Viktar Praniuk i Volha Bondarava. Fota: slonves.by, skryn ź jutub-kanała Volhi Bondaravaj

Viktar Praniuk i Volha Bondarava. Fota: slonves.by, skryn ź jutub-kanała Volhi Bondaravaj

Nahodaju dla źniavoleńnia Alesia Puškina staŭ partret paślavajennaha antysavieckaha partyzana Jaŭhiena Žychara. Karcina była vystaŭlenaja ŭ hrodzienskim pryvatnym Centry haradskoha žyćcia. Na joj mastak acharaktaryzavaŭ Žychara jak čałavieka ź biełaruskaha supracivu, zmahara z balšavikami.

U hetym vykazvańni prakuratura ŭhledzieła «reabilitacyju i apraŭdańnie nacyzmu» dy raspačała kryminalnuju spravu.

Raniej za prakuraturu na vystavu nakinułasia sieryjnaja skaržnica i prarasijskaja aktyvistka Volha Bondarava. Ź jaje danosu pačaŭsia pieraśled Alesia Puškina.

U svaim videa 22 sakavika 2021 hoda ad imia «hramadskaści i narodu» jana zajaŭlała, što centr i vystava z karcinaj Jaŭhiena Žychara — «rassadnik i prapahanda nacyzmu».

Pahutaryć z Bondaravaj «Našaj Nivie» nie ŭdałosia. Na telefanavańni jana nie adzyvajecca.

22 sakavika 2021 hoda dziaržaŭnaja hazieta «SB. Biełaruś siehodnia» apublikavała artykuł z tymi ž akcentami, što byli ŭ videa Bondaravaj.

U kamientary namieśnik staršyni Hrodzienskaha abłvykankama Viktar Praniuk abiacaŭ, što «vypadak» budzie «staranna vyvučany i atrymaje pryncypovuju acenku».

Praz tydzień, 30 sakavika 2021 hoda, Alesia Puškina schapili.

Čynoŭnik Viktar Praniuk pachodzić z hrodzienskaj hłybinki. Jon naradziŭsia ŭ 1973 hodzie ŭ vioscy Piaski Lidskaha rajona.

Pa prafiesii jon nastaŭnik fiziki i infarmatyki, vypusknik piedahahičnaha ŭniviersiteta imia Maksima Tanka. Pracoŭnuju dziejnaść pačynaŭ z nastaŭnictva ŭ lidskich škołach.

Viktaru Praniuku ŭručajuć chleb i sol ad padnačalenych. Fota: region.grodno.by

Viktaru Praniuku ŭručajuć chleb i sol ad padnačalenych. Fota: region.grodno.by

Byłyja jaho kalehi kažuć, što piedahahičnym talentam Praniuk nie vyłučaŭsia, ale byŭ niakiepskim arhanizataram, umieŭ padabacca načalstvu i byŭ upartym u ažyćciaŭleńni svaich idej.

U 2003 hodzie Praniuk staŭ samym maładym dyrektaram pieršaha ŭ Lidzie i rajonie liceja. Licej padavaŭsia jak ustanova adukacyi novaha typu, a kiraŭnika ličyli aŭtaram składańnia jaho humanistyčnaj kancepcyi. Navučency liceja štohod vybirajuć sabie prezidenta.

U licei nastaŭničała i žonka budučaha čynoŭnika — Ludmiła Praniuk.

Karjera nastaŭnika dla Praniuka skončyłasia ŭ 2011 hodzie, kali jaho pryznačyli namieśnikam kiraŭnika Lidskaha rajvykankama.

Jaho pastavili adkazvać za ideałohiju i sacyjalnyja pytańni. Jon časta sustrakaŭsia z nasielnictvam.

U 2015 hodzie padčas prezidenckaj kampanii Praniuk dyskutavaŭ z kandydatkaj na prezidenctva Taćcianaj Karatkievič. Ź im jana sustrełasia ŭ 10-tysiačnym miastečku Biarozaŭka.

Viktar Praniuk (na piarednim płanie) i Taćciana Karatkievič. Fota: svaboda.org

Viktar Praniuk (na piarednim płanie) i Taćciana Karatkievič. Fota: svaboda.org

Praniuku nie spadabałasia ideja Karatkievič, kab čynoŭnikaŭ vybirali.

«Zadačy ŭ mianie adny — u mianie jość słužbovaja instrukcyja, jakuju ja vykonvaju», — davodziŭ čynoŭnik.

U 2019-m, kali pieryjad libieralizacyi zaviaršaŭsia, Viktar Praniuk tłumačyŭ nieabchodnaść ustalavańnia ŭ Lidzie pomnika Hiedyminu.

«Heta danina pavahi da histaryčnaj asoby i dziaržaŭnaha dziejača, jaki zmoh abjadnać multykulturnaje i raznamoŭnaje Vialikaje Kniastva Litoŭskaje, — padkreślivaŭ tady čynoŭnik. — Jon adzin z samych jaskravych prykładaŭ mudraha kiraŭnika-patryjota, simvalizuje spraviadlivaść i adzinstva».

U 2019 hodzie Łukašenka pryznačyŭ Viktara Praniuka namieśnikam staršyni abłvykankama. Jon kuryruje ideałohiju i sacyjalna-kulturnyja pytańni.

Čynoŭnik zasiadaje ŭ Saviecie Respubliki. Maje padziaku ad Łukašenki za prafiesijanalizm i hramatu nacyjanalnaha schodu. Byŭ uznaharodžany jubilejnymi miedalami da 65-hodździa «Pieramohi ŭ Ajčynnaj vajnie» i «Vyzvaleńnia Biełarusi ad niamiecka-fašysckich zachopnikaŭ».

Na čynoŭnickuju karjeru Praniuka ŭ abłvykankamie prypała pandemija, vybary, pratesty i teror.

U kancy žniŭnia 2020 hoda Viktar Praniuk prysuničaŭ u hrodzienskim harvykankamie na pieramovach pratestoŭcaŭ z pradstaŭnikami miascovaj ułady.

Tady čynoŭnikam pieradali patrabavańni ab adstaŭcy Łukašenki, kiraŭnikoŭ MUS, aryšcie siabroŭ CVK dy vyzvaleńni palityčnych źniavolenych. Kiraŭnictva harvykankama admoviłasia vyjści da pratestoŭcaŭ.

U 2021 hodzie, padčas mihracyjnaha kryzisu na biełaruska-polskaj miažy, Praniuk davodziŭ ekśpiertam Jeŭrakamisii, što ŭłady dobra abychodziacca z zamiežnikami ŭ transpartna-łahistyčnym centry «Bruzhi».

Mihranty ŭ centry «Bruzhi». Fota: BiełTA

Mihranty ŭ centry «Bruzhi». Fota: BiełTA

Čynoŭnik kazaŭ, što mihranty ŭ im mohuć znachodzicca da toj pary, pakul nie zbudziecca ich mara: abo jany pajeduć damoŭ, abo ŭ Jeŭropu. Praz try miesiacy centr spyniŭ pracu.

U 2022 hodzie Praniuka pastavili kiravać praŭładnaj «Biełaj Ruśsiu». Na adnym sa schodaŭ jon zajaŭlaŭ, što abjadnańnie pavinna «ŭziać aktyŭny ŭdzieł u arhanizacyi vybarčaj kampanii» ŭ miascovyja saviety i Pałatu pradstaŭnikoŭ.

«Pravieści nazirańnie za vybarami šyroka i masava, kab nie było prydzirak, kab usie ŭbačyli, što vybary ŭ Respublicy Biełaruś prachodziać prazrysta i dakładna», — davodziŭ jon.

Daviedacca, jak Viktar Praniuk uspryniaŭ navinu pra śmierć źniavolenaha Alesia Puškina, nie ŭdałosia. U abłvykankamie paviedamili, što čynoŭnik da 28 lipienia ŭ vodpusku.

Alesia Puškina sudździa Alena Šylko letaś 25 sakavika adpraviła na 5 hadoŭ u kałoniju strohaha režymu pa abvinavačvańni ŭ «ździeku ź dziaržaŭnych simvałaŭ» i «raspalvańni varožaści». Dziaržaŭnaje abvinavačvańnie pradstaŭlaŭ na sudzie Alaksandr Karol.

Viadomy biełaruski mastak, žyvapisiec-nonkanfarmist, pierformier spačatku pakarańnie adbyvaŭ u ivacevickaj kałonii, a potym byŭ pieraviedzieny na turemny režym u Hrodna. Palitviazień pamior u noč na 11 lipienia ŭ špitali, kudy jaho dastavili ŭ nieprytomnym stanie.

Hladzicie taksama:

«Šancaŭ na vyratavańnie nie było». Padrabiaznaści śmierci mastaka Alesia Puškina

U roznych haradach Jeŭropy adbylisia akcyi pamiaci Alesia Puškina FOTY

«Jaho tvorčaść była ŭvasableńniem niazłomnaha duchu biełaruskaha naroda» — Cichanoŭskaja pra Puškina

«Paŭtara miesiaca niama listoŭ…» Mastak Aleś Puškin znachodzicca na turemnym režymie

Chto takija vambaty? Jak łukašystaŭ padzialiła na dva łahiery adno pytańnie

Клас
4
Панылы сорам
8
Ха-ха
4
Ого
6
Сумна
12
Абуральна
95

Chočaš padzialicca važnaj infarmacyjaj ananimna i kanfidencyjna?