U niekalkich rajonach stalicy Sudana Chartumie čutnaja stralba, na vulicach razhornutaja vajennaja technika i harmaty artyleryi, huki stralby čutnyja blizu štab-kvater armii dziaržavy i inšaj siłavoj struktury — sił chutkaha reahavańnia (SRF), piša Reuters.
SRF abvinavaciła armiju ŭ «žorstkim napadzie», paviedamiŭšy, što tyja akružyli adnu ź jaje baz i adkryli ahoń ź ciažkich harmat. Arhanizacyja ŭdakładniła, što havorka idzie pra «šyrokamaštabnuju ataku» z užyvańniem roznych vidaŭ uzbrajeńnia.
Pry hetym u sudanskaj armii abvinavačvajuć SRF u atacy na vajskovyja pasty. Surazmoŭca Al Jazeera ŭ vojsku raspavioŭ, što siły chutkaha reahavańnia pasprabavali ŭziać šturmam štab Hałoŭnaha kamandavańnia.
Miascovyja žychary raspaviali Al Jazeera pra sutyknieńni i pierastrełki vajskoŭcaŭ, žurnalist telekanała raspavioŭ taksama pra słupy dymu ŭ roznych častkach stalicy Sudana. Pavodle źviestak telekanała, mižnarodny aeraport stalicy Sudana prypyniŭ pracu.
Siły chutkaha reahavańnia arhanizavanyja na bazie apałčencaŭ «Džandžavid» (u pierakładzie z arabskaj — «Džyn na kani»), jakija ŭdzielničali ŭ paŭstańni ŭ rehijonie Darfur na zachadzie Sudana ŭ 2003 hodzie. Pravaabaroncy abvinavačvajuć bajcoŭ hetaj arhanizacyi ŭ vajennych złačynstvach, siarod jakich katavańni, zhvałtavańni i zabojstvy mirnych žycharoŭ.
U 2019 hodzie SRF abjadnałasia z armijaj Sudana dla źviaržeńnia prezidenta Amara Chasana al-Bašyra, jaho adchilili ad ułady i aryštavali. Abiedźvie arhanizacyi ździejśnili jašče adzin pieravarot u kastryčniku 2021 hoda. Vajskoŭcy adkryli ahoń pa pratestoŭcach. Zahinuli nie mienš za 120 čałaviek, u ŚMI heta nazvali Chartumskaj raźnioj.
