Dziejańni vahnieraŭcaŭ

Vyjaviłasia, što vajaŭničyja zajavy Pryhožyna nie zusim blef. Padkantrolnyja jamu padraździaleńni pryjšli ŭ Rastoŭ-na-Donie i ŭstalavali kantrol, prynamsi, nad jaho častkaj.

U telehram-kanałach apublikavali videa ź Jaŭhienam Pryhožynym u štabie Paŭdniovaj vajskovaj akruhi ŭ Rastovie-na-Donie (vyhladaje, što supracivu jamu nie akazali). Na hetych kadrach jon viadzie pieramovy z namieśnikam ministra abarony Rasii Junus-Biekam Jaŭkuravym.

«My siudy pryjechali. My chočam atrymać načalnika Hienštaba i Šajhu. Pakul ich niama, my znachodzimsia tut, błakujem horad Rastoŭ i idziom u Maskvu», — kaža Pryhožyn na videa.

Pryhožyn paviedamiŭ, što vahnieraŭcy zachapili štab Paŭdniovaj vajskovaj akruhi i što rasijskija samaloty praciahvajuć bambić ukraincaŭ. Štab jany zachapili, ź jahonych słoŭ, kab hetyja samaloty nie bambili vahnieraŭcaŭ.

Taksama kiraŭnik PVK «Vahnier» paviedamiŭ, što całkam kantraluje Rastoŭ, zabłakavany ŭsie vajskovyja abjekty i zachopleny aeradrom.

Taki vid na Budzionaŭski praśpiekt u Rastovie, dzie raźmieščany štab Paŭdniovaj vajskovaj akruhi, byŭ ranicaj 24 červienia. Usia vulica zaniataja vajskovaj technikaj.

Vajskovaja technika i na inšych vulicach horada. Bajcy PVK «Vahnier» stajać nasuprać vajskoŭcaŭ i techniki Minabarony.

Najbolšy rasijski aeradrom Milerava pad Rastovam-na-Donie, jak śćviardžajecca, pad kantrolem vahnieraŭcaŭ.

«Milerava pačało lotać pa zadačach. PVK dazvoliła. Na bort skača adzin pevekašnik, kab viertalot nie palacieŭ, kudy nie treba, i lacić» — piša infarmavany rasijski kanał fighter_bomber.

Druhi kirunak nastupleńnia vahnieraŭcaŭ, akramia Rastova-na-Donie, — Varoniež.

Pryhožyn raźmiaściŭ fota razzbrojenych rasijskich vajskoŭcaŭ na pahraničnym pierachodzie Buhajoŭka ŭ Varoniežskaj vobłaści. «Jašče 180 rasijskich vajskoŭcaŭ i siłavikoŭ admovilisia pieraškadžać dziejańniam PVK «Vahnier» i skłali zbroju», — takim podpisam supravadziŭ jon fota.

Kałona vahnieraŭcaŭ ruchajecca pa Varoniežskaj vobłaści. Tam admienieny ŭsie masavyja mierapryjemstvy.

Pry hetym śćviardžajecca, što pierasoŭvańniu kałon nibyta sprabujuć pieraškodzić Pavietrana-kaśmičnyja siły Rasii, i vahnieraŭcy niekalki pavietranych abjektaŭ užo navat źbili.

Pryhožyn śćviardžaje, što jaho najmity źbili ŭžo try pavietranyja abjekty, jakija sprabavali atakavać ich kałony.

U rasijskich vajskovych pablikach havorać pra dva źbityja viertaloty radyjoraźviedki i Mi-35.

«Źbita dva Mi-8MTPR. Viertaloty REB. Paraj lacieli. Ekipažy žyvyja.

Taksama byŭ źbity Mi-35. Ci pracavaŭ jon pa kałonie, ja nie viedaju. Pra ekipaž nie viedaju.

U suviazi z tym, što kałona vahnieraŭ jedzie pa trasie M-4 upieramiešku z cyvilnymi mašynami, pracavać viertaloty vidavočna nie mohuć.

Ciapier trasa zakrytaja. Mašyny prybirajuć», — napisaŭ infarmavany błohier Fighterbomber.

Pavodle apošnich paviedamleńniaŭ, siły PVK «Vahnier» praciahvajuć ruchacca. Jany padyšli da vajskovaha aeradroma Buturlinaŭka ŭ Varoniežskaj vobłaści.

Pierakryćcio aŭtamahistrali «Krym» u Maskoŭskaj vobłaści moža śviedčyć pra toje, što siły, viernyja Pucinu i Šajhu dapuskajuć mahčymaść vychadu vahnieraŭcaŭ na rubiažy Padmaskoŭja.

Na videa ź miascovych pablikaŭ — zienitna-rakietnyja kompleksy «Pancyr» vahnieraŭcaŭ pad Buturlinaŭkaj.

Na terytoryi Varoniežskaj vobłaści ŭviedzieny režym kontrterarystyčnaj apieracyi.

U Varoniežy miž tym zvyčajnaja subotniaja ranica: vajskovaj techniki i ŭzmocnienych naradaŭ palicyi pakul niama. U adnoj z vajskovych čaściej horada taksama spakojna.

Susiednija z Rastoŭskaj i Varoniežskaj vobłaści vystupleńniami pakul nie achoplenyja, ale ich kiraŭnictva napahatovie ci, prynamsi, zajaŭlaje pra heta. U Lipieckaj vobłaści, naprykład, admianili ŭsie masavyja mierapryjemstvy, jak paviedamlajuć miascovyja ŭłady.

Situacyja ŭ Krasnadarskim krai zastajecca spakojnaj, dadatkovyja miery biaśpieki nie ŭvodzilisia, usie abjekty žyćciezabieśpiačeńnia pracujuć štatna, jak paviedamlajecca ŭ telehram-kanale apieratyŭnaha štaba kraju.

Reakcyja centra

U metach «spynieńnia mahčymych teraktaŭ» na terytoryi Maskvy i Maskoŭskaj vobłaści ŭviedzieny režym kontrterarystyčnaj apieracyi.

Na ŭjeździe ŭ Maskvu pa Varšaŭskaj šašy — KamAZy i mnostva supracoŭnikaŭ palicyi, paviedamiŭ telehram-kanał «Ostorožno, novosti».

U Padmaskoŭi ŭ rajonie Sierpuchava pierakryty most cieraz Aku na aŭtamahistrali M-2 «Krym». Ruch u bok Maskvy zabłakavany.

U Pieciarburhu siłavikami ačepleny źviazanyja z Pryhožynym hatel i restaran, a taksama ofis PVK «Vahnier», tam idzie pieratrus, paviedamlaje «Fontanka».

Jak viadoma, jašče ŭčora FSB zaviała ŭ dačynieńni da Pryhožyna kryminalnuju spravu pavodle artykuła ab arhanizacyi ŭzbrojenaha buntu. Hienprakuratura paćvierdziła zakonnaść hetaha rašeńnia.

Surovy Uładzimir Pucin vystupiŭ u suviazi z padziejami ź piacichvilinnym zvarotam.

Ën nazvaŭ vystup vahnieraŭcaŭ «udaram u śpinu» i «zdradaj» i paraŭnaŭ hety vystup z padziejami 1917 hoda. «Pichajuć krainu da anarchii i kapitulacyi», — skazaŭ prezident Rasii.

Pucin zajaviŭ, što «situacyja ŭ Rastovie zastajecca składanaj». Pra toje, što pad kantrolem miaciežnikaŭ znachodzicca i Varoniež, jon zmaŭčaŭ.

Ën zaklikaŭ «nie rabić fatalnuju, trahičnuju pamyłku. Zrabić adziny pravilny vybar: spynić udzieł u złačynnych dziejańniach».

Reakcyja nasielnictva, miascovych čynoŭnikaŭ i «lidaraŭ dumak»

Niejkaja mejnstrymnaja dumka rasijan adnosna taho, što adbyvajecca, pakul nie prahladajecca. Usio źmiašałasia ŭ hetyja chviliny na vulicach Rastova-na-Donie i Varonieža.

Miascovyja žychary z maciukami kamientujuć, jak u ich na vačach vahnieraŭcy akružajuć padkantrolny Minabarony budynak. 

Niekatoryja žychary Rastova-na-Donie krytykujuć vahnieraŭcaŭ, ustupajuć u sprečki ź imi na vulicach.

Na vulicach Rastova-na-Donie ŭźnikajuć sprečki miž prychilnikami i praciŭnikami PVK «Vahnier».

Z zajavami ab viernaści Uładzimiru Pucinu vystupili taksama kiraŭniki akupacyjnych administracyj: Daniecka — Dzianis Pušylin, Chiersona — Uładzimir Salda i Zaparožža — Jaŭhien Balicki.

«Hniusnaj zdradaj» nazvaŭ miaciež Pryhožyna kiraŭnik Čačni Ramzan Kadyraŭ.

Kadyraŭ zajaviŭ, što «całkam padtrymlivaje kožnaje słova sa zvarotu Pucina i što bajcy Minabarony i Rashvardyi pa Čačni ŭžo vyjechali ŭ zony napružanaści».

U toj ža čas svaje simpatyi da Pryhožyna aściarožna vykazvaje šerah rasijskich vajenkaraŭ.

Manarchist Ihar Hirkin (Strałkoŭ), były «ministr abarony» samaabvieščanaj «DNR», jaki taksama viadomy ŭ apošni čas jak aktyŭny krytyk Kramla, staŭ u hetym kanflikcie na bok Pucina:

«U hetaj situacyi kožny sumlenny aficer, jaki pamiataje ab prysiazie, abaviazany supraćstajać miaciežnikam, — napisaŭ Strałkoŭ. — Niezaležna ad taho, jak jon stavicca da dziejnaha prezidenta, ministra abarony i h. d.»

Reakcyja zvonku

Kiraŭnik ukrainskaj raźviedki Budanaŭ prakamientavaŭ situacyju z Pryhožynym. Jon kaža, što heta nie pastanoŭka, a «całkam realny kanflikt».

Budanaŭ zajaviŭ, što Pryhožyn «časta kaža praŭdu» pra situacyju ŭ rasijskim vojsku, u adroźnieńnie ad Minabarony RF.

Ukrainskija kanały, niezaležna ad palityčnaj afilacyi, z asałodaj aśviatlajuć padziei ŭ Rasii.

Tak, Anatol Šaryj śćviardžaje, što «praz Varoniež pačynaje ruch u bok Maskvy druhaja kałona PVK «Vahnier».

Sa zvarotam da biełarusaŭ źviarnuŭsia Valeryj Sachaščyk.

«Dzień u Rastovie vydaŭsia cikavy», — zajaviŭ były kamandzir 38-j desantnaj bryhady, apranuty ŭ vajskovuju formu.

«Prarasijski šlach zavioŭ nas u tupik», — zajaviŭ pradstaŭnik Abjadnanaha pierachodnaha kabinieta pa abaronie i biaśpiecy.

Ën zaklikaŭ «abjadnać siły i ŭratavać radzimu».

«Vajskoŭcy 38-j desantnaj bryhady i inšych vajskovych čaściej, nastrojciesia na našu chvalu i zastavajciesia na suviazi. My pieramožam!» — zakončyŭ Sachaščyk svoj zvarot.

Čytajcie taksama:

Klučavy momant u sprobie vajskovaha pieravarotu ŭ Rasii: ci paśla zvarotu Uładzimira Pucina vahnieraŭcy spyniacca

Miaciež Pryhožyna vybivaje vialikuju častku bajazdolnych čaściej i demaralizuje rasijskich vajskoŭcaŭ

Łukašenkaŭskija prapahandysty taksama nie śpiać i z chvalavańniem sočać za situacyjaj u Rasii. Zrabili dla vas padborku ich vykazvańniaŭ

Клас
23
Панылы сорам
2
Ха-ха
6
Ого
1
Сумна
1
Абуральна
6