U pieršapačatkovym varyjancie zakonaprajekt praduhledžvaŭ spynieńnie padačy dakumentaŭ na vizy, časovyja dazvoły na žycharstva dla biełarusaŭ i rasiejcaŭ, za vyklučeńniem tych, jakija robiacca pry pasiarednictvie litoŭskaha MZS. Dla tych, chto ŭžo maje vizy ci dazvoł na žycharstva, abmiežavańniaŭ niama.
Taksama ŭ pieršapačatkovym varyjancie prapanoŭvałasia spynić pryjom dakumentaŭ na atrymańnie litoŭskaha hramadzianstva dla biełarusaŭ i rasiejcaŭ. Paźniej abmiežavańni ŭ atrymańni hramadzianstva dla biełarusaŭ prapanavała nia ŭvodzić častka deputataŭ. Adpaviednaja papraŭka pastupiła ŭ Sejm, i deputaty buduć jaje razhladać.
«Zakon nie pavinien stvarać prablem ludziam, jakija nie niasuć ryzyki»
Deputat Sejmu Litvy Tomas Tamilinas ličyć, što papraŭki ŭ zakonaprajekt musiać unieści jasnaść. Na jaho dumku, hety zakon nie pavinien stvarać prablem ludziam, jakija nie niasuć ryzyki dla Litvy.
«Finalnaje hałasavańnie moža adbycca praz dva tydni. Zaraz pastupili papraŭki, jakija palapšajuć sytuacyju i mianiajuć sutnaść niekatorych pałažeńniaŭ. Ja tak razumieju, što papraŭki dapamohuć. Liču, što musić być lohika.
Kali jość rekamendacyja z boku litoŭskaj dziaržavy, jasnaja meta znachodžańnia čałavieka tut, to ŭ jaho nie pavinna ŭźnikać składanaściaŭ. Kali niama ryzyki, to navošta ludziam psavać žyćcio? Ryzyki treba analizavać bolš staranna i bolš dakładna», — ličyć Tomas Tamilinas.
Taksama jon adznačaje, što hety zakonaprajekt nakiravany najpierš na biaśpieku Litvy, a ŭ zakonaprajekcie prapisana toje, što «i tak adbyvajecca na praktycy».
«Idzie vajna, ciapier surjoznaja sytuacyja; kožnaja kraina, asabliva maleńkaja, starajecca źmienšyć ryzyki dla siabie, kali ludzi mihrujuć, kali ludzi adkryvajuć biznes. Šmat rašeńniaŭ i pracedur, prapisanych u zakonaprajekcie, isnujuć i ciapier, i heta asnoŭnaja častka hetaha zakonaprajektu», — kaža deputat.
«Niama źmienaŭ u staŭleńni da biełarusaŭ»
Tomas Tamilinas pazytyŭna aceńvaje toj fakt, što ciapier vakoł zakonaprajektu pačałasia dyskusija i ludzi zaanhažavanyja ŭ jaje, bo «ŭ demakratyčnaj krainie možna dyskutavać i źmianiać niejkija chiby ŭradu».
Taksama jon adznačaje, što staŭleńnie da biełarusaŭ u Litvie nie źmianiłasia z pačatku vajny.
«Ja tut nie adčuvaŭ nijakich źmienaŭ u dačynieńni da biełarusaŭ. Źmianiłasia staŭleńnie da biełaruskaj dziaržavy i dyktatara, što lahična. Palityki nie zajmajucca niejkim raspalvańniem varožaści, idzie hutarka pra toje, jak nam razam zmahacca z Łukašenkam i Pucinym i jakija sankcyi ŭvodzić. Tak, sankcyi bjuć pa prostych biełarusach, prostych rasiejcach. Kali sankcyi masavyja, to jany ŭździejničajuć na hramadzian, inakš prosta nie byvaje», — havoryć Tomas Tamilinas.
Pieršapačatkova deputaty masava padtrymali zakonaprajekt, za jaho prahałasavali 113 deputataŭ, 9 ustrymalisia. Paźniej źjaviŭsia šerah papravak da zakonaprajekta.
Čytajcie taksama:
Ofis Cichanoŭskaj prakamientavaŭ novy zakon, jaki mohuć pryniać pa biełarusach u Litvie
U Litvie chočuć prypynić pryjom zajaŭ na hramadzianstva ad biełarusaŭ i rasijan
