Stvaralnik PVK «Vahnier» Jaŭhien Pryhožyn
Krytyka, ź jakoj stvaralnik PVK «Vahnier» Jaŭhien Pryhožyn abrynuŭsia na Minabarony RF, i jaho razvahi pra situacyju na froncie pačali «surjozna turbavać vyšejšaje kiraŭnictva krainy», śćviardžajuć dźvie krynicy «Mieduzy», blizkija da Kramla.
9 maja Jaŭhien Pryhožyn apublikavaŭ 27-chvilinnaje videa, dzie nie tolki znoŭ paskardziŭsia, što jaho padraździaleńni atrymali 10% ad patrabavanych snaradaŭ, i pryhraziŭ kinuć Bachmut, ale i parazvažaŭ pra niejkaha «ščaślivaha dziadulu», što vyklikała asablivy rezanans u sacsietkach.
«Jość ludzi, jakija vajujuć, a jość ludzi, jakija adzin raz u žyćci niedzie vyvučyli, što pavinien być rezierv, — i źbirajuć, źbirajuć, źbirajuć hetyja reziervy. I zamiest taho, kab vydatkavać snarady zabić praciŭnika, zachavać žyćcio našaha sałdata, zabivajuć našych sałdat.
A ščaślivy dziadula dumaje, što jamu dobra. I što rabić dalej krainie? Kali jon maje racyju, daj boh usim zdaroŭja. A voś što rabić krainie, što rabić našym dzieciam, unukam, budučyni Rasii, i jak vyjhrać vajnu, kali raptam vypadkova, ja prosta miarkuju, akažacca, što hety dziadula — skončany mudak?
Surazmoŭcy «Mieduzy», blizkija da Administracyi prezidenta Rasii, śćviardžajuć, što ŭ Kramli patrabavańni Pryhožyna, źviernutyja da Minabarony RF, uspryniali jak «surjoznuju pahrozu». Adna z krynic śćviardžaje, što ciapier Pryhožyn dziejničaje «nie ŭ ahulnaj kamandzie i nie ŭ ahulnych intaresach» z rasijskaj uładaj.
«U jaho jość svoj prajekt — Bachmut, i dziela jaho jon robić usio. Ale heta asabisty prajekt, kab atrymać upłyŭ na Minabarony, kab «Vahnier» staŭ hałoŭnaj pieramožnaj siłaj», — ličyć surazmoŭca «Mieduzy».
Jašče bolš niehatyŭna ŭ Kramli ŭspryniali słovy pra «ščaślivaha dziadulu»: «Viadoma, jon moža potym skazać, što heta pra [ministra abarony Siarhieja] Šajhu ci pra abstraktnaha abyvaciela, ale ludzi robiać zrazumiełyja vysnovy».
Adna z krynic «Mieduzy» miarkuje, što Pryhožyn sapraŭdy prama namiakaŭ na Pucina. Adnak inšy surazmoŭca ličyć, što hetyja słovy nielha rasceńvać jak «pramuju ataku» na prezidenta Rasii.
Surazmoŭcy «Mieduzy», blizkija da AP, śćviardžajuć, što padobnyja pavodziny Pryhožyna mohuć tłumačycca «asabistym abiacańniem», jakoje stvaralnik PVK «Vahnier» nibyta daŭ Pucinu adnosna daty kančatkovaha ŭziaćcia Bachmuta. Krynicy «Mieduzy» nie viedajuć, jakuju mienavita datu moh paznačyć Pryhožyn, ale miarkujuć, što jon «zryvaje dedłajn» i niervujecca z-za hetaha. Raniej va USU zajaŭlali, što prarasijskija siły chočuć zachapić Bachmut da 9 maja (hetaha nie adbyłosia).
«Dziela asabistaha abiacańnia jon padstaŭlaje rehularnyja vojski, robić pravakacyjnyja zajavy. Heta niekanviencyjnyja pavodziny», — dadaje adzin z surazmoŭcaŭ «Mieduzy».
Pa słovach krynic, svaimi zajavami Pryhožyn pierajšoŭ «čyrvonyja linii».
Pa acency surazmoŭcaŭ, takija dziejańni mohuć pryvieści da surjoznych prablem, niahledziačy na suviazi Pryhožyna ŭ vyšejšych rasijskich kołach.
Krynicy «Mieduzy» nazyvajuć siarod «zastupnikaŭ Pryhožyna» kiraŭnika Rashvardyi Viktara Zołatava i tulskaha hubiernatara, byłoha achoŭnika Pucina Alaksieja Dziumina. Jašče adnym «zastupnikam» da niadaŭniaha času ličyŭsia Juryj Kavalčuk — miljarder i siabar Pucina, adnak, pa danych krynic «Mieduzy», jon apošnim časam «addaliŭsia» ad kiraŭnika PVK.
Krynica «Mieduzy» ŭ adnym ź dziaržaŭnych ŚMI śćviardžaje, što prapahandysty ŭžo atrymali ad Administracyi prezidenta «papiaredžańnie», što kali Pryhožyn i nadalej praciahnie krytykavać Ministerstva abarony i raspaviadać pra «niaŭdačy na froncie», to ŭ publikacyjach jaho varta «pazicyjanavać jak zdradnika» Rasii.
Raniej hazieta The Washington Post śćviardžała, što Minabarony RF rychtavała publičnuju kampaniju z krytykaj Pryhožyna, ale nie zmahło jaje arhanizavać. Ciapier raspracoŭka anałahičnaj kampanii viadziecca ŭžo ŭ Administracyi prezidenta — na vypadak, kali «Pryhožyn praciahnie adryvacca».
Pry hetym surazmoŭcy «Mieduzy», blizkija da Kramla, miarkujuć, što na hetym ułady nie spyniacca:
«Pakul «Vahnier» tam [na froncie], Pryhožynu mała što pahražaje, jon maje mahčymaść vyjści na pramy dyjałoh z prezidentam. Ale kali tak pojdzie dalej, to heta dakładna spyniać aficyjnyja siłaviki».
Sam Jaŭhien Pryhožyn admoviŭsia adkazvać na pytańni «Mieduzy», u tym liku pra toje, jakoha «dziadulu» jon mieŭ na ŭvazie: «Ja ŭžo šmat razoŭ paŭtaraŭ, što varožym vydańniam kamientaroŭ nie daju. Jak tolki padobnyja pytańni pryjduć ad nieanhažavanaha rasijskaha vydańnia, ja z zadavalnieńniem na ich adkažu». Raniej Pryhožyn nieadnarazova kamientavaŭ publikacyi «Mieduzy».
Čytajcie taksama:
Isteryki Pryhožyna pakazvajuć, što Rasija moža być bližejšaj da 1917 hoda, čym my dumajem
