23 sakavika možna było zadekaryravać talerku ci luby posud u technicy trafaret. I stać uładalnikam unikalnaha ekspanata. Pryjści moh luby achvotny, prachod na majstar-kłas — bilet na vystavu «Farforavaje asarci». Adzinaja ŭmova — uziać z saboj pradmiet dla dekoru, paviedamlaje ahienctva «Minsk-Novosti».
Viedami i dośviedam dzialiłasia mastačka Natalla Kierus. Jaje pracy možna ŭbačyć na vystavach, kirmašach aŭtarskich vyrabaŭ «Młyn», «Harošak Markiet», «Sarafan».
Byli i tyja, chto ŭžo prychodziŭ na taki majstar-kłas raniej. Im nastolki spadabaŭsia praces i vynik, što ludzi viarnulisia, kab hetym razam upryhožyć talerki dla jajek u padarunak blizkim da Vialikadnia i paabiacali naviedać nastupny majstar-kłas, dzie buduć raśpisvać jajki ŭ technicy pisanki.
Niechta stvaraŭ cełyja nabory. Naprykład, kružka i spodak u biełaruskim styli.
— Jak pakazała praktyka, ludzi čaściej za ŭsio vybirajuć mienavita trafarety ź biełaruskim arnamientam, simvolikaj, a taksama z vyjavaj vasilka. Što datyčyć koleraŭ, to heta ŭltramaryn, sini, bieły, čyrvony i vasilkovyja adcieńni, a jašče vialikaj papularnaściu karystajecca załaty koler, asabliva na čornym fonie ci na ciomna-sinim, — padzialiłasia nazirańniami Kierus.
Nieabaviazkova było prychodzić z novym posudam, prychodzili i sa starymi talerkami, jakija ŭžo nadakučyli, i haspadary vyrašyli dać im druhoje žyćcio. U vyniku atrymałasia novaja dyzajnierskaja, stylnaja talerka.
Majstar-kłas nie maje abmiežavańniaŭ pa ŭzroście. Za adnym stałom sabralisia babula z unučkaj, maładyja dziaŭčaty, try aktyŭnyja siabroŭki-piensijanierki… I absalutna ŭ kožnaha svajo bačańnie, svajo spałučeńnie linij, uzoraŭ i koleraŭ.
Samaje častaje pytańnie nastaŭnicy: a ci možna z takoha posudu jeści? Na što mastačka adkazvaje:
— Usio zaležyć ad miesca, dzie nanosiać malunak. Kali heta šklanaja talerka, i my robim rośpis praz trafaret z advarotnaha boku, a vonkavy bok, ź jakoha jamo, zastajecca niekranutym, to takoj talerkaj možam spakojna karystacca. A voś kali nanosić farbu na hety bok posudu, to malunak treba abaviazkova pakryć hipaalerhiennym łakam, paśla čaho jon stanie prydatnym dla praduktaŭ.
A jašče mastačka raskazała, što zadekaryravać talerku ŭ technicy trafaret moža luby, navat toj, chto nikoli pendźlikaŭ u rukach nie trymaŭ. Dastatkova mieć hubku, farby i trafaret. Nieabaviazkova kuplać akryłavyja ci alejnyja farby, možna vykarystoŭvać huaš, adzinaje, što paśla vysychańnia jana moža paciamnieć. Možna brać jak kieramičny posud, niehłaziravany, tak i emalavanyja, šklanyja i parcalanavyja pradmiety, tolki na ich papiarednie treba nanieści lubuju hruntoŭku.
Nastupnaj temaj majstar-kłasaŭ, jakija adbuducca 6 i 13 krasavika, stanie rośpis abiarehavych jajek u technicy pisanki z majstram narodnaj tvorčaści Hannaj Klimovič. Zatym 10 i 17 krasavika Volha Chačkoŭskaja zaprašaje navučycca rośpisu jajek voskam u technicy pisanki.
Čytajcie taksama:
U Minsku adkryvajecca vystava Zachara Kudzina
Minkult admianiŭ kinafiestyval «Niefiltravanaje kino» za dva dni da pačatku
