Ministr achovy zdaroŭja Žarko

Ministr achovy zdaroŭja Žarko

Kali paraŭnać kolkaść śmierciaŭ ad hrypu A (H1N1) u Biełarusi z kolkaściu vyjaŭlenych chvorych, pracent śmiarotnaści ŭ nas nadzvyčaj vysoki. Suśvietny pakazčyk składaje 0,4%, a ŭ Biełarusi vychodzić 5,4%. Piša Volha Žarnasiek.

Ad pačatku masavaha zachvorvańnia na hryp i VRVI žychary krainy aburalisia adsutnaściu aficyjnaj infarmacyi. Naradžalisia čutki, składalisia nievierahodnyja prahnozy. Čynoŭniki vahalisia miž tradycyjaj zamoŭčvańnia vypadkaŭ zachvorvańnia na śviny hryp i abaviazkam ahučvać padobnyja fakty.

Abaviazak (a moža i krytyka niezaležnych ŚMI) prymusiŭ nazvać ličby.

Litaralna za tydzień Biełaruś pieratvaryłasia z vostrava, jaki nie zachłynuła suśvietnaja epidemija hrypu A (H1N1), u krainu, dzie zarehistravana bolš za 100 takich vypadkaŭ.

4 listapada namieśnik ministra achovy zdaroŭja - hałoŭny sanitarny lekar krainy Valancina Kačan u teleefiry zajaviła, što ŭ siami ź dzieviatnaccaci pamierłych za apošnija dva tydni ad pnieŭmanii vyjaŭleny virus śvinoha hrypu. Taksama jana ahučyła i ahulnuju ličbu chvorych na hety hryp — 85 vypadkaŭ (39 — na 30 kastryčnika, 50 — na 1 listapada).

Najvyšejšaje «dabro» na aficyjnaje pryznańnie isnavańnia śvinoha hrypa ŭ krainie prahučała padčas sustrečy Alaksandra Łukašenki ź Viktaram Juščankam.

«Pa‑śviniačy piščyć uvieś śviet. Biełaruś i Ukraina — nie vyklučeńnie. Treba supakoicca i žyć. Heta zvyčajnaja pravakacyja farmaceŭtyčnych kampanii i ich žadańnie zarabić na čałaviečaj biadzie,» — zajaviŭ Łukašenka. Paśla hetaha pačałosia rehularnaje infarmavańnie nasielnictva pra ličbu chvorych (jak na sivny hryp, tak i na zvyčajny) i prafiłaktyku.

5 listapada ŭ parłamiencie vystupiŭ ministr achovy zdaroŭja Vasil Žarko. Jon skazaŭ, što abviaščać epidemiju hrypa A (H1N1) u krainie niama padstavy. Što pryniatyja miery, kab nie dapuścić raspaŭsiudu hrypa i VRVI.

6 listapada pastanovaj namieśnika hałoŭnaha sanitarnaha doktara Minska byli ŭviedzieny supraćepidemičnyja mierapryjemstvy (biez abjaŭleńnia epidemii). Hetaja pastanova zabaraniła masavyja mierapryjemstvy i abaviazała rabić pravietryvańnie dy vilhotnuju ŭborku pamiaškańniaŭ, a ŭ vypadku ciažkich formaŭ hrypu i VRVI dastaŭlać analizy pacyjentaŭ u Respublikanski navukova‑praktyčny centr epidemijałohii i mikrabijałohii.

Byŭ apublikavany i zvarot ministra Žarko da kiraŭnikoŭ arhanizacyj, jakija handlujuć lekami. Adznačałasia, što ŭ Ministerstva achovy zdaroŭja pastupajuć skarhi pra niekvalifikavanaje kansultavańnie rabotnikami aptek. Ministr nahadaŭ, što farmaceŭty taksama niasuć adkaznaść za vynik lačeńnia jak i inšyja rabotniki achovy zdaroŭja.

Na vychodnych, pavodle słoŭ Valanciny Kačan lik zvarotaŭ u palikliniki źniziŭsia na 4—25% (u zaležnaści ad nasielenych punktaŭ). U efiry telebačańnia jana ahučyła, što łabaratorna paćvierdžanyja 102 vypadki zachvorvańnia na hryp A (H1N1). Prakamientavała i paniku ŭ stalicy. «U Minsku składvajecca asablivaja situacyja, ale jana kantralavanaja, i siońnia navat ŭ hetym horadzie my nazirajem źnižeńnie kolkaści zvarotaŭ hramadzian z nahody hetych zachvorvańniaŭ», —zajaviła Kačan.

Pres‑słužba Homielskaha abłvykankamu paviedamiła ahienctvu BiełaPAN, što na dadzieny momant ad pnieŭmanii tam pamierła 8 čałaviek, naohuł ža hetaja chvaroba dyjahnastavana ŭ 827 čałaviek. Pavodle ich infarmacyi, u Biełarusi praciahvajecca ŭzdym zachvorvańnia na hryp i vostryja reśpiratornyja infiekcyi, u toj čas jak sanitarna‑epidemijałahičnaja słužba adznačaje pamianšeńnie kolkaści zachvorvańniaŭ.

Słovy epidemijałahičnaj słužby i Ministerstva achovy zdaroŭja šmat u kaho vyklikajuć niedavier.

Padmacoŭvajuć jaho nieaficyjnyja źviestki pra šmatlikija letalnyja sychody ad zahadkavaj pnieŭmanii. Asobnyja fakty ahučvajucca ŭ błohach daktarami. Maŭlaŭ, zamiest pnieŭmanii ich prymušajuć upisvać u paśviedčańni ab śmierci inšyja pryčyny.

Da taho ž, kali paraŭnać kolkaść śmierciaŭ ad hrypu A (H1N1) u Biełarusi (7 pamierłych siarod 128 chvorych na 10 listapada) z suśvietnaj, pracent śmiarotnaści ŭ nas dosyć vysoki.

Suśvietny pakazčyk składaje 0,4%, a ŭ Biełarusi vychodzić 5,4%.
Uličvajučy suśvietnuju statystyku, chvorych na hryp u Biełarusi pavinna być u niekalki razoŭ bolej. Niestykoŭka, jakuju nielha patłumačyć ničym inšym, jak chavańniem sapraŭdnaj situacyi.

Sioletniaja epidemija dakazała, što chavać jak asobnyja, tak i masavyja vypadki stała niemahčyma — internet zvodzić takija sproby na nul. Presa damahłasia chacia b taho, što ŭłady pryznali: śviny hryp u Biełarusi isnuje i ludzi ad jaho pamirajuć. A voś realnyja maštaby chvaroby zastajucca pakul tajamnicaj.

Volha Žarnasiek

Клас
0
Панылы сорам
0
Ха-ха
0
Ого
0
Сумна
0
Абуральна
0