Pavodle acenak Kirbi, nastupalnaja apieracyja Rasii na Danbasie skončylisia pravałam. «Sproba Rasii ažyćciavić nastup na Danbasie ŭ asnoŭnym praz Bachmut pravaliłasia», — zajaviŭ pradstaŭnik Biełaha doma.
«Cana hetych sprobaŭ, asabliva ŭ Bachmucie, była prosta nievierahodna vysokaj», — skazaŭ pry hetym Kirbi. Jon zajaviŭ, što ŭ vyniku Rasija «źniasiliła svaje vajskovyja zapasy i Uzbrojenyja siły» — pry tym, što «abstreły i bai ŭ Bachmucie išli zadoŭha da śniežnia».
«Ale pa našych padlikach, tolki sa śniežnia kolkaść strat Rasii skłała bolš za 100 tysiač čałaviek, u tym liku bolš za 20 tysiač zabitymi, — zajaviŭ pradstaŭnik Rady nacyjanalnaj biaśpieki ZŠA. — Amal pałova [zahinułych] — «vahnieraŭcy», bolšaść ź jakich byli rasijskimi źniavolenymi, kinutymi na bitvu ŭ Bachmucie biez dastatkovaha bajavoha dośviedu, bajavoj padrychtoŭki, bajavoha kamandavańnia i jakoha-niebudź padabienstva arhanizacyjnaha i kamandnaha paradku».
Pry hetym nazvać amierykanskuju acenku ŭkrainskich strat Kirbi admoviŭsia: «Jany tut achviary, Rasija — ahresar». Pa słovach čynoŭnika, Bieły dom nie budzie publikavać infarmacyju, jakaja ŭskładniaje stanovišča Ukrainy i jaje armii.
U niadaŭnich sakretnych dakumientach Pientahona było skazana, što pa stanie na 1 sakavika ahulnyja straty Rasii na vajnie zabitymi aceńvalisia ad 35 tysiač da 43,5 tysiačy, a Ukrainy — 16—17 tysiač. Dakładnaść hetych dakumientaŭ kančatkova nie paćvierdžana.
Dyrektar rasijskaj prahramy ŭ centry vajskova-marskoha analizu ZŠA Majkł Kofman miarkuje ŭ tvitary, što rasijskija straty, pra jakija kaža Kirbi, — heta «vierchni paroh śpiektra acenak», a jaho nižni paroh, imavierna, składaje blizu 80—85% ad nazvanaj Biełym domam ličby.
Čytajcie taksama:
«Bolš, čym vojska Čechii abo Vienhryi». USU raspaviali, kolki rasijan vajuje pad Bachmutam
Kamandujučy Uschodniaj hrupoŭkaj vojsk USU patłumačyŭ, čamu jany praciahvajuć utrymlivać Bachmut
