Pa vynikach studzienia—kastryčnika 2009 hoda vałavy ŭnutrany pradukt Biełarusi skaraciŭsia na 1% u paraŭnańni z anałahičnym letašnim pieryjadam, paviedamlaje Nacyjanalny statystyčny kamitet.

U studzieni—vieraśni VUP źmienšyŭsia na 0,3%, u studzieni—žniŭni — na 0,5%. Dahetul z pačatku hoda aficyjna fiksavaŭsia nievialiki rost: u studzieni — na 2,6%, studzieni—lutym — na 1,2%, studzieni—sakaviku — na 1,1%, studzieni—krasaviku — na 1,2%, studzieni—mai — na 1,4%, studzieni—červieni — na 0,3%, studzieni—lipieni — na 0,4%.

Zhodna z prahnozam sacyjalna-ekanamičnaha raźvićcia krainy ŭ 2009 hodzie čakaŭsia pryrost VUP na 10—12%.

Abjom pramysłovaj vytvorčaści ŭ studzieni—kastryčniku skaraciŭsia da ŭzroŭniu anałahičnaha letašniaha pieryjadu na 4,5% (u studzieni—vieraśni — taksama na 4,5%; hadavy prahnoz — rost na 10—12%), vytvorčaść spažyvieckich tavaraŭ — na 0,9% (0,6%; rost na 12—13%). Pry hetym vypusk charčovych tavaraŭ pavialičyŭsia na 4,9% (5,2%; 12—13%), niecharčovych — źniziŭsia na 7,6% (7,4%; rost na 11,5—12,5%).

Vypusk sielskahaspadarčaj pradukcyi haspadarkami ŭsich katehoryj ułasnaści za dzieviać miesiacaŭ hetaha hoda pavialičyŭsia na 1,1% (2,4%; 8,5—9,5%). Pry hetym zafiksavana padzieńnie vytvorčaści bulby (na 23,7%), aharodniny adkrytaha hruntu (na 15,9%), cukrovych burakoŭ (na 2,3%). Uzrasła realizacyja žyvioły i ptuški na zarez u žyvoj vazie (na 12,2%), vytvorčaść małaka (na 8,5%) i jajek (na 4,5%).

Abjom inviestycyj u asnoŭny kapitał uzros na 13,1% (14,5%; 23—25%). Uviedziena ŭ ekspłuatacyju 4 młn. 728,7 tys. kv. m žylla, abo na 15,6% bolš.

Pieravozki hruzaŭ skaracilisia na 4,3% (u studzieni—vieraśni — na 5,9%). Roźničny tavaraabarot uzros na 2,6% (2,6%; prahnoz na hod — 16—17%).

Spažyvieckija ceny pavialičylisia ŭ kastryčniku na 0,4%, z pačatku hoda — na 8,3% (hadavy prahnoz — 9—11%).

Kolkaść biespracoŭnych, zarehistravanych u orhanach pa pracy, zaniataści i sacyjalnaj abaronie, na 1 listapada skłała 41,4 tys. čałaviek (0,9% ekanamična aktyŭnaha nasielnictva).

Pry hetym pavodle źviestak Biełstatu deflatar — indeks inflacyi, z dapamohaj jakoha vyličvajecca VUP, — apuściŭsia z 20% u 2008 hodzie da 6% sioleta. U niezaležnych ekanamistaŭ mienavita hetaja ličba vyklikaje niedavier. Pry deflatary 20% padzieńnie VUP akazałasia b roŭnym 15%.

MB; pavodle inf. BiełaPAN

Клас
0
Панылы сорам
0
Ха-ха
0
Ого
0
Сумна
0
Абуральна
0