Viadoma, što sud Centralnaha rajona Homiela 15 žniŭnia 2022 hoda vynies vyznačeńnie, zhodna ź jakim u dačynieńni da palitźniavolenaha Ihara Alchova prymianiŭ prymusovyja miery biaśpieki i lačeńnia ŭ vyhladzie źmiaščeńnia ŭ psichijatryčny stacyjanar sa strohim nahladam.
Nibyta jon u stanie nieprytomnaści ździejśniŭ hramadska-niebiaśpiečnyja dziejańni, a mienavita — akt teraryzmu (č. 1 art. 289) i abrazu Alaksandra Łukašenki (č. 1 art. 368).
Jak paličyła śledstva, Ihar Alchoŭ, nibyta chacieŭ u metach pieraškody palityčnaj dziejnaści, zastrašvańnia nasielnictva i destabilizacyi hramadskaha paradku ŭzarvać administracyjny budynak u Homieli pa vulicy Bileckaha (viadoma, što tam mieścicca abłasnoje ŭpraŭleńnie KDB), dziela čaho aznajomiŭsia na adnym ź jutub-kanałaŭ sa sposabami vyrabu vybuchovych rečyvaŭ. Zatym nabyŭ nieabchodnyja kampanienty dla ich vyrabu, u tym liku dla sumiesievych składaŭ typu «akiślalnik plus haručaje» i pryhatavaŭ takuju sumieś. Paźniej sprabavaŭ nabyć radyjopult dla inicyjavańnia zaradaŭ samarobnych vybuchovych pryład na adlehłaści, adnak jaho dziejnaść była spynienaja pravaachoŭnymi orhanami.
Jon ža, publična ŭ nieprystojnaj formie abraziŭ, pryniziŭ honar i hodnaść Łukašenki. Alchoŭ ułasnaručna napisaŭ tekst, ahučyŭšy i zafiksavaŭšy jaho z dapamohaj nieŭstanoŭlenaj videazapisvajučaj pryłady, paśla čaho adasłaŭ hety videazapis nie mienš čym dvum karystalnikam miesendžara telehram.
Sudovy praces nad Alchovym pačaŭsia jašče jašče 26 traŭnia i z doŭhimi pierapynkami doŭžyŭsia da 15 žniŭnia 2022 hoda. U vyniku suddzia Centralnaha rajona Homiela Siarhiej Karmanovič vynies vyznačeńnie ab nakiravańni jaho ŭ RNPC psichičnaha zdaroŭja ŭ Navinki. Pakolki paśla vynikaŭ psichijatryčnaj ekśpiertyzy u Alchova byli «vyjaŭlenyja parušeńni ŭ psichičnaj śfiery, i na čas ździajśnieńnia złačynstva jon nie moh uśviedamlać značeńnie svaich dziejańniaŭ, byŭ nie zdolny da adekvatnaha ŭsprymańnia rečaisnaści».
Manavita ŭ Navinkach, na terytoryi RNPC, isnuje psichijatryčny stacyjanar sa strohim nahladam. Z raźvićcia padziej vynikaje, što Alchoŭ pasprabavaŭ ździejśnić adtul pabieh.
Novuju kryminalnuju spravu pa fakcie ŭciokaŭ ź psichijatryčnaha stacyjanara sa strohim nahladam razhladaje ŭ Minskim rajonnym sudzie Ihar Ihlikaŭ.
Alchova sudziać jak «asobu, jakaja ździejśniła hramadska niebiaśpiečnaje dziejańnie, praduhledžanaje kryminalnym zakonam, u stanie biesśviadomaści, abo jakaja zachvareła paśla ździajśnieńnia złačynstva na psichičnaje zachvorvańnie (p. 13 art. 6 KPK)». Pasiadžeńnie pryznačanaje na 27 sakavika.
