Apošni čas prachodžańnie miažy moža zajmać kala sutak. Fota: gpkgovby / Telegram
Što čuvać na biełaruska-polskaj miažy
Siaredni čas pierasiačeńnia miažy praz «Varšaŭski most» z boku Bresta — kala 15—18 hadzin. Apošnim časam prachodžańnie miažy moža zajmać kala sutak, taksama byvajuć vypadki, kali pierasiačeńnie zajmaje kala 5—8 hadzin, i ŭ asnoŭnym heta adbyvajecca ŭ subotu.
Za apošni tydzień polski bok dla ŭjezdu ŭ Polšču za sutki afarmlaje prykładna 600—650 mašyn. Vyjazdžaje praz «Tarespal» kala 700—800 aŭto.
Pry płanavańni pajezdki praz Brest, varta ŭziać pad uvahu, što pierš čym zajechać na miažu, treba prastajać try hadziny ŭ čarzie: da zony čakańnia, u samoj zonie čakańnia i paśla zony čakańnia (pierad šłahbaumam na zajezd na miažu). Tamu, kali ŭ zonie čakańnia niama mašyn, heta absalutna nie značyć, što transpart moža patrapić na miažu.
Apošnija dni pahoršyłasia situacyja z prachodžańniem miažy na aŭtobusie. U subotu 11 sakavika prachodžańnie dźviuch miežaŭ zajmała da 15 hadzin, a polski bok afarmlaŭ 1—2 aŭtobusy za hadzinu. Tamu, kali ŭ čałavieka samalot u Varšavie, varta płanavać pajezdku jak minimum za sutki da vyletu.
Šmat chto źviartaje ŭvahu, što časta ŭ čerhach stajać biełaruskija mašyny na 5-m ci 7-m rehijonach, i niekatoryja ŭ čarzie nie razumiejuć, navošta jany siudy jeduć, kali prajezd praź Litvu našmat chutčejšy. Ale adkaz prosty: u mnohich da hetaha času pradoŭžanyja vizy, pa jakich jany mohuć pierasiakać miažu tolki ŭ polskim napramku.
Što adbyvajecca na biełaruska-litoŭskaj miažy
Vialiki patok pierakinuŭsia z polskaj miažy na litoŭskuju. Pry hetym litoŭcy bolš mašyn usio roŭna nie afarmlajuć.
Bolš za ŭsio napružanaja situacyja stała na pierachodzie «Bieniakoni — Šalčyninkaj», raniej jon byŭ samym chutkim. Ciapier, kab chutčej prajści miažu, treba vybirać pierachody, jakija znachodziacca dalej ad Polščy. Naprykład, «Katłoŭka — Łavaryškies», «Vidzy —Tviaračus» ci łatvijski pierachod «Urbany — Silene».
Prajezd u bok Litvy praz punkt «Pryvałka» samy pavolny, za sutki prajazdžaje tam kala 200 mašyn. Kali vy bačycie infarmacyju, što ŭ punkcie propusku «Pryvałka» niama mašyn da šłahbauma (niama zony čakańnia), to na samoj miažy moža być kala 50 aŭto, i prachodžańnie miažy zojmie minimum šeść hadzin. Prachodžańnie z čarhoj da šłahbauma zajmaje ad 10 hadzin da 18 hadzin.
Pry viartańni dadomu praz punkt «Rajhardas» utvarajecca adna čarha da šłahbauma, ale ŭ asnoŭnym usie stajać na čyrvony kanał u litoŭcaŭ dla afarmleńnia TAX-FREE, tamu kali vam na zialony, to časta dazvalajuć prajazdžać biez čarhi, i prachodžańnie zajmaje da hadziny.
Niadziela pa-raniejšamu samy zahružany dzień dla vyjezdu ź Biełarusi, i prahnazujecca, što situacyja ŭ niadzieli budzie tolki paharšacca, bo kolkaść viełasipiedystaŭ budzie raści.
Kali lepš za ŭsio viartacca ŭ Biełaruś
Naprykład, kab chutčej viarnucca ŭ Biełaruś, na miažu treba pryjazdžać ranicaj da hadzin 10—11 pa biełaruskim časie (uličvajem pieravod hadzińnikaŭ na letni čas).
Piatnica — adzin z samych zahružanych dzion dla viartańnia ŭ Biełaruś. Z 7 ranicy piatnicy da 7 ranicy suboty viartajecca kala 800 aŭto i kala 80 aŭtobusaŭ.
Dla vyjezdu ź Biełarusi lepš za ŭsio vybirać subotu ŭ paślaabiedzienny čas. Rekamiendujem pierad vyjezdam čytać Telegram-čat i paviedamleńni karystalnikaŭ pra aktualnuju situacyju na pierachodach.
Čytajcie taksama:
Jak źmianilisia ceny na šop-tury ŭ Biełastok i kolki ciapier stajać na miažy
Da čaho pryviadzie zakryćcio «Babroŭnikaŭ»
Polšča zakryvaje punkt propusku «Babroŭniki» «ź mierkavańniaŭ nacyjanalnaj biaśpieki»
