Pasiadžeńnie Biełaruskaj respublikanskaj navukova-mietadyčnaj rady pa pytańniach historyka-kulturnaj spadčyny 22 maja. Na piarednim krai stała makiet novaha prajekta rekanstrukcyi kvartała ŭ Breście. Fota: telehram-kanał Ministerstva kultury Biełarusi
Na piarednim krai stała raźmieščany makiet niejkaha histaryčnaha kvartała z upisanym u jaho sučasnym kompleksam. My zdoleli apaznać hetaje miesca — heta šmatpakutny roh vulic Savieckaj i Dziaržynskaha ŭ Breście.
Pavialičany frahmient fota z makietam častki histaryčnaha centra Bresta na rahu vulic Savieckaj i Dziaržynskaha. Bežavyja abjomy — isnujučaja zabudova. Fota: telehram-kanał Ministerstva kultury Biełarusi
Na zdymku ciažka razhladzieć padrabiaznaści rekanstrukcyi, možna chiba što adznačyć toje, što novy kompleks składajecca ź niekalkich roznavialikich abjomaŭ, fasady jakich vykananyja ŭ sučasnaj stylistycy, bieź vidavočnaha pierajmańnia histaryčnych formaŭ. Centralny budynak značna vyšejšy za susiednija histaryčnyja kamianicy na tym baku vulicy.
Sučasny vyhlad kvartała pa Savieckaj vulicy pad banierami i rekłamnymi ščytami. Fota: Wikimedia Commons
Hetaja terytoryja ŭžo šmat hadoŭ źjaŭlajecca łasym kavałkam dla zabudoŭščykaŭ, ale nivodny ź ich dahetul tak i nie zmoh pačać praces rekanstrukcyi kvartała. Na jaho terytoryi raźmieščanyja šeść histaryčnych budynkaŭ: pa Savieckaj vulicy, 96, 98, 100, 100/1, 102/1 i pa vulicy Dziaržynskaha, 39. Ź ich tolki dom pa Savieckaj vulicy, 100 i vuhłavy dom pa Dziaržynskaha, 39 majuć status historyka-kulturnaj kaštoŭnaści i musiać być adrestaŭravanyja, astatnija navat nie nazvanyja «šarahovaj zabudovaj», tamu nadziei na toje, što jany buduć zachavanyja, niama.
Vyhlad kvartała ŭ 2011 hodzie. Jašče nie ŭsie fasady schavanyja za banierami. Fota: «Jandeks. Karty»
Damy stajać zakinutymi prynamsi z pačatku 2010-ch hadoŭ i doŭhi čas całkam abciahnutyja banieram, kab nie psavać nastroj haradžan i haściej horada padčas prahułak pa vulicy. Adna z apošnich sprob rekanstrujavać kvartał była ŭ 2018 hodzie, paviedamlałasia, što tut źjavicca hatel na 60 numaroŭ z restaranam i parkoŭkaj. Aŭtarski kalektyŭ «Kanviersijan-bud» navat atrymaŭ u 2019 hodzie za prajekt rekanstrukcyi dypłom 2-j stupieni na respublikanskim konkursie. Ale ŭžo ŭ 2021 hodzie stała viadoma što inviestycyjny dahavor z kampanijaj-zabudoŭščykam «Žyłbudkamplekt» skasavali praź nievykanańnie abaviazacielstvaŭ.
Prajekt raniejšaha varyjantu rekanstrukcyi, pradstaŭleny na respublikanskim konkursie na lepšy prajekt ci pabudovu ŭ 2019 hodzie. Z sajta Biełaruskaha sajuza architektaraŭ
Na zabudovu pa Savieckaj vulicy peŭnyja rehłamienty nakładaje prajekt zon achovy histaryčnaha centra, pavodle jakoha zabaraniajecca ŭźviadzieńnie budynkaŭ i rekanstrukcyja isnujučaj zabudovy «biez vykarystańnia paramietraŭ fasadaŭ histaryčnych budynkaŭ i vyšej adznaki vilčaka dachu prylahajučych histaryčnych budynkaŭ, raźmieščanych pa linii zabudovy».
Traktavać paniaćcie «histaryčnyja budynki» možna pa-roznamu, ale navat kali mieć na ŭvazie pad imi vyklučna aficyjnyja pomniki, to pradstaŭleny prajekt parušaje rehłamient — jon vyšejšy za susiedniuju zabudovu i maje sučasnyja fasady.
Na žal, Biełaruskaja respublikanskaja navukova-mietadyčnaja rada pa pytańniach historyka-kulturnaj spadčyny zastajecca zakrytaj strukturaj, skład i rašeńni jakoj pa razhledžanych pytańniach nidzie nie publikujucca. Tamu my nie možam upeŭniena kazać pra vyniki pasiadžeńnia. Miarkujučy pa kolkaści psieŭdahistaryčnaj zabudovy i hmachaŭ-navabudaŭ, što ŭźnikli na bresckaj piešachodcy za apošnija hady, całkam mahčyma, što hety prajekt moh być uchvaleny Radaj.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
