Fota: Christie's image ltd

Fota: Christie's image ltd

Dva partrety pendźla Rembranta, jakija 200 hadoŭ znachodzilisia ŭ pryvatnych rukach, pajšli z małatka na aŭkcyjonie Christie's u Łondanie za 11 ź lišnim miljonaŭ funtaŭ sterlinhaŭ ($14 młn), piša Bi-bi-si.

Nievialikija avalnyja partrety (ich vyšynia nie pieravyšaje 20 santymietraŭ), na jakich namalavany zamožny hałandski vodapravodčyk z žonkaj, datavanyja prykładna 1635 hodam, byli vystaŭlenyja na tarhi ŭ čas rasprodažy kalekcyi starych majstroŭ, i čakałasia, što jany buduć pradadzienyja za 5—8 młn funtaŭ, adnak padčas tarhoŭ cana dasiahnuła £11.235.000.

Pa ironii losu apošni raz hetyja partrety źjaŭlalisia ŭ tym ža aŭkcyjonnym domie Christie's u 1824 hodzie, dzie ich i nabyŭ prodak ciapierašnich uładalnikaŭ. Z tych časoŭ jany nie pakidali pryvatnaj kalekcyi, a mastactvaznaŭcy i znaŭcy Rembranta na niejki čas zabylisia pra ich.

«Ja byŭ uražany, kali vyśvietliŭ, što na praciahu 200 hadoŭ nichto nie daśledavaŭ hetych karcin i jany nie zhadvajucca ŭ pracach, pryśviečanych Rembrantu, jany cicha visieli sabie dva stahodździ, i imi cicha zachaplalisia ŭładalniki»,

— kaža vice-prezident aŭkcyjonnaha doma Hienry Piecifier, śpiecyjalist pa starych majstrach, jaki ŭpieršyniu sutyknuŭsia z hetymi partretami jašče niekalki hadoŭ tamu padčas zvyčajnaj acenki pryvatnaj kalekcyi i niečakana znoŭ adkryŭ dla śvietu dva šedeŭry.

Paśla hetaha pačałasia karpatlivaja ekśpiertyza aŭtentyčnaści partretaŭ, u jakoj brali ŭdzieł ekśpierty ź Dziaržaŭnaha mastackaha muzieja ŭ Amsterdamie.

Na partretach — samych maleńkich z tych, što vyjšli z-pad pendźla vialikaha fłamandca — namalavana pažyłaja para: viadomy ŭ Lejdenie zamožny vodapravodčyk Jan Vilems van der Plujm i jaho žonka Jaaphien Karełs.

Siamja Rembranta dobra viedała ich i navat paradniłasia ź imi: ich syn ažaniŭsia sa stryječnaj siastroj Rembranta z matčynaha boku, jon, darečy, taksama byŭ žyvapiscam, jakomu Rembrant, jak ličycca, paźniej davaŭ uroki.

Być moža, tamu partrety napisany z takoj ciepłynioj (heta nie značyć, što ŭ Rembranta jość choć by adzin partret, napisany biez sproby praniknuć va ŭnutrany śviet natury).

Dva partrety visieli ŭ domie vodapravodčyka da 1760 hoda, kali ich upieršyniu pradali na aŭkcyjonie ŭ Amsterdamie.

Paśla hetaha jany vandravali z adnoj pryvatnaj kalekcyi ŭ inšuju, pabyvali ŭ Varšavie, Paryžy, i, narešcie, dabralisia da Łondana, dzie i asieli paśla prodažu ŭ 1824 hodzie.

Paśla «paŭtornaha adkryćcia» partrety znoŭ adpravilisia ŭ padarožža i ŭ červieni vystaŭlalisia ŭ Amsterdamie i Ńju-Jorku, a potym i ŭ Łondanie na pieradprodažnym «kłasičnym tydni».

U Christie's admovilisia paviedamić, chto mienavita nabyŭ partrety, i navat nie stali ŭdakładniać, ci była heta pryvatnaja asoba, ci muziej. U aŭkcyjonnym domie zajavili tolki, što handal vioŭsia pa telefonie, i pakupnik sam zrobić abjavu ab kupli, kali taho pažadaje.

Čytajcie taksama:

Čatyry karciny Marka Šahała pradali na aŭkcyjonie ŭ Ciurychu

Raźbituju hitaru Kurta Kabejna pradali na aŭkcyjonie amal za 600 tysiač dalaraŭ

Karcinu Klimta pradali za rekordnyja dla Jeŭropy hrošy

Клас
0
Панылы сорам
0
Ха-ха
0
Ого
2
Сумна
0
Абуральна
0