hramadzian. Ja inicyjatyŭny čałaviek i miarkuju, što maja inicyjatyva i toj patencyjał, jaki jość, nie pavinny być abmiežavany tolki ministerstvam», — kazała Volha Čamadanava.

Ciapierašniaje jaje słužbovaje žyćcio nasyčanaje sustrečami z pradstaŭnikami pracoŭnych kalektyvaŭ dy ŭdziełam u čynoŭnickich naradach.

«Ciapier ni adna zmaharskaja impreza ŭ stalicy nie praskočyć!» — paviedamiŭ adzin z praŭładnych telehram-kanałaŭ pra funkcyi Volhi Čamadanavaj na novaj pasadzie.

U Hrodnie ideałohiju pilnuje były milicyjant, jaki źbiŭ na mašynie žančynu

U Hrodzienskim harvykankamie ideałahičny adździeł uznačalvaje z kastryčnika 2022 hoda pałkoŭnik milicyi ŭ adstaŭcy Uładzimir Saciuk.

Z pasady načalnika milicyi hramadskaj biaśpieki Hrodzienskaha abłvykankama Saciuk syšoŭ nieŭzabavie paśla taho, jak źbiŭ na mašynie žančynu.

Uładzimir Saciuk. Fota: UUS Hrodzienskaha abłvykankama

Uładzimir Saciuk. Fota: UUS Hrodzienskaha abłvykankama

Jon śćviardžaŭ, što «rasśledavańnie zavieršanaje i jon panios adkaznaść». Nasamreč, jaho vyzvalili ad adkaznaści, «uličvajučy chadajnictva paciarpiełaj», a taksama toje, što raniej jon nie pryciahvaŭsia da kryminalnaj adkaznaści, mieŭ stanoŭčuju charaktarystyku, pryznaŭ vinu i kampiensavaŭ škodu paciarpiełaj.

Aficyjna ź milicyi Saciuk zvolniŭsia «pa vysłuzie hadoŭ». Byłoha milicyjanta ŭ 2019 hodzie pryznačyli kiravać Hrodzienskim haradskim centram kultury.

Pry im u Hrodnie za paŭtara hoda da piensii zvolnili kiraŭnicu Hrodzienskaj vystavačnaj zały Irynu Silvanovič, jakaja vykazvałasia suprać hvałtu ŭ 2020 hodzie, pazbavili pamiaškańnia «Hrodzienski rok-kłub», jaki zasnavaŭ były palitviazień Ihar Bancar, praź niekatory čas likvidavali i samu arhanizacyju.

Paśla adbyćcia ssyłki ŭ kulturnaj halinie byłoha milicyjanta viarnuli ŭ vykanaŭčuju ŭładu.

U Homieli ideołah — były kiraŭnik miascovaha BRSM

U Homielskim harvykankamie ŭpraŭleńnie ideałahičnaj raboty ŭznačalvaje hadavaniec BRSM Mikałaj Śviatahor.

Čynoŭnik naradziŭsia ŭ Rečycy ŭ 1987 hodzie. U Homielskim techničnym univiersitecie jon vučyŭsia «prajektavańniu i vytvorčaści sielskahaspadarčaj techniki», a ŭ Akademii kiravańnia pry Łukašenku atrymaŭ śpiecyjalnaść «dziaržaŭnaje i miascovaje kiravańnie».

Śviatahor u Homieli kiravaŭ rajonnaj i haradskoj arhanizacyjami BRSM, pracavaŭ hałoŭnym śpiecyjalistam adździeła ideałahičnaj raboty ŭ administracyi Čyhunačnaha rajona abłasnoha centra.

Z 10 červienia 2020 hoda načalstvuje ŭ haradskim upraŭleńni ideałahičnaj raboty, kultury i pa spravach moładzi haradskoj administracyi.

Mikałaj Śviatahor. Fota: newsgomel.by

Mikałaj Śviatahor. Fota: newsgomel.by

U 2018 hodzie na vybarach u harsaviet byŭ zapisany jak siabra Kamunistyčnaj partyi Biełarusi. Paźniej u aficyjnych paviedamleńniach partyjnaja prynaležnaść čynoŭnika nie zhadvałasia.

U Homieli Śviatahor viadomy svajoj prychilnaściu da maštabnych imprezaŭ. Letaś jon z honaram anansavaŭ udzieł u śviatkavańni dnia horada rasijskaha śpievaka i prychilnika vajny va Ukrainie Aleha Hazmanava.

Mahiloŭskaha ideołaha praviarali pracaj u Škłovie

U Mahiloŭskim harvykankamie ideałahičny adździeł miesiac tamu ŭznačaliŭ 37-hadovy Alaksandr Ivanienka. Da hetaha jon mienš za hod adpracavaŭ namieśnikam kiraŭnika administracyi Kastryčnickaha rajona Mahilova.

Alaksandr Ivanienka. Fota: vestnikmogileva.bu

Alaksandr Ivanienka. Fota: vestnikmogileva.bu

Ivanienka rodam z Čavusaŭ. Jon vypusknik Mahiloŭskaha ŭniviersiteta imia Kulašova, dzie vyvučyŭsia na nastaŭnika fiziki. Nastaŭničaŭ u ahraharadku Malacičy Kryčaŭskaha rajona. U miascovaj škole ŭ 2008 hodzie jaho pastavili namieśnikam dyrektara pa vychavaŭčaj rabocie.

Z 2020-ha pa studzień 2022 hoda Alaksandr Ivanienka byŭ namieśnikam staršyni Škłoŭskaha rajvykankama.

Jon źviarnuŭ na siabie ŭvahu padčas ahitacyjnaj kampanii pa ŭniasieńni źmienaŭ u kanstytucyju.

Tady jaho padavali jak kaardynatara praŭładnaj arhanizacyi «Patryjoty Biełarusi». Małady čynoŭnik davodziŭ, što źmianieńnie asnoŭnaha zakona krainy «adpaviadaje duchu i normam siońniašniaha dnia».

U Viciebsku ideołah — byłaja nastaŭnica fiziki

U Viciebskim harsaviecie adździełam ideałahičnaj raboty kiruje vypusknica miascovaha ŭniviersiteta imia Mašerava Natalla Sakałova. Jana skončyła Akademiju kiravańnia pa śpiecyjalnaści «Dziaržaŭnaje kiravańnie sacyjalnaj śfieraj».

Sakałova pracavała nastaŭnicaj fiziki ŭ škole pasiołka Šumilina, a zatym pačała karjeru ŭ BRSM. Była pieršym sakratarom Pieršamajskaha rajkama hetaj arhanizacyi.

Natalla Sakałova. Fota: «Vićbičy»

Natalla Sakałova. Fota: «Vićbičy»

Z 2004 hodzie jaje «pieraviali» u adździeł ideałahičnaj raboty administracyi Pieršamajskaha rajona, a ŭ 2013-m žančyna jaho ŭznačaliła. U kastryčniku 2021-ha jaje pryznačyli kiravać adździełam ideałohii.

U Viciebsku Sakałovu charaktaryzujuć jak abačlivuju čynoŭnicu. Udzielničajučy ŭ aficyjnych imprezach, jana starajecca paźbiahać hučnych vykazvańniaŭ.

«Hety hod abjaŭleny Hodam miru i stvareńnia, — kazała čynoŭnica na ŭračystaści da sioletniaha Dnia abaroncy ajčyny. — Starejšaje i tym bolš maładziejšaje pakaleńnie nikoli nie mahło b padumać, što ŭ XXI stahodździ słova «mir» nabudzie novaje hučańnie — nakolki jon krochki. Jadnańnie maładoha pakaleńnia i starejšaha pakazvaje, što my ŭsie za mir».

Što ŭ Breście z kiraŭnikom pa ideałohii, niajasna

U Bresckim harvykankamie pasada kiraŭnika ideałahičnaha adździeła vyhladaje vakantnaj. Na sajcie haradskoj administracyi adsutničaje imia takoha načalnika.

12 listapada 2021 hoda staršynia harvykankama Alaksandr Rahačuk pastaviŭ kiravać adździełam Dzianisa Silivončyka, jaki da pryznačeńnia byŭ namieśnikam kiraŭnika.

«Dzianis Ivanavič — ź liku maładych i kreatyŭnych kiraŭnikoŭ, čyje enierhija i zapał nieabchodnyja haradskoj kiraŭničaj kamandzie», — kazaŭ Rahačuk pra Silivončyka.

Dzianis Silivončyk. fota: brestcity.com

Dzianis Silivončyk. fota: brestcity.com

Silivončyk — vypusknik Bresckaha techničnaha ŭniviersiteta, dzie vyvučaŭ technałohii mašynabudavańnia. Skončyŭ Akademiju kiravańnia pry Łukašenku pa śpiecyjalnaści «dziaržaŭnaje kiravańnie i prava».

Svaju karjeru čynoŭnika pačaŭ z BRSM. Byŭ pieršym sakratarom Maskoŭskaha rajkama i Bresckaha harvykankama hetaj arhanizacyi. Potym pracavaŭ u administracyi Maskoŭskaha rajona Bresta i ŭ harvykankamie.

Što ŭ rajcentrach?

U Babrujsku kiraŭnika ideałahičnaj raboty pamianiali ŭ 2021 hodzie. Na pasadu pryznačyli Vieraniku Vilčyk.

Jana naradziłasia ŭ 1988 hodzie ŭ Babrujsku. U Biełaruskim dziaržaŭnym univiersitecie vyvučała pravaznaŭstva.

Vieranika Vilčyk. Fota: komkur.info

Vieranika Vilčyk. Fota: komkur.info

U orhanach dziaržaŭnaha kiravańnia pracuje z 2013 hoda. Była namieśnicaj načalnika adździeła ideałahičnaj raboty. Paśla taho, jak jaje pryznačyli kiravać adździełam ideałohii, jana zakryła staronki ŭ sacyjalnych sietkach.

U Baranavickim rajvykankamie adździełam ideałahičnaj raboty z 28 kastryčnika 2022 hoda kiruje Julija Nalivajka.

Čynoŭnickuju karjeru jana pačała z pasady hałoŭnaha śpiecyjalista sielsavieta ŭ Baranavickim rajonie.

Julija Nalivajka. Fota: nashkraj.by

Julija Nalivajka. Fota: nashkraj.by

Była namieśnicaj načalnika adździeła ideałahičnaj raboty, pa spravach moładzi i kultury.

Paśla jaho rearhanizacyi stała kiraŭnicaj.

U Maładziečna za ideałahičnuju pracu adkazvaje 50-hadovaja Volha Klepakova. Na pasadu jaje pryznačyli 28 lutaha 2020 hoda.

Da hetaha jana 9 hadoŭ pracavała namieśnicaj staršyni kamisii pa spravach niepaŭnaletnich Maładziečanskaha rajvykankama.

Volha Klepakova. Fota: dompressy.by

Volha Klepakova. Fota: dompressy.by

Čynoŭnica naradziłasia ŭ Maładziečnie, skončyła fakultet słavianskaj fiłałohii Mahiloŭskaha ŭniviersiteta imia Kulašova. 

Pavodle aficyjnych źviestak, da 2011 hoda pracavała va ŭstanovach adukacyi Maładziečanskaha rajona.

U Salihorskim rajvykankamie bolš za šeść hadoŭ kiruje adździełam ideałahičnaj raboty Taćciana Kirbaj. Pasadu jana zajmaje z kastryčnika 2016 hoda.

Taćciana Kirbaj. Fota: soligorsk-news.by

Taćciana Kirbaj. Fota: soligorsk-news.by

Taćciana Kirbaj — z Salihorska. U 1989 hodzie jana skončyła miascovuju škołu №1, paśla — piedahahičny ŭniviersitet imia Maksima Tanka. Karjeru dziaržaŭnaj słužačaj pačała ŭ 2006 hodzie z pracy ŭ rajonnym adździele adukacyi, sportu i turyzmu.

U Połacku ŭ 2020 hodzie, kali jašče tryvała pratesnaja aktyŭnaść, zvolniŭsia kiraŭnik adździeła ideałahičnaj raboty Dzianis Hudkin. Pryčyny takoha ŭčynku nieviadomyja.

Na jaho miesca pryznačyli dyrektarku miascovaha Centra dziaciej i moładzi Irynu Dziominavu.

Pra čynoŭnicu vobmal infarmacyi, navat na sajcie rajvykankama «zaciortyja» źviestki pra jaje pryznačeńnie.

Iryna Dziominava. Fota: sacyjalnyja sietki

Iryna Dziominava. Fota: sacyjalnyja sietki

Dziominava skončyła škołu №14 Połacka ŭ 1994 hodzie. U joj ža vučyŭsia były ministr adukacyi Ihar Karpienka. Abodva ličacca vybitnymi jaje vypusknikami.

Dziominava staršyniuje ŭ rajonnaj arhanizacyi abjadnańnia «Biełaja Ruś».

«Zavistlivyje złopychanija krys». Rajonki Mahiloŭščyny družna apublikavali artykuły, jak kiepska žyviecca biełarusam u emihracyi. Čytać heta — asałoda

Sprabavała palepšyć imidž MUS, a ŭ vyniku zakapała jaho jašče hłybiej. Što viadoma pra Volhu Čamadanavu, jakaja atrymała pavyšeńnie

Milicejski načalnik z Hrodna na svaim aŭto źbiŭ žančynu

Клас
0
Панылы сорам
10
Ха-ха
2
Ого
1
Сумна
2
Абуральна
11