Pavodle źviestak MNS, ad vybuchu paciarpieli try damy. Miascovyja žychary dasłali heta fota telehram-kanału «ČP Tuła»
Paviedamlajecca, što kompleks REB «Pole-21» vyvieŭ z ładu sistemu navihacyi bieśpiłotnika, u vyniku čaho jon, straciŭšy aryjentacyju, upaŭ u rajonie nasielenaha punkta Kirejeŭsk Tulskaj vobłaści.
Vybucham byli paškodžanyja try šmatkvaternyja damy i paciarpieli try čałavieki, paviedamili miascovyja ŭłady.
Pavodle papiaredniaj viersii, pryčynaj vybuchu staŭ bieśpiłotnik z bojeprypasami, paviedamiła RIA «Naviny» sa spasyłkaj na MNS Rasii.
Ahienctva TASS sa spasyłkaj na krynicy ŭ siłavych viedamstvach piša, što havorka idzie pra ŭkrainski BPŁA Tu-141 «Stryž», jaki, mahčyma, byŭ načynieny vybuchoŭkaj.
Raniej MNS zajaviła, što vybuch prahučaŭ u 15:19.
Varonka, jakaja ŭtvaryłasia ŭ vyniku padzieńnia bieśpiłotnika, i, jak miarkujecca, jaho askołak. Fota: «ČP Tuła»
«Dvoje paciarpiełych — 2002 hoda i 2006 hoda naradžeńnia, u ich askołačnyja rany, chutkaja [dapamoha] na miescy», — paviedamiła viedamstva. Paźniej miascovyja ŭłady dadali, što kolkaść paranienych askołkami ŭzrasła da troch.
Miascovyja ŚMI i telehram-kanały publikujuć kadry z horada, na jakich bačnaja varonka ad vybuchu.
Dyjamietr varonki składaje ad 10 da 15 mietraŭ, hłybinia — ad 5 da 8 mietraŭ.
Paviedamlajecca taksama, što, akramia žyłych damoŭ, było častkova razburana čatyry haspadarčyja pabudovy.
