Fota: slovoidilo.ua
76-hadovy finski biznesoviec Anders Viklef atrymaŭ 121 tysiaču jeŭra štrafu paśla taho, jak čarhovy raz pieravysiŭ chutkaść na aŭto. Pra heta Viklef raskazaŭ u intervju vydańniu Nya Åland, piša «Ukrainskaja praŭda».
Viklef jechaŭ z chutkaściu 82 kiłamietry za hadzinu ŭ rajonie, dzie abmiežavańnie składaje 50 kiłamietraŭ za hadzinu. U subotu palicyja jaho spyniła i vypisała štraf, a taksama pazbaviła pravoŭ kiroŭcy na 10 dzion.
«Ja jakraz pačaŭ zapavolvacca, ale, padazraju, niedastatkova chutka, tak i atrymałasia. Ja sapraŭdy škaduju, što adbyłosia», — zajaviŭ biznesoviec.
Jon u toj ža čas vykazaŭ nadzieju, što jaho štraf dapamoža prafinansavać sistemu achovy zdaroŭja ŭ Finlandyi, jakaja «niedaatrymaje paŭtara miljarda jeŭra».
U Finlandyi pamier štrafu za pieravyšeńnie chutkaści zaležyć ad prybytkaŭ parušalnika darožnaha ruchu. Naprykład, u 2002 hodzie adzin ź mieniedžaraŭ finskaj kampanii Nokia byŭ aštrafavany na 103 tysiačy jeŭra za pieravyšeńnie dazvolenaj chutkaści na 15 km/h.
Viklefa i raniej štrafavali za zanadta chutkuju jazdu: u 2018 hodzie jamu vypisali 63 680 jeŭra štrafu, a piaćciu hadami raniej — 95 tysiač jeŭra.
Biznesoviec, uradženiec Ałandskich vyspaŭ, ličycca adnym z samych bahatych pradprymalnikaŭ Finlandyi. Jon uznačalvaje chołdynh Ålandsbanken, u jaki ŭvachodziać kampanii, jakija zajmajucca łahistykaj, viertalotnymi pasłuhami, nieruchomaściu, handlem i turyzmam.
